အစ္စရေးနိုင်ငံသည် ဟားမတ်စ်အဖွဲ့အား ထိုးစစ်ဆင်မှုကို အရှိန်အဟုန်မြှင့် လုပ်ဆောင်လာခြင်း

 

နိဒါန်း

အစ္စရေးနိုင်ငံ၏ ဟားမတ်စ်အဖွဲ့အား တိုက်ခိုက်မှုကို ဒုတိယအဆင့်သို့ မြှင့်တင် လိုက်ပြီဖြစ်ပြီး ဤအဆင့်တွင် အစ္စရေးနိုင်ငံအနေဖြင့် ၎င်းတို့ဝိုင်းပတ်ပိတ်ဆို့ ထားသည့် ဂါဇာကမ်းမြောင်ဒေသအတွင်းသို့ ဝင်ရောက်ကာ ဟားမတ်စ်အဖွဲ့အား အမြစ်ပြတ် ချေမှုန်းသုတ်သင်သွားမည်ဖြစ်ကြောင်း အစ္စရေးနိုင်ငံဝန်ကြီးချုပ် Benjamin Netanyahu ကပြောကြားခဲ့ပါသည်။[1]

ဖော်ပြချက်

အစ္စရေးနိုင်ငံသည် ဂါဇာကမ်းမြောင်ဒေသအား မြေပြင်ထိုးစစ်ဆင်မှုများ ပြုလုပ်ကာ ဟားမတ်စ်အဖွဲ့အား တိုက်ခိုက်သည့်စစ်ဆင်ရေး ဒုတိယအဆင့်ကို စတင်လိုက်ပြီ ဖြစ်သည်ဟု အစ္စရေးနိုင်ငံဝန်ကြီးချုပ် Benjamin Netanyahu က အောက်တိုဘာလ ၂၈ ရက်နေ့တွင် ပြောကြားခဲ့ပါသည်။ အစ္စရေးနိုင်ငံသည် ဟားမတ်စ်အဖွဲ့အား မြေေပါ် မြေေအာက်မကျန် ချေမှုန်းသုတ်သင်သွားမည်ဖြစ်ပြီး အစ္စရေးတပ်ဖွဲ့များသည် ဟားမတ်စ်အဖွဲ့ ထိန်းချုပ်ထားသည့် ပါလက်စတိုင်းနယ်မြေအတွင်းသို့ ဂျက်လေယာဉ်များ အသုံးပြုကာ ဗုံးကြဲခြင်းကြောင့် ဂါဇာကမ်းမြောင်ဒေသရှိပြည်သူများအနေဖြင့် ပြင်ပ ကမ္ဘာနှင့် အဆက်အသွယ်ပြတ်တောက်လျက်ရှိပါသည်။ ဟားမတ်စ်များအုပ်ချုပ်နေသည့်ပါလက်စတိုင်း နယ်မြေအတွင်း ကာလရှည်ကြာဆင်နွှဲမည့် မြေပြင်ထိုးစစ်(A Ling-Threatened Ground Offensive)အား အရှိန်အဟုန်မြှင့်ဆောင်ရွက်နေပြီ ဖြစ်သည်ဟု အစ္စရေးနိုင်ငံ၏ စစ်ဘက်ဆိုင်ရာအကြီးအကဲများက ပြောကြားခဲ့ပါသည်။

