ထိုင်းနိုင်ငံအစိုးရ၏ နိုင်ငံရေးနှင့်စီးပွားရေးစိန်‌ခေါ်မှုများ

 

နိဒါန်း

ထိုင်းနိုင်ငံအစိုးရသစ်၏ အုပ်ချုပ်မှုခြေလှမ်းအစတွင် အမှားအယွင်းများရှိခဲ့ ပြီး ပြည်သူလုထုနှင့် အစိုးရအကြားတွင် မဟာဗျူဟာမြောက် ထိတွေ့ဆက်ဆံမှုများဖော်ဆောင်သင့်သည့် ကိစ္စရပ်များနှင့် ပတ်သက်ပြီး သုံးသပ်ဖော်ပြသွားပါမည်။[1]

ဖော်ပြချက်

ထိုင်းနိုင်ငံအနေဖြင့် ကြီးမားသည့် အကျပ်အတည်းများဖြင့် ကြုံတွေ့နေရ သည်ဟုဆိုခြင်းမှာ ချဲ့ကားပြောဆိုခြင်းမဟုတ်ပါ။ ၎င်းနိုင်ငံ၏ စီးပွားရေးအခြေ အနေသည် လုံးလုံးလျားလျားကျဆင်းနေခြင်းမဟုတ်သော်လည်း စီးပွားရေးဖွံ့ဖြိုးမှု နှေးကွေးလျက်ရှိပါသည်။ ထိုင်းနိုင်ငံ၏လူဦးရေတွင် သက်ကြီးရွယ်အိုအရေအတွက် များပြားလာနေခြင်းကြောင့် လုပ်သားအင်အားပျောက်ဆုံးနေသည့်အပြင် ကျန်းမာရေး စောင့်ရှောက်မှု ဝန်ဆောင်မှုများလည်း အများအပြားလိုအပ်လျက်ရှိပါသည်။ အဆိပ်သင့့််မီးခိုးမြူအန္တရာယ် ပိုမိုဆိုးဝါးလာခြင်းကြောင့် နိုင်ငံတွင်းရှိ အချို့သောဒေသများတွင် အဆုတ်ကင်ဆာဖြစ်ပွားမှုအရေအတွက် မြင့်တက်လာနိုင်ဖွယ်ရှိပါသည်။ နိုဝင်ဘာလ ၁၂ ရက်နေ့တွင် အသက်မွေးဝမ်းကျောင်းကောလိပ်တစ်ခု၌ ဖြစ်ပွားခဲ့သည့် ပစ်ခတ်မှုနှင့် အောက်တိုဘာလ ၃ ရက်နေ့ကဖြစ်ပွားခဲ့သည့် Siam Paragon ဈေးဝယ်စင်တာ ပစ်ခတ်မှုများကဲ့သို့ လက်နက်ကိုင်အကြမ်းဖက်မှုများ ပုံမှန်ဖြစ်ပွားနေခြင်းကြောင့် ပြည်သူလူထု၏ စိုးရိမ်ပူပန်မှုများ မြင့်တက်လျက်ရှိပါသည်။ အဆိုပါအချက်ကြောင့် တရားဥပဒေစိုးမိုးရေးအဖွဲ့များအပေါ် ပြည်သူလူထု၏ယုံကြည်မှု လျော့နည်းလာခြင်း ဖြစ်ပြီး လူမှုဖူလုံရေးအသုံးစရိတ် (Social Security Benefit) အတွက် ကာကွယ်ရေး အသုံးစရိတ်လျှော့ချရန် လိုအပ်ခြင်းနှင့် ကြီးမားလာသည့် ပထဝီဝင်နိုင်ငံရေး ဆိုင်ရာခြိမ်းခြောက်မှုများကို ကာကွယ်ရန်အတွက် ကာကွယ်ရေးအသုံးစရိတ်တိုးမြှင့် တောင်းခံသင့်ခြင်းတို့အကြား ထိုင်းတပ်မတော်၏ စစ်ဘက်ဆိုင်ရာ အဆင့်မြှင့်တင် ပြောင်းလဲမှုအစီအစဉ်များအကြား အကျပ်ရိုက်လျက်ရှိပါသည်။

