Al-Aqsa Storm မှ တောင်အာရှဒေသအတွက် ရရှိနိုင်သော စစ်ရေးဆိုင်ရာ သင်ခန်းစာများနှင့်ပတ်သက်ပြီး ဘာတွေသိထားသင့်သလဲ

 

နိဒါန်း

တောင်အာရှဒေသတွင်း နိုင်ငံများအနေဖြင့် အစ္စရေး-ပါလက်စတိုင်း စစ်ရေး ပဋိပက္ခကို သင်ခန်းစာယူမည်ဆိုပါက ကာကွယ်ရေးဆိုင်ရာကိစ္စရပ်များတွင် နည်းပညာမြင့် စစ်လက်နက်ပစ္စည်းများ ပိုင်ဆိုင်ထားမှု၊ အသုံးပြုမှုတွင်လည်း ကန့်သတ်ချက်များရှိနေပြီး လူသားများ၏ ဉာဏ်စွမ်းရည်ကို အသုံးချနိုင်မှုမှာ အရေးပါလာသည့် အချက်များအား သုံးသပ်ဖော်ပြသွားပါမည်။[1]

ဖော်ပြချက်

လက်ရှိအချိန်တွင် အစ္စရေး-ပါလက်စတိုင်း စစ်ရေးပဋိပက္ခနှင့် ပတ်သက်သည့် လုံခြုံရေးရှုထောင့်သည် လွန်ခဲ့သည့် တစ်ပတ်ကျော်ကစ၍ ပြောင်းလဲလာခဲ့ပါသည်။ Al-Aqsa Strom ဟု အမည်ရသည့် ဟားမက်စ်အဖွဲ့၏ အစ္စရေးနိုင်ငံနယ်မြေအတွင်း တိုက်ခိုက်မှုက စစ်ရေးယူဆချက်နှင့် သီအိုရီများ မှားယွင်းနေသည်ကို ပြသနေပြီး ကာကွယ်ရေးဆိုင်ရာလေ့လာသုံးသပ်သူများအား ၎င်းတို့၏ ရပ်တည်ချက်နှင့်ပတ်သက်၍ ပြန်လည်သုံးသပ်ရန် ဖိအားတစ်ရပ်ဖြစ်လာစေပါသည်။ အစ္စရေးနိုင်ငံဘက်မှ တုံ့ပြန်မှုများ မည်သို့ပင်အောင်မြင်၊ ကျယ်ပြန့်စေကာမူ ဟားမက်စ်အဖွဲ့၏ တိုက်ခိုက်မှုသည် ကြီးမား၊ အင်အားတောင့်တင်းပြီး နည်းပညာမြင့်မားသည့် တရားဝင်စစ်တပ်တစ်ခုကို နည်းပညာနိမ့် (Low-Tech) လက်နက်များအသုံးပြု၍ နယ်စပ်ဖြတ်ကျော် တိုက်ခိုက်နိုင်ခဲ့သည့် ဖြစ်ရပ်များ ထဲမှ အအောင်မြင်ဆုံးတစ်ခုဖြစ်လာခဲ့ပါသည်။ အထက်ပါဖြစ်ရပ်မှ တွေ့ရှိရသည့် စစ်ရေး ဆိုင်ရာသင်ခန်းစာများကို အထူးသဖြင့် သောင်းကျန်းသူများနှင့် နယ်စပ်ဖြတ်ကျော် တင်းမာမှုများဖြင့် ဆယ်စုနှစ်များစွာ ကြုံတွေ့ခဲ့ရသည့် တောင်အာရှဒေသအနေဖြင့် လေ့လာထားရန် လိုအပ်ကြောင်း ဖော်ပြထားပါသည်။