Tel Aviv မြို့၌ ကျင်းပပြုလုပ်သည့် သတင်းစာရှင်းလင်းပွဲတစ်ခုတွင် အစ္စရေးနိုင်ငံ ဝန်ကြီးချုပ် Netanyahu က ဤစစ်ပွဲသည် ရှည်လျားပြင်းထန်မည်(Long and Hard) ဖြစ်သောကြောင့် ပါလက်စတိုင်းပြည်သူများနေဖြင့် စစ်ပွဲမစတင်မီ အချိန်အတွင်း ဂါဇာကမ်းမြောင်မြောက်ပိုင်းဒေသမှ ရွှေ့ပြောင်းကြရန် ဆော်ဩထားပါသည်။ ဤစစ်ပွဲ၏ ရည်မှန်းချက်မှာ ဟားမတ်စ်အဖွဲ့၏ နယ်မြေစိုးမိုးထားရှိမှုနှင့် စစ်ရေးလှုပ်ရှားမှုများအား ချေမှုန်း၍ ဓားစာခံ ၂၀၀ ကို နေရပ်ပြန်ပို့နိုင်ရေးဖြစ်သည်ဟုဆိုသည်။ ဟားမတ်စ်အဖွဲ့၏ အောက်တိုဘာလ ၇ ရက်နေ့ အကြမ်းဖက်တိုက်ခိုက်မှုကြောင့် အစ္စရေးနိုင်ငံသား ၁,၄၀၀ သေဆုံးခဲ့ချိန်မှစ၍ အစ္စရေးတပ်ဖွဲ့သည် ဂါဇာကမ်းမြောင် ဒေသအား ပိတ်ဆို့၍ သီတင်းပတ် ၃ ပတ်ဆက်တိုက် ဗုံးကြဲမှုများ ပြုလုပ်ခဲ့ပါသည်။ ဤကိစ္စနှင့်ပတ်သက်၍ ကနဦးတွင် အနောက်နိုင်ငံများသည် အစ္စရေးနိုင်ငံဘက်မှရပ်တည် ခဲ့ကြသော်လည်း နောက်ပိုင်းတွင် ဗုံးကြဲတိုက်ခိုက်မှုကြောင့် သေဆုံးသူများပြားလာသဖြင့် နိုင်ငံတကာ၏ စိုးရိမ်ပူပန်မှုများ မြင့်တက်လာခဲ့ပါသည်။ ထို့ကြောင့် ဂါဇာကမ်းမြောင် ဒေသရှိ အရပ်သားများအား အကူအညီပေးနိုင်ရန် ဗုံးကြဲတိုက်ခိုက်မှုကို ခေတ္တရပ်နားပေးရေးအစ္စရေးနိုင်ငံအား တောင်းဆိုခဲ့ကြပါသည်။

ဂါဇာကမ်းမြောင်ဒေသရှိ ပြည်သူ ၂.၃ သန်းကို ကျန်းမာရေးစောင့်ရှောက်မှု ပြုလုပ်ပေးလျက်ရှိသည့် ဟားမတ်စ်အဖွဲ့ ကျန်းမာရေးဝန်ကြီးဌာန၏ ပြောကြားချက် အရ အစ္စရေးနိုင်ငံ၏ စစ်ဆင်မှုကြောင့် ပါလက်စတိုင်း အရပ်သား ၇,၆၅၀ ဦး သေဆုံး ခဲ့သည်ဟုဆိုသည်။ တိုက်ခိုက်မှုကြောင့် အိုးအိမ်များ ပျက်စီးဆုံးရှုံးခဲ့ရပြီး အစားအစာ၊ ရေ၊ လောင်စာနှင့် ဆေးဝါးများ ရှားပါးလျက်ရှိပါသည်။ အောက်တိုဘာလ ၂၇ ရက်နေ့ ညပိုင်းဗုံးကြဲခံရပြီးနောက်တွင် ဖုန်းနှင့်အင်တာနက် ဆက်သွယ်ရေးဝန်ဆောင်မှုများ ပြတ်တောက်ကာ အခြေအနေပိုမိုဆိုးရွားခဲ့ပါသည်။ ဂါဇာဒေသသို့ ရောက်ရှိနေသည့် သတင်းထောက်တစ်ဦး၏ ပြောကြားချက်အရ အစ္စရေးနှင့် ပါလက်စတိုင်းအဖွဲ့တို့၏ အပြန်အလှန်ပစ်ခတ်မှုများကြောင့် အရပ်သားများ ထိခိုက်မှုရှိပြီး ဆက်သွယ်ရေးနှင့် လောင်စာဆီ ပြတ်တောက်မှုများကြောင့် အရေးပေါ်ကယ်ဆယ်ရေးအဖွဲ့များ ခေါ်ယူရန် အခက်အခဲများ ဖြစ်ပေါ်လျက်ရှိပါသည်။ အစ္စရေးတပ်ဖွဲ့သည် ဟားမတ်စ်အဖွဲ့ အသုံးပြု နေသည့် ဥမင်လိုဏ်ခေါင်းများနှင့် အခြားအခြေခံအဆောက်အဦများကို ပစ်မှတ်ထား တိုက်ခိုက်လျက်ရှိပါသည်။ အစ္စရေးကာကွယ်ရေးဝန်ကြီး Yoav Gallant က အစ္စရေးတပ်ဖွဲ့များ အနေဖြင့် ဟားမတ်စ်အဖွဲ့ကိုသာ ပစ်မှတ်ထားတိုက်ခိုက်ခြင်းဖြစ်ပြီး ၎င်းတို့ အနေဖြင့် ဂါဇာမြောက်ပိုင်းရှိ အရပ်သားနေအိမ်အဆောက်အဦများတွင် ပုန်းခိုနေကြ သောကြောင့် ဒေသခံများအား တောင်ပိုင်းသို့ ရွှေ့ပြောင်းရန် တိုက်တွန်းပြောကြားခဲ့ပါသည်။ သို့သော်လည်း တောင်ပိုင်းဒေသသည်လည်း လူနေထူထပ်ပြီး နေအိမ်များဗုံးကြဲခံနေရ သောကြောင့် လုံခြုံမှုမရှိဟု ပါလက်စတိုင်းဒေသခံတို့က ပြောကြားထားပါသည်။ ကုလသမဂ္ဂအထွေထွေအတွင်းရေးမှူးချုပ် Antonio Guterres သည် ဂါဇာဒေသအား လူသားချင်းစာနာထောက်ထားမှုဆိုင်ရာ အကူအညီများပေးအပ်နိုင်ရန် နိုင်ငံတကာသို့ တိုက်တွန်းပြောကြားခဲ့ပါသည်။