နိုင်ငံရေးအခြေအနေများ ရှင်းရှင်းလင်းလင်းမရှိသည့်အချိန်တွင် အထက်ပါ စိန်ခေါ်မှုများကို ကုစားရန်ခက်ခဲနိုင်ပြီး ကောင်းမွန်စွာကိုင်တွယ်နိုင်ရန်အတွက် အပြောနှင့်အလုပ်ညီမျှသည့် မဟာဗျူဟာမြောက် ထိတွေ့ဆက်ဆံခြင်းများ လိုအပ်လိမ့်မည်ဖြစ်ပါသည်။ ထိုကိစ္စက နိုင်ငံရေးသမားများအတွက် ဖိအားများဖြစ်စေပြီး ရလဒ်အနေဖြင့် အပေါ်ယံဆုံးဖြတ်မှုများသာ ဖြစ်ပွားစေပါသည်။ အဆိုပါကိစ္စရပ်များသည် Pheu Thai ပါတီ၏ ဥက္ကဋ္ဌမှ ဝန်ကြီးချုပ်ဖြစ်လာသည့် Srettha Thavisin ခေါင်းဆောင်သည့် လက်ရှိအာဏာရအစိုးရအဖွဲ့ ဖြေရှင်းရမည့်ကိစ္စရပ်ဖြစ်ပါသည်။ ဥပမာအနေဖြင့် Pheu Thai ပါတီ၏ လူသိများသည့် “Digital Wallet” မူဝါဒကို သုံးသပ်ကြည့်နိုင်ပါသည်။ စားသုံးမှုမြှင့်တင်ခြင်းအစီအစဉ်တစ်ရပ်အနေဖြင့် တရားဝင်ထိုင်းနိုင်ငံသား ဖြစ်သူတိုင်းကို ဒီဂျစ်တယ်ငွေကြေး ဘတ် ၁၀,၀၀၀ (အမေရိကန်ဒေါ်လာ ၂၈၀) အထောက်အပံ့ပေးခြင်းအစီအစဉ်သည် ကနဦးကတည်းက ရှင်းလင်းပြတ်သားမှုမရှိခဲ့ပါ။ ထောက်ပံ့ပေးမည့်ငွေကြေးများ၏ အရင်းအမြစ်နှင့် ပတ်သက်၍ မေးခွန်းထုတ်မှု များရှိခဲ့ပြီး ထိုထောက်ပံ့ကြေးငွေများကို ချေးငွေများမဟုတ်သည့် နှစ်စဉ် အသုံးစရိတ်များမှ သုံးစွဲမည်ဖြစ်ပြီး ကြွေးမြီဝန်ထုပ်ဝန်ပိုးများကို လျော့ပါးစေရန် ရည်ရွယ်ခြင်းဖြစ်သည်ဟု Pheu Thai ပါတီက ရွေးကောက်ပွဲအတွင်း ပြောကြားခဲ့ပါသည်။