ပထမအချက်အနေဖြင့် နည်းပညာမြင့်(High-Tech) လက်နက်များ အသုံးပြု ဖြေရှင်းရာတွင် ကန့်သတ်ချက်များရှိနေပါသည်။ ဟားမက်စ်အဖွဲ့သည် အစ္စရေး Iron Drome စနစ်(ဒုံးကျည်ကာကွယ်ရေးဒုံးခွင်းဒုံးစနစ်)များ၏ Saturation Point (ပြင်ပဒုံး စနစ်များကို ကြားဖြတ်ထောက်လှမ်းနိုင်သည့်အမှတ်)ကို ကျော်လွှားနိုင်ရန် နိုင်ငံအတွင်းသို့ ဒုံးကျည်များဖြင့် တရပ်စပ်ပစ်ခတ်မှုများကို နှစ်ပေါင်းများစွာ ပြုလုပ် ခဲ့ပါသည်။ ၂၀၂၁ ခုနှစ်အတွင်းက ဟားမက်စ်အဖွဲ့သည် အစ္စရေးနိုင်ငံအတွင်းသို့ ၃ ရက်အတွင်း ဒုံးအစင်းပေါင်း ၁,၅၀၀၀ ကျော် ပစ်လွှတ်ခဲ့ပြီး အများစုကို Iron Dromeစနစ်ဖြင့် ကြားဖြတ်ဖျက်ဆီးနိုင်ခဲ့ပါသည်။ အောက်တိုဘာလ ၇ ရက်နေ့တွင် ဖြစ်ပွား ခဲ့သည့် တိုက်ခိုက်မှုတွင် အစ္စရေးနိုင်ငံနယ်မြေအတွင်းသို့ မိနစ် ၂၀ အတွင်း ဒုံးအရေအတွက် ၅,၀၀၀ ဖြင့် ပစ်ခတ်တိုက်ခိုက်ခဲ့ပါသည်။ အဆိုပါတိုက်ခိုက်မှုကို အစ္စရေးနိုင်ငံဘက်မှ ငွေကြေးအကုန်အကျများသည့် ဒုံးများဖြင့် ပြန်လည်တုံ့ပြန်ခဲ့ရပါသည်။

ဟားမက်စ်ဘက်မှ ပစ်လွှတ်သည့် ဒုံးတစ်စင်းသည် ပျမ်းမျှအားဖြင့် အမေရိကန် ဒေါ်လာ ၆၀၀ ခန့်သာကုန်ကျပြီး အစ္စရေးနိုင်ငံ၏ Iron Drome စနစ်မှ တန်ပြန်ပစ်လွှတ်သည့် ဒုံးတစ်စင်းလျှင် အမေရိကန်ဒေါ်လာ ၆၀,၀၀၀ အထိ ကုန်ကျနိုင်ပါသည်။ ထိုသို့ ကုန်ကျစရိတ် အဆ ၁၀၀ ကွာဟနေခြင်းသည် အဓိကပြဿနာဖြစ်လာခဲ့ပါသည်။ အစ္စရေးနိုင်ငံအသုံးပြုသည့် Iron Drome စနစ်သည် ယခင်က ဒုံးပမာဏအမြောက်အမြားကို ခုခံခဲ့ဖူးခြင်းမရှိဘဲ ဒုံးကျည်များ ပြန်လည်တပ်ဆင်ရာတွင် အချိန်ယူရပါသည်။ ယခုဖြစ်ပွားခဲ့သည့်တိုက်ခိုက်မှုသည် မည်သည့် နောက်ဆုံးပေါ် လေကြောင်းရန်ကာကွယ်ရေးစနစ် တပ်ဆင်ထားနိုင်သည့် မည်သည့်နိုင်ငံမဆို ဒုံးအစင်းပေါင်း ၅,၀၀၀ ခန့်ဖြင့် ရုတ်တရက်တိုက်ခိုက်မှုအား ခုခံ နိုင်မည်မဟုတ်သည်ကို ပြသနေပါသည်။ ယခုဖြစ်စဉ်တွင် ဟားမက်စ်အဖွဲ့သည် အစ္စရေးနိုင်ငံကို တိုက်ခိုက်ရန် အမေရိကန်ဒေါ်လာ ၃ သန်းခန့်သာ ကုန်ကျခဲ့ပြီးအစ္စရေးနိုင်ငံသည် ပြန်လည်ကာကွယ်မှုများအတွက် အမေရိကန်ဒေါ်လာသန်း ၃၀၀ ခန့် ကုန်ကျခဲ့ရပါသည်။ ထို့ကြောင့် အဆင့်မြင့် လက်နက် နည်းပညာများတွင်လည်း အကန့်အသတ်များရှိနေပြီး မည်မျှပင်အဆင့်မြင့် ကုန်ကျ စရိတ်များသည့် နည်းပညာဖြစ်စေကာမူ အားနည်းချက်တချို့ရှိနေနိုင်ပါသည်။ တစ်ဖက် ရန်သူအနေဖြင့် အဆိုပါအချက်ကို နားလည်ထားသည့်အခါတွင် မိမိအားကုန်ကျစရိတ်အနည်းဆုံးဖြင့် တိုက်ခိုက်လာနိုင်သည်ကို သတိပြုရမည်ဖြစ်ပါသည်။