ကမ္ဘာလုံးဆိုင်ရာ အကူအညီပေးရေးအေဂျင်စီများက ယခုအချိန်တွင် ဂါဇာ ဒေသသို့ရောက်ရှိနေသည့် ၎င်းတို့၏ဝန်ထမ်းအများစုနှင့် အဆက်အသွယ် ပြတ်တောက် လျက်ရှိပါသည်။ ဂါဇာဒေသရှိအပြည်ပြည်ဆိုင်ရာ ကြက်ခြေနီနှင့် လခြမ်းနီအဖွဲ့၏ ပြောကြားချက်အရ ၎င်းတို့စေတနာ့ဝန်ထမ်းများသည် အချိန်ပြည့် အလုပ်လုပ်နေရပြီး Starlink ဂြိုဟ်တုကွန်ရက်ပိုင်ရှင် Elon Musk ကလည်း ဂါဇာကမ်းမြောင်ဒေသရှိ နိုင်ငံတကာအသိအမှတ်ပြု အကူအညီပေးအဖွဲ့အစည်းများ ဆက်သွယ်မှုပြုလုပ်နိုင်ရန် ၎င်း၏ဂြိုဟ်တုကွန်ရက်အသုံးပြုခွင့်ပေးခဲ့ပါသည်။ ဟားမတ်စ် အဖွဲ့သည် ဂါဇာဒေသရှိ ဓားစာခံ ၂၀၀ ကျော်ကို ပြန်လွှတ်ပေးရေးနှင့် ပတ်သက်၍ အစ္စရေးနိုင်ငံနှင့် သဘောတူညီမှုပြုလုပ်ရန် နီးစပ်ပြီဖြစ်သော်လည်း အစ္စရေးနိုင်ငံသည် ဤသဘောတူညီချက်ကို နှောင့်နှေးအောင် ပြုလုပ်နေသည်ဟု အောက်တိုဘာလ ၂၈ ရက်နေ့တွင် ပြောကြားခဲ့ပါသည်။ သို့သော်လည်း အစ္စရေးစစ်တပ်၏ ပြောရေးဆိုခွင့်ရှိသူက ဟားမတ်စ်အဖွဲ့သည် လူထုအမြင်ကို လှည့်ဖြားရန် ကြိုးပမ်းနေခြင်းသာ ဖြစ်သည်ဟုပြောကြားပြီး အဆိုပါသတင်းများကို ပယ်ချခဲ့ပါသည်။ အစ္စရေးနိုင်ငံ ဝန်ကြီးချုပ် Netanyahu က ဂါဇာဒေသတွင် မြေပြင်ထိုးစစ်ဆင်မှုနှင့်အတူ ဓားစာခံများ လွတ်မြောက်ရေးကိုလည်း ဆောင်ရွက်သွားမည်ဟုဆိုပါသည်။