ထိုင်းအစိုးရသစ်၏သက်တမ်း ရက်ပေါင်း ၆၀ အကြာတွင် ဘတ် ၅၀၀ ဘီလီယံ ချေးငွေထောက်ပံ့ပေးမည်ဆိုသည့် ချေးငွေဥပဒေမူကြမ်း ပေါ်ပေါက်လာခဲ့ပါသည်။ သို့သော်လည်း ထိုင်းငွေကြေးတန်ဖိုးကျဆင်းနေမှုက အစိုးရ၏မြင့်မားသည့် အတိုးနှုန်းဖြင့် ချေးငွေထုတ်ချေးရာတွင် အဟန့်အတားများဖြင့် ကြုံတွေ့စေနိုင်ပါသည်။ အထူးသဖြင့် ချေးငွေများကြောင့် ငွေပိုသုံးစွဲနိုင်မည်ဖြစ်သော်လည်း ထပ်တိုးလာမည့် နိုင်ငံတော်၏ ကြွေးမြီများကြောင့် ဝန်ထုပ်ဝန်ပိုးဖြစ်လာနိုင်ပါသည်။ ချေးငွေဥပဒေမူကြမ်း တရားဝင် ဖြစ်လာခြင်းမတိုင်မီတွင် လက်ရှိဘဏ္ဍာရေးဝန်ကြီးအဖြစ်ပါ တာဝန်ထမ်းဆောင်နေရ သည့် Srettha အနေဖြင့် ဖြေရှင်းရန်မေးခွန်းများစွာရှိနေပါသည်။ တစ်ချိန်တည်းတွင် ထိုင်းအစိုးရသည် ၄ နှစ်အတွင်း အလုပ်အကိုင်အခွင့်အလမ်း ၁၀,၀၀၀ ကျော်ကို ဖန်တီးနိုင်ရန်အတွက် ထိပ်တန်းကုမ္ပဏီ ၁၀၀ ကျော်ကို စည်းရုံးပြီး ရင်းနှီးမြှုပ်နှံမှုများ တိုးမြှင့်ဖော်ဆောင်နိုင်ရန် ကြိုးပမ်းလျက်ရှိပါသည်။ သို့သော် စီးပွားရေးအကျပ်အတည်း များနှင့် ရင်ဆိုင်နေရသည့်နိုင်ငံတွင် ရင်းနှီးမြှုပ်နှံမှုများပြုလုပ်ရန် ခက်ခဲမည်ဖြစ်ပါသည်။

လုံခြုံရေးအပိုင်းတွင်လည်း မဟာဗျူဟာထိတွေ့ဆက်ဆံမှု အားနည်းကြောင်းကို ပြသနေသည့် သာဓကနှစ်ခုရှိပါသည်။ ပထမအချက်အနေဖြင့် ဈေးဝယ်စင်တာတွင် ဖြစ်ပွားခဲ့သည့် ပစ်ခတ်မှုနှင့် အာရှေ့တောင်အာရှတွင် လူကုန်ကူးမှုအများဆုံး ဖြစ်ပွားခြင်းကြောင့် လျော့ကျလာသည့် တရုတ်ခရီးသွားများ၏ယုံကြည်မှုကို တိုးမြှင့် ဖော်ဆောင်ရန်အတွက် ထိုင်းလမ်းမများပေါ်တွင် တရုတ်ရဲများနှင့် ပူးတွဲကင်းလှည့်မှု ပြုလုပ်ရန်ဆိုသည့် အဆိုတင်သွင်းခဲ့ခြင်းဖြစ်သည်။ ဒုတိယအချက်အနေဖြင့် အောက်တိုဘာလ တွင် ကာကွယ်ရေးဝန်ကြီး Sutin Klungsang တင်ပြခဲ့သည့် ချို့ယွင်းချက်များရှိနေသည့် တရုတ်နိုင်ငံထုတ် S-26 T ရေငုပ်သင်္ဘောကို ဈေးနှုန်းမြင့်မားပြီး ရေငုပ်သင်္ဘောတန်ပြန် တိုက်ဖျက်နိုင်စွမ်းရှိသည့် Type 054A ဖရီဂိတ်ဖြင့် အစားထိုးရန်ကိစ္စဖြစ်ကြောင်း ဖော်ပြထားပါသည်။