ဒုတိယအချက်အနေဖြင့် အစ္စရေးနိုင်ငံ၏ စုံစမ်းထောက်လှမ်းရေး ပြုလုပ် နိုင်စွမ်း၊ သို့မဟုတ် တွေးခေါ်နိုင်စွမ်း ကျဆင်းသွားခဲ့ခြင်းကို မေးခွန်းထုတ်ဖွယ်ရာဖြစ်ပါသည်။ လက်ရှိအချိန်တွင် အစ္စရေးနိုင်ငံအတွက် အစိုးရိမ်ရဆုံးအချက်မှာ ဒုံးကျည်များကို တားမြစ် နိုင်ရေးမဟုတ်ဘဲ ဟားမက်စ်အဖွဲ့များ နိုင်ငံအတွင်းသို့ ကျူးကျော်ဝင်ရောက်လာ နိုင်သည့် လုံခြုံရေးကျိုးပေါက်မှု ဖြစ်နေခြင်း ဖြစ်ပါသည်။ ဟားမက်စ်အဖွဲ့၏ လက်နက်ကိုင် တိုက်ခိုက်ရေးသမားများ အစ္စရေးနိုင်ငံအတွင်းကို လေကြောင်း၊ ရေကြောင်းနှင့် မြေပြင်မှ နည်းလမ်းအမျိုးမျိုးဖြင့် ဝင်ရောက်နိုင်ခဲ့ခြင်းက အစ္စရေးနိုင်ငံ၏ အကြမ်းဖက်တန်ပြန်တိုက်ခိုက်ရေး အခြေခံ ယူဆချက်အချို့ မှားယွင်းနေသည်ကို ပြသနေခဲ့ပါသည်။ အစ္စရေးကာကွယ်ရေးစနစ်များကရေကြောင်းနှင့် လေကြောင်းမှ(Gliding and Sailing) လက်နက်ကိုင်အများအပြား ဝင်ရောက်လာမှုကို စုံစမ်းထောက်လှမ်းနိုင်ခဲ့ပါက ယခုကဲ့သို့ ရုတ်တရက်တိုက်ခိုက်ခံရမှု မဖြစ်ပွားနိုင်မည်မဟုတ်ပါ။ သို့သော်လည်း ယခုအခါ အားနည်းချက်များရှိနေခြင်းကြောင့် တစ်ဖက်က မမျှော်လင့်ထားသည့် နည်းပညာနိမ့်တိုက်ခိုက်မှုပုံစံဖြင့် အောင်မြင်မှုများကို ဖြစ်ပေါ်စေခဲ့ခြင်း ဖြစ်ပါသည်။ ထို့ပြင် ဟားမက်စ်အဖွဲ့၏ တိုက်ခိုက်မှုက စုံစမ်းထောက်လှမ်းရေး၏ ကြီးမားသည့် ချို့ယွင်းချက်ကြောင့်ဟု ဆိုနိုင်သော်လည်း ပို၍ အရေးကြီးသည့်အချက်မှာ တွေးခေါ်နိုင်စွမ်း ကျဆင်းခဲ့သည်ဆိုသည့်အချက်ဖြစ်သည်ဟု ဖော်ပြထားပါသည်။