ဂါဇာကမ်းမြောင်ဒေသရှိ အစ္စရေးနှင့် ဟားမတ်စ်အဖွဲ့တို့အကြား တိုက်ပွဲများ အရှိန်လျော့သွားစေရန် ကာတာနိုင်ငံသည် ကြားဝင်ညှိနှိုင်းဆွေးနွေးမှုများကို အောက်တိုဘာလ ၂၈​ ရက်နေ့မှစ၍ လုပ်ဆောင်ပေးခဲ့သော်လည်း အရာမထင်ခဲ့ပါ။ အစ္စရေးအဖွဲ့သည် အောက်တိုဘာလ ၇ ရက်တိုက်ခိုက်မှုတွင် အဓိကကျသည့် ဟားမတ်စ်အဖွဲ့၏ ခေါင်းဆောင် တစ်ဦးဖြစ်သူ Asem Abu Rakaba ကို လေကြောင်းမှတိုက်ခိုက်သတ်ဖြတ်ခဲ့ပါသည်။ ထို့ပြင် ဟားမတ်စ်အဖွဲ့ဝင်များအား ချေမှုန်းနိုင်ရန် ဥမင်လိုဏ်ခေါင်းများ၊ တိုက်ပွဲအတွက် အသုံးပြုသည့် မြေအောက်နေရာများနှင့် အခြားအခြေခံအဆောက်အဦများအပါအဝင် ဂါဇာမြောက်ပိုင်းဒေသရှိ ပစ်မှတ် ၁၅၀ ကို လေကြောင်းမှတိုက်ခိုက်ခဲ့ပါသည်။

ဟားမတ်စ်အဖွဲ့မှ Al-Qassam တပ်မဟာသည် ဂါဇာကမ်းမြောင်ဒေသ အရှေ့မြောက်ပိုင်းရှိ Beit Hanoun မြို့နှင့် Al-Bureij မြို့ အလယ်ပိုင်းတွင် အစ္စရေး တပ်များကို တိုက်ခိုက်လျက်ရှိပါသည်။ ၎င်းတပ်မဟာနှင့် ပါလက်စတိုင်း ခုခံရေးတပ်ဖွဲ့ များသည် အစ္စရေးတပ်ဖွဲ့များ၏ ကျုးကျော်မှုများကို အင်အားအပြည့်ဖြင့် ရင်ဆိုင် ဟန့်တားနိုင်ရန် ပြင်ဆင်ထားပါသည်။ ပါလက်စတိုင်းဒေသရှိ ပဋိပက္ခကျယ်ပြန့် လာမည်ကို စိုးရိမ်သောကြောင့် မြေပြင်ထိုးစစ်အား ရပ်တန့်ရန် အမေရိကန်နိုင်ငံနှင့် အခြားသောအနောက်နိုင်ငံများက အစ္စရေးနိုင်ငံကို တိုက်တွန်းထားပါသည်။ ဟားမတ်စ် အဖွဲ့သည် လက်ဘနွန်၊ ဆီးရီးယား၊ အီရတ်နှင့် ယီမင်နိုင်ငံတို့ရှိ လက်နက်ကိုင်များအား ထောက်ပံ့ပေးနေသည့် အီရန်နိုင်ငံကို မှီခိုအားထားလျက်ရှိပြီး အီရတ်နှင့် ဆီးရီးယား နိုင်ငံတို့ရှိ အမေရိကန်တပ်ဖွဲ့ဝင်များသည်လည်း အီရန်နိုင်ငံ ကျောထောက်နောက်ခံ ပြုထားသည့်အဖွဲ့များ၏ တိုက်ခိုက်မှုကိုခံခဲ့ရပါသည်။ ထို့ကြောင့် အမေရိကန်နိုင်ငံသည် အစ္စရေးနိုင်ငံသို့ စစ်ဘက်ဆိုင်ရာအကူအညီများ ပိုမိုပေးအပ်ခဲ့ခြင်းဖြစ်သည်ဟု ဆိုပါသည်။