အဆိုပါကိစ္စနှစ်ရပ်စလုံးက အစိုးရအနေဖြင့် တွေးခေါ်နိုင်မှု အားနည်းနေသည်ကို ပြသနေပါသည်။ ပြည်ပရဲများနှင့် လုံခြုံရေးထိန်းသိမ်းမှုလုပ်ဆောင်ရန်ဆိုသည့် အတွေး အခေါ်သည် ထိုင်းနိုင်ငံ၏ အချုပ်အခြာအာဏာကို ထိခိုက်စေရုံသာမက ထိုင်းရဲတပ်ဖွဲ့၏ ဂုဏ်သိက္ခာကိုလည်း ထိခိုက်စေနိုင်ပါသည်။ ထိုင်းနိုင်ငံ၏ ရဲတပ်ဖွဲ့အကြီးအကဲ Torsak Sukvimol ကလည်း အဆိုပါအစီအစဉ်ကို ငြင်းဆိုခဲ့ပါသည်။ ဖရီးဂိတ်လဲလှယ်ခြင်းကိစ္စ တွင်လည်း ရေတပ်ဆိုင်ရာကိစ္စရပ်များကို အနည်းငယ်နားလည်သဘောပေါက်ထားသူများ အနေဖြင့် ရေငုပ်သင်္ဘော၏ ကိုယ်ပျောက်နိုင်စွမ်းနှင့် ဘက်စုံအသုံးပြုနိုင်စွမ်းကို အခြား ရေပြင်သွား စစ်ရေယာဉ်များက မစွမ်းဆောင်နိုင်ကြောင်းကို သဘောပေါက်နားလည်နိုင်ရန် ခက်ခဲမည်ဖြစ်သည်။ ထို့အပြင် ထိုင်းတော်ဝင်ရေတပ် (Royal Thai Navy-RTN) အနေဖြင့် ရေငုပ်သင်္ဘော တန်ပြန်တိုက်ဖျက်မှုစစ်ဆင်ရေးကို ဆောင်ရွက်နိုင်သည့် အဆင့်မြင့် ဖရီဂိတ် HTMSBhumibol Adulyadej ကို ပိုင်ဆိုင်ထားပြီးဖြစ်ပြီး နောက်ထပ်ဝယ်ယူရန်လည်း မှာကြားထားပြီးဖြစ်ပါသည်။ အဆိုးဝါးဆုံးအချက်အနေဖြင့် အစားထိုးမည့် ဖရီဂိတ်သည် RTN အသုံးပြုနေသည့် ဖရီဂိတ်များ၏ လက်နက်စနစ်များနှင့် အလွန်အမင်း ကွဲပြားနေသည့်အတွက် မေးခွန်းထုတ်စရာဖြစ်နေပါသည်။ ထို့ကြောင့် Type 054A သည် RTN ကို ရေငုပ်သင်္ဘောလောက် အထောက်အကူမပေးနိုင်မည်မဟုတ်သည်ကို တွေ့ရှိရပါသည်။ အဆိုပါ ဆုံးဖြတ်ချက်များသည် ထိုင်းအစိုးရ၏ ရေရှည်ရည်မှန်းချက်များနှင့် ပတ်သက်၍ နားလည်မှုရှုပ်ထွေးခြင်းများ ဖြစ်ပေါ်စေပါသည်။ ပြည်သူများသည်လည်း ထိုင်းအစိုးရအကြီးအကဲများ၏ ထိတွေ့ ဆက်ဆံမှု အမှားအယွင်းများနှင့်ပတ်သက်ပြီး စိတ်ပျက်နေကြပြီး အစိုးရသစ် အနေဖြင့် ပိုမိုကောင်းမွန်သည့် မဟာဗျူဟာမြောက် ထိတွေ့ဆက်ဆံမှုများ ဖော်ဆောင် နိုင်ရန် အထူးလိုအပ်နေကြောင်း ဖော်ပြထားပါသည်။