စစ်ဘက်ဆိုင်ရာ အတွေးအခေါ်ပညာရှင်တစ်ဦးဖြစ်သည့် Carl von Clausewitz က သီအိုရီနှင့် မူဝါဒများထက် လူသားများ၏ ရဲဝံ့စွန့်စားမှုနှင့် တွေးခေါ်နိုင်စွမ်း စွမ်းရည် များကို အသားပေးဖော်ပြလေ့ရှိပါသည်။ အစ္စရေး-ဟားမက်စ် ပဋိပက္ခတွင် ၎င်းယူဆချက်ကို လက်တွေ့မြင်ခဲ့ကြရပြီးဖြစ်ပြီး တောင်အာရှဒေသတွင်းနိုင်ငံများအတွက်လည်း နောင်တွင်ဖြစ်ပေါ်လာနိုင်သည့် ခြိမ်းခြောက်မှုများကို ကိုင်တွယ်ဖြေရှင်းရာတွင် ပြန်လည် သုံးသပ်ရမည့် သင်ခန်းစာတစ်ရပ်ဖြစ်ပါသည်။ တောင်အာရှဒေသသည် ကမ္ဘာပေါ်တွင် နယ်မြေပိုင်ဆိုင်မှု အငြင်းပွားသည့်ကိစ္စများ အပြင်းထန်ဆုံးဖြစ်ပွားလေ့ရှိသည့် ဒေသဖြစ်ပြီး နိုင်ငံတစ်နိုင်ငံစီတွင် သောင်းကျန်းသူများကို ကြားခံအဖြစ် မွေးမြူထားသည်ဟုလည်း စွပ်စွဲမှုများ ရှိနေပါသည်။ ထို့ကြောင့် အဆိုပါဒေသတွင် လက်နက်ကိုင်သောင်းကျန်းသူများ၏ တခြားတစ်နိုင်ငံအတွင်း ဝင်ရောက်တိုက်ခိုက်မှုများကို ကြိုတင်မသိမြင်နိုင်သကဲ့သို့ ရှောင်လွှဲ၍လည်းရမည်မဟုတ်ကြောင်း ဖော်ပြထားပါသည်။

တတိယအချက်အနေဖြင့် နယ်စပ်များတွင် အခြေချနေထိုင်မှုများနှင့်ပတ်သက်၍ မကြာသေးမီနှစ်များအတွင်းက အိန္ဒိယနှင့် တရုတ်နိုင်ငံတို့သည် တောင်အာရှဒေသရှိ ၎င်းတို့၏ အငြင်းပွားနယ်နိမိတ်များတွင် အခြေချနေထိုင်မှုနှင့် ပတ်သက်ပြီး အပြန်အလှန်စွပ်စွဲခဲ့ကြပါသည်။ အများစုက အဆိုပါပြဿနာသည် ရေရှည် လုံခြုံရေးအတွက် ပြဿနာဖြစ်ပေါ်စေနိုင်သည်ဟု ယူဆခဲ့ကြပြီး မကြာသေးမီက ဖြစ်ပွားခဲ့သည့် ဟားမက်စ်အဖွဲ့၏တိုက်ခိုက်မှုသည် ထိခိုက်လွယ်သည့် အရပ်သားများကို အဓိကခြိမ်းခြောက်မှုတစ်ရပ်ဖြစ်ခဲ့ပါသည်။ အစ္စရေးနိုင်ငံသည်လည်း မကြာသေးမီ နှစ်များအတွင်းက နယ်မြေကျုးကျော်မှုနှင့် လူမျိုးစုအခြေချနေထိုင်ရေးမဟာဗျူဟာကို လုပ်ဆောင်ခဲ့ပါသည် (အထူးသဖြင့် West Bank တွင် လုပ်ဆောင်ခဲ့)။ ယခုနှစ်အစောပိုင်းတွင် ကုလသမဂ္ဂက ထုတ်ပြန်သည့် အစီရင်ခံစာတွင် ဆီးရီးယား၊ ဂိုလန်၌ အခြေချနေထိုင်မှုများ နှစ်ဆတိုးမြှင့်ရန် စီစဉ်နေပြီး ၎င်းနေရာတွင် အခြေချနေထိုင်သူ ၇၀၀,၀၀၀ ခန့်ရှိနေပြီ ဖြစ်သည်ဟု ဖော်ပြထားပါသည်။ အစ္စရေးနိုင်ငံဘက်က အဆိုပါအခြေချနေထိုင်မှုများသည် ငြိမ်းချမ်းရေး တည်တံ့ခိုင်မြဲမှုအတွက်ဖြစ်ပြီး ၎င်းတို့သည် ကျူးကျော်မှုများကို ရှေ့တန်းမှကာကွယ်ပေးမည့်သူများဖြစ်သည်ဟု အကြောင်းပြလေ့ရှိကြောင်း‌ဖော်ပြထားပါသည်။