အစ္စရေးနိုင်ငံအနေဖြင့် ဂါဇာဒေသမှကျော်လွန်၍ စစ်ဘောင်ချဲ့ရန် မလိုလား သော်လည်း ဘက်ပေါင်းစုံမှ ပြင်ဆင်ထားသည်ဟု အစ္စရေးနိုင်ငံကာကွယ်ရေးဝန်ကြီး Yoav Gallant မှ ပြောကြားခဲ့ပါသည်။ အစ္စရေးစစ်တပ်သည် အောက်တိုဘာလ ၂၈ ရက်နေ့တွင် လက်ဘနွန်နိုင်ငံနှင့် နယ်စပ်တိုက်ပွဲဖြစ်ပွားခဲ့ပြီး ၎င်းတိုက်ပွဲသည် ၂၀၀၆ ခုနှစ်၊ နှစ်နိုင်ငံနယ်စပ်တိုက်ပွဲပြီးနောက် ပြန်လည်ဖြစ်ပွားသည့် အပြင်းထန်ဆုံး တိုက်ပွဲဖြစ်ပါသည်။ အောက်တိုဘာလ ၂၈ ရက်နေ့တွင်လည်း ဥရောပ၊ အရှေ့အလယ်ပိုင်းနှင့် အာရှဒေသတစ်ဝိုက်ရှိ မြို့ကြီးများတွင် ပါလက်စတိုင်း လိုလားသူများ ထောင်နှင့်ချီ၍ ဆန္ဒပြခဲ့ကြသည်။ လန်ဒန်မြို့ရှိ ဆန္ဒပြပွဲအား ဦးဆောင်သူ Camille Revuelta က ဤဆန္ဒပြမှုသည် ဟားမတ်စ်အဖွဲ့အား ထောက်ခံခြင်းမဟုတ်ဘဲ ပါလက်စတိုင်း ပြည်သူ များ၏ အသက်အိုးအိမ်ကို အကာအကွယ်ပေးရေးအတွက်သာဖြစ်သည်ဟု ပြောကြားခဲ့ပါသည်။

တွေ့ရှိသုံးသပ်ချက်

အစ္စရေးနိုင်ငံဝန်ကြီးချုပ် Benjamin Netanyahuသည် ဟားမတ်စ်အဖွဲ့အား ထိုးစစ်ဆင်မှုကို အဆင့်မြှင်တင်လိုက်ပြီဖြစ်ကြောင်းနှင့် ဂါဇာကမ်းမြောင်ဒေသအတွင်းသို့ ဝင်ရောက်ကာ ဟားမတ်စ်အဖွဲ့အား မြေပြင်ထိုးစစ်ဆင်မှုများပြုလုပ်၍ မြေပေါ်မြေအောက်ပါ မကျန် အမြစ်ပြတ်ချေမှုန်း သုတ်သင်သွားမည်ဟု ကြေညာခဲ့သည်ကို တွေ့ရှိရပါသည်။ ထိုသို့ ဂါဇာဒေသအတွင်း အစ္စရေးတပ်များ ဝင်ရောက်၍ စစ်ဘောင်ချဲ့မည့်ကိစ္စသည်ပင် ဟားမတ်စ်များဘက်မှ လိုလားသည့် ကိစ္စရပ်တစ်ခုဖြစ်ပြီး ၎င်းတို့ကျွမ်းကျင်သည့် နယ်မြေအတွင်းသို့ ဝင်ရောက်လာမည့် အစ္စရေးတပ်ဖွဲ့ဝင်များကို မြေအောက်ဥမင်များ၊ ပြောက်ကျားနည်းများအသုံးပြု၍ စစ်ဆင်နိုင်မည်ဖြစ်ပါသည်။ ဤစစ်နည်းဗျူဟာသည် ရေရှည်တွင် အစ္စရေးတပ်ဖွဲ့ဝင်များအား အထိနာစေပြီး ဆုံးရှုံးမှုများလာခြင်းကြောင့် ၂၀၀၃ ခုနှစ်တွင် ဂါဇာဒေသမှ အစ္စရေးတပ်များ ပြန်လည်ဆုတ်ခွာလာခဲ့ပြီးဖြစ်ပါသည်။ ထို့ကြောင့်လည်း အစ္စရေးနိုင်ငံအနေဖြင့် ဂါဇာဒေသအတွင်းသို့ နောက်တစ်ကြိမ် ထပ်မံဝင်ရောက်ရန် ဂရုတစိုက်ချိန်ဆနေဟန်ရှိပြီး လက်တွေ့ဝင်ရောက်တိုက်ခိုက်မှုများ ကိုလည်း အကန့်အသတ်ဖြင့်သာဆောင်ရွက်နေပြီး လေကြောင်းမှ ဗုံးကြဲတိုက်ခိုက်ခြင်းကိုသာ အားထားနေဆဲဖြစ်သည်ဟု ယူဆနိုင်ပါသည်။