တွေ့ရှိသုံးသပ်ချက်

ထိုင်းအစိုးရသစ်၏ ရွေးကောက်ပွဲမတိုင်မီက ထောက်ပံ့ကြေးငွေနှင့် ချေးငွေ ကတိကဝတ်များသည် အမှန်တကယ်အစိုးရဖြစ်လာပြီး နိုင်ငံတော်၏ ယန္တရားများကို လည်ပတ်ရသည့်အခါတွင် ထင်သလောက်မလွယ်ကူဘဲ စိန်ခေါ်မှုများဖြင့် ရင်ဆိုင် နေရပါသည်။ ထိုင်းနိုင်ငံအတွင်း တရုတ်ရဲများနှင့် ပူးပေါင်း၍ကင်းလှည့်မည်ဆိုသည့် ကိစ္စရပ်များနှင့် ရေငုပ်သင်္ဘောကဲ့သို့သော မဟာဗျူဟာမြောက်ရေယာဉ်များကို လက်ရှိ အသုံးပြုနေသည့် လက်နက်စနစ်များနှင့် သဟဇာတမဖြစ်နိုင်သည့် အခြားတိုက်ခိုက်ရေး ရေယာဉ်များနှင့် အစားထိုးမည်ဟူသော အယူအဆများမှာ ထိုင်းအစိုးရသစ်၏ ဦးဆောင်နိုင်စွမ်းနှင့် အရည်အသွေးကို မေးခွန်းထုတ်ဖွယ်ရာများဖြစ်နေကြောင်း တွေ့ရှိရ ပါသည်။

လက်ရှိအချိန်တွင် ထိုင်းနိုင်ငံအတွင်း၌ လက်နက်ကိုင်ဆောင်၍ အကြမ်းဖက် မှုများ တစ်စထက်တစ်စတိုးပွားလာခြင်းကြောင့် ခရီးသွားလာရေးကဏ္ဍတွင် ဆုံးရှုံးမှု များရှိနေသကဲ့သို့ အစိုးရ၏ အသက် ၁၆ နှစ်နှင့် အထက် ထိုင်းနိုင်ငံသားအားလုံးကို ဘတ် ၁၀,၀၀၀ ဒီဂျစ်တယ်ငွေကြေး ထောက်ပံ့မှုအစီအစဉ်က ဘတ်ငွေတန်ဖိုးအပေါ် ရိုက်ခတ်လာပြီး ငွေကြေးတန်ဖိုးကျဆင်းမှု ဖြစ်ပေါ်လျက်ရှိပါသည်။[2] ထိုင်းနိုင်ငံသည် မြန်မာနိုင်ငံနှင့် နယ်နိမိတ်ချင်း ထိစပ်မှု ရှည်လျားသည့်အပြင် ကျားဖြန့်ငွေလိမ်ဂိုဏ်း များနှင့် လောင်းကစားအဖွဲ့များသည်လည်း ထိုင်းနှင့် မြန်မာနှစ်နိုင်ငံနယ်စပ်ရှိ ကရင် ပြည်နယ်တွင် နာမည်ဆိုးဖြင့် ကျော်ကြားနေသည့် နေရာများဖြစ်ပါသည်။[3] လက်ရှိအချိန်တွင် အတိုက်အခံအင်အားစုများ၏ ဖိအားများနှင့် စီးပွားရေးဖိအားများရင်ဆိုင်နေရသည့် ထိုင်းလက်ရှိ အစိုးရ၏ ပြုပြင်ပြောင်းလဲနိုင်စွမ်းနှင့် ဖောက်ထွက်နိုင်စွမ်းသည်ပင် လေ့လာစောင့်ကြည့်သင့်သည့် ပညာခန်းဖြစ်ပါကြောင်း သုံးသပ်ဖော်ပြလိုက်ရပါသည်။

Myanmar Aspect

161113023

[1]။ Tita Sanglee,“ It Is Time For the Thai Authorities to Step Up Their Strategic Communication”. The Diplomat. 22 November 2023, [/https://thediplomat.com/.../it-is-time-for-the-thai.../ /]

[2]။ “Fog of uncertainty over Thai digital welfare scheme sends baht plummeting.” The Nation, October 3,2023 [https://www.nationthailand.com/.../banking-finance/40031561]

၃။ BERTIL LINTNER. “A Chinatown mysteriously emerges in backwoods Myanmar.”ASIA TIMES, March 1,2019 [https://asiatimes.com/.../a-chinatown-mysteriously.../]