သို့သော် Al-Aqsa Strom တိုက်ခိုက်မှုက အဆိုပါအယူအဆကို အကြီးအကျယ် ထိခိုက်စေခဲ့ပါသည်။ အဆိုပါဒေသတွင်နေထိုင်သည့် အရပ်သားများက အားနည်းချက် တစ်ရပ် ဖြစ်လာခဲ့ပြီး အစ္စရေးနိုင်ငံတောင်ပိုင်းတွင် နေထိုင်သည့် ပြည်သူများနှင့် လာရောက်လည်ပတ်သူများသည် ဟားမက်စ်အဖွဲ့၏ တိုက်ခိုက်မှုအတွင်း ထိတ်လန့်ဖွယ် ဖြစ်ရပ်အမျိုးမျိုးဖြင့် ကြုံတွေ့ခဲ့ရပါသည်။ တိုက်ခိုက်မှုများသည် ဂါဇာမှ စတင်ခဲ့ခြင်း ဖြစ်သော်လည်း အရပ်သားထိခိုက်မှုသည် ပြောင်းလဲသွားခြင်းမရှိဘဲ မငြိမ်မသက်မှု ဖြစ်ပွားနေသည့် နေရာများတွင် အရပ်သားများ နေထိုင်မှုများလေ ထိခိုက်သေဆုံးမှု များလေဖြစ်ပါသည်။ အဆိုပါအချက်သည် တောင်အာရှဒေသတွင်းနိုင်ငံများကို အစ္စရေး နိုင်ငံကပေးသည့် အရေးပါသော သင်ခန်းစာဖြစ်ပြီး ငြိမ်းချမ်းနေသည့်အချိန်တွင် အငြင်းပွားနယ်မြေများတွင် လူဦးရေနေထိုင်မှု ထူထပ်စွာရှိနေခြင်းသည် လုံခြုံရေးအား အထောက်အပံ့ပေးနိုင်သည်ဆိုသော်လည်း စစ်ပွဲစတင်ဖြစ်ပွားလာသည်နှင့်တစ်ပြိုင်နက်ရလဒ်များပြောင်းပြန်ဖြစ်သွားပြီဖြစ်ကြောင်း ဖော်ပြထားပါသည်။

စတုတ္ထအချက်အနေဖြင့် ကြားခံစစ်ပွဲဆိုနှင့် ပတ်သက်ပြီး တောင်အာရှဒေသသည် အတွေ့အကြုံများစွာရှိခဲ့ဖူးပြီဖြစ်ပါသည်။ အင်အားပြိုင်ဆိုင်သော အင်အားကြီးနိုင်ငံများသည် အကြမ်းဖက်အဖွဲ့များကို လက်နက်တပ်ဆင်ပေးပြီး စစ်ပွဲတွင် တိုက်ရိုက်ပါဝင်ခြင်းမရှိခဲ့ဘဲ အစ္စရေး-ဟားမက်စ် စစ်ရေးပဋိပက္ခတွင် အီရန်နိုင်ငံသည် ဟားမက်စ်ဘက်မှ တိုက်ရိုက်ပါဝင်ကူညီပေးခြင်းများ ပြုလုပ်ပေးနေသည်ဟု အစ္စရေး နိုင်ငံက အခိုင်အမာပြောကြားထားပါသည်။ အဆိုပါအချက်ကို အီရန်နိုင်ငံဘက်မှ ပြန်လည် ငြင်းဆိုထားသော်လည်း အစ္စရေးကာကွယ်ရေးတပ်ဖွဲ့နှင့် Hezbollah တို့အကြားအပြန်အလှန်ပစ်ခတ်မှုများကြောင့် အစ္စရေးနိုင်ငံ၏ အီရန်နိုင်ငံအပေါ် ထားရှိသည့် သံသယများ ပိုမိုအားကောင်းလာခဲ့ပါသည်။ ထို့ပြင် ဟားမက်စ်ခေါင်းဆောင်များသည် ပြီးခဲ့သည့် သီတင်းပတ်များအတွင်း ရုရှားနိုင်ငံသို့ သွားရောက်ခဲ့မှုကြောင့် တိုက်ခိုက်မှု များတွင် ရုရှားနိုင်ငံ ပါဝင်ပတ်သက်မှုများနှင့်ပတ်သက်၍ မေးခွန်းထုတ်စရာများ ဖြစ်ပေါ် လာခဲ့ပါသည်။ ဟားမက်စ်၏ တိုက်ခိုက်မှုသည် အစ္စရေး-ဆော်ဒီအာရေဗျ မိတ်ဖက် ဆက်ဆံရေး အပြုသဘောဆောင်တော့မည့်အချိန်နှင့် အချိန်ကိုက်ဖြစ်ပေါ်လာသည်ကို ထောက်ပြထားပါသည်။ အဆိုပါအင်အားကြီးနိုင်ငံအနေဖြင့် ပုံမှန်သံတမန်ဆက်ဆံရေး ဖော်ဆောင်မှုများကို အနည်းငယ်မျှပင် လုပ်ဆောင်နိုင်စေကာမူ ဒေသတွင်းအာဏာ သက်ရောက်မှုများတွင် ပြောင်းလဲမှုများဖြစ်ပေါ်လာနိုင်ပြီး အီရန်နိုင်ငံ၏ ဖြစ်တည်မှုများ မှေးမှိန်လာနိုင်ပါသည်။