ထိုသို့ အစ္စရေးတပ်ဖွဲ့ဝင်များ ဂါဇာဒေသသို့ ဝင်ရောက်မည့် အချိန်သည် အာရပ်ဒေသအတွင်းရှိ အခြားသောအစ္စရေးမလိုလားသည့် Hezbollah ကဲ့သို့သော လက်နက်ကိုင်အဖွဲ့များစောင့်ဆိုင်းနေသည့် အချိန်လည်းဖြစ်ပြီး စစ်အင်အားလျော့ပါးသွားမည့် အစ္စရေးအတွင်းပိုင်းဒေသများကို အချိန်ကိုက်တိုက်ခိုက်မှုများ ဆောင်ရွက်လာနိုင်ပါသည်။ ထို့ကြောင့်လည်း မစ်ဇိုင်း ၁၅၀,၀၀၀ ကျော် ပိုင်ဆိုင်ထားသည့် Hezbollah အဖွဲ့များ စစ်အတွင်းသို့ တိုက်ရိုက်ဝင်ရောက်လာပြီဆိုပါက အစ္စရေးနိုင်ငံအား အဓိကအကူအညီပေးနေသည့် အမေရိကန်နိုင်ငံသည်ပင် အင်ဒို-ပစိဖိတ်ဒေသတွင်းရှိ တရုတ်နိုင်ငံ၏ ထိုင်ဝမ်အား ကျူးကျော်လာနိုင်မှုကို ကာကွယ်မည်လော၊ အစ္စရေးနိုင်ငံအား အလုံးစုံထောက်ပံ့ပေးမည်လောဟူသည့် မဟာဗျူဟာရွေးချယ်မှု ဆောင်ရွက်ရမည်ဟု သုံးသပ်ချက်များလည်း ထွက်ပေါ်လျက်ရှိပါသည်။[2]

ဆယ်စုနှစ်များစွာဖြစ်ပွားခဲ့သည် အစ္စရေး-ပါလက်စတိုင်း ပဋိပက္ခသည် ယခု အချိန်တွင် ကမ္ဘာတစ်ခုလုံးသို့ ပျံ့နှံ့လျက်ရှိပြီး ဘာသာရေးဆိုင်ရာ စစ်ပွဲအဖြစ်သို့ မရောက်ရှိအောင် ထိန်းသိမ်းဆောင်ရွက်လျက်ရှိကြသော်လည်း ထိန်းချုပ်နိုင်မည့် အခြေအနေ နည်းပါးနေသည်ဟု ယူဆရပါသည်။ အမေရိကန်နိုင်ငံအနေဖြင့်လည်း အီရတ်နှင့် ဆီးရီးယားနိုင်ငံတို့တွင် ပါလက်စတိုင်းအုပ်စုအား ထောက်ခံအားပေးသည့် အီရန်နိုင်ငံ ကျောထောက်နောက်ခံပြုအဖွဲ့များ၏ တိုက်ခိုက်မှုကိုခံခဲ့ရပြီး စစ်ပွဲအတွင်းသို့ မရောက် ရောက်အောင် တွန်းအားပေးခြင်းခံနေရပြီး ယခုဖြစ်ပွားနေသည့် စစ်ပွဲအား ဂါဇာဒေသအတွင်း မှာပင် အကန့်အသတ်ဖြင့်ဆောင်ရွက်ရန် ခက်ခဲလျက်ရှိပါသည်။ ထိုအခြေအနေသည်အစ္စရေးတပ်များ ဂါဇာဒေသအတွင်းသို့ အလုံးအရင်းနှင့် ဝင်ရောက်လာပါက ပိုမို ဆိုးရွားလာမည်ဖြစ်ကြောင်း အစ္စရေး-ဟားမတ်စ် စစ်ပွဲအခြေအနေအား သုံးသပ်ဖော်ပြလိုက်ပါသည်။

Myanmar Aspect

145110723

[1]။ “Israel Enters 'Second Stage' Of War with Gaza Ground Assault”. Nikkei Asia. 28 October 2023, [/https://asia.nikkei.com/.../Israel-enters-second-stage.../]

[2]။ Ken Moriyasu,“Hezbollah Entry Into War Would Mean Taiwan Trade-Off, U.S. Analysts Say”. Nikkei Asia. 31 October 2023, [/https://asia.nikkei.com/.../Hezbollah-entry-into-war.../]