နိုင်ငံရေးနှင့် စစ်ရေးဗျူဟာသည် ခွဲခြား၍မရနိုင်ဘဲ အစ္စရေးနိုင်ငံသည် ဆော်ဒီအာရေဗျနိုင်ငံနှင့် မိတ်ဖက်ဆက်ဆံရေးဖော်ဆောင်နိုင်ခဲ့လျှင်တောင်မှ အီရန်နိုင်ငံ၏ ကြိုတင်ပြင်ဆင်ထားမှုများကို ခန့်မှန်းနိုင်မည်မဟုတ်ပါ။ တောင်အာရှနိုင်ငံများ အနေဖြင့် အစ္စရေးနိုင်ငံကဲ့သို့ အရည်အချင်းရှိသည့်သူများကို အများဆုံး အသုံးချလေ့ ရှိသည့်နိုင်ငံတွင်ပင် ယခုကဲ့သို့ သတိလက်လွတ်မှုများကို ကြုံတွေ့ခဲ့ရကြောင်းနှင့် ထိုကဲ့သို့ တိုက်ခိုက်ခံရမှုမျိုးသည် မည်သည့်နိုင်ငံတွင်မဆိုပေါ်ပေါက်လာနိုင်ကြောင်းကို အလေးထား သတိပြုသင့်ကြောင်း ဖော်ပြထားပါသည်။

အချုပ်အားဖြင့် အချို့သော သင်ခန်းစာများသည် သိသာမြင်သာရှိသော်လည်း အချို့မှာမထင်ရှားကြပါ။ ကမ္ဘာပေါ်တွင် ပဋိပက္ခဖြစ်ပွားမှုအများဆုံးဖြစ်သည့် ဒေသများတွင် တောင်အာရှဒေသပါဝင်ပြီး နျူကလီးယားပါဝါ ပိုင်ဆိုင်ထားသည့် အင်အားကြီး ၃ နိုင်ငံ၏ နယ်မြေပိုင်ဆိုင်မှု ပဋိပက္ခများရှိနေသည့်အပြင် နယ်စပ်ဖြတ်ကျော် တိုက်ခိုက်မှု၊ ကြားခံစစ်ပွဲများနှင့် လက်နက်ကိုင်သောင်းကျန်းမှုများရှိနေသည့် နိုင်ငံငယ်များ ရှိနေပါသည်။ ဒေသတွင်းအစိုးရများအနေဖြင့် အစ္စရေး-ဟားမက်စ်စစ်ပွဲတွင် ရဲရင့်မှုနှင့် ဉာဏ်ရည်ဉာဏ်သွေးသုံးတိုက်ခိုက်မှုကို အလေးထားသင်ခန်းစာယူသင့်ကြောင်း အကြံပြု ရေးသားထားပါသည်။

တွေ့ရှိသုံးသပ်ချက်

ဆောင်းပါးရှင် Nilanthan Niruthan သည် သီရိလင်္ကာနိုင်ငံ၏ Center for Law and Warfare (CLAW) တွင် လက်ရှိ ညွှန်ကြားရေးမှူးတာဝန်ထမ်းဆောင်နေသူ တစ်ဦးဖြစ်သည့်အပြင် စစ်ဘက်ဆိုင်ရာနှင့် ဥပဒေရေးရာများကို ရေးသားလေ့ရှိသူတစ်ဦး ဖြစ်ပါသည်။ ထို့ပြင် ၎င်းသည် သီရိလင်္ကာနိုင်ငံ၏ အမျိုးသားကာကွယ်ရေးတက္ကသိုလ်မှ နည်းပြတစ်ဦးလည်း ဖြစ်ပါသည်။ ဆောင်းပါးတွင် ဟားမက်စ်အဖွဲ့၏ နည်းပညာနိမ့် လက်နက်များဖြင့် အစ္စရေးနိုင်ငံအတွင်း ထိုးစစ်ဆင်နိုင်ခဲ့မှုများကို ထောက်ပြထားပြီး အရည်အသွေးမြင့်လက်နက်များအပေါ် အလွန်အမင်းမှီခိုအားထားနေမှု မြှင့်တင်နေခြင်း များသည် လုံလောက်မှုမရှိဘဲ အသိပညာကြွယ်ဝသည့် လူသားအရင်းအမြစ်များကို ပိုမိုပျိုးထောင် အသုံးချနိုင်ခြင်းသည် စစ်ဆင်ရေးများတွင်လည်း စစ်ရေးအသုံးစရိတ် အနည်းဆုံးဖြင့် ထိရောက်စွာဆောင်ရွက်နိုင်ကြောင်း သင်ခန်းစာဖော်ထုတ်ပြထားခြင်း ဖြစ်ပါသည်။

ထို့ပြင် အစ္စရေးနိုင်ငံ၏ စစ်ရေးဆိုင်ရာ တွေးခေါ်မှုများ သမားရိုးကျဆန်မှု၊ ယခင်က အောင်မြင်ခဲ့မှုများအပေါ် စိတ်ကြီးဝင်နေခဲ့ပြီး ပေါ့လျော့ခဲ့မှုတို့ကြောင့် ဟားမက်စ်အဖွဲ့၏ အလစ်အငိုက်တိုက်ခိုက်ခံခဲ့ရပြီး ကမ္ဘာပေါ်တွင် အားကောင်းသော ထောက်လှမ်းရေးစနစ်၊ အင်အားတောင့်တင်းသော စစ်တပ်နှင့် စွမ်းဆောင်ရည်မြင့် နည်းပညာများ ပိုင်ဆိုင်ထားသည့် နိုင်ငံတစ်နိုင်ငံအဖို့ ကမ္ဘာ့နိုင်ငံများ အလယ်တွင် အရှက်ရစေခဲ့ပါသည်။ ထို့ကြောင့် ယခုအခါ နည်းပညာမြင့်လက်နက်များ၊ သာလွန်အင်အားများဖြင့် ဂါဇာဒေသအား အလုံးစုံစစ်ဆင်ရေး ဆင်နွှဲနေပြီး ပြည်သူများ ဂါဇာဒေသမြောက်ပိုင်းမှ ထွက်ခွာကြရန် ကြေညာထားသည်ကို တွေ့ရသည်။[2] အစ္စရေး-ပါလက်စတိုင်း ပဋိပက္ခမှာ သမိုင်းကြောင်းဆိုင်ရာအချက်အလက်များအရ မည်သည့်ဘက်မှ မှားသည်၊ မှန်သည်ကို တစ်ထစ်ချဆုံးဖြတ်ရန် ခက်ခဲသော်လည်း လက်နက်နှင့် နည်းပညာ တောင့်တင်းသည့် စစ်တပ်တစ်ခုကို နည်းပညာမြင့်လက်နက်များမရှိသော်လည်း သမားရိုးကျ မဟုတ်သည့် နည်းလမ်းများကို ဖော်ထုတ်အသုံးချနိုင်ပါက ငွေကုန်ကြေးကျ သက်သာစွာဖြင့်ထိရောက်အောင် တိုက်ခိုက်နိုင်သည်ဟူသည့် အချက်ကို သင်ခန်းစာဖော်ထုတ်နိုင်ခြင်းသည်ပင် ပညာခန်းဖြစ်ပါကြောင်း သုံးသပ်ဖော်ပြလိုက်ရပါသည်။

Myanmar Aspect

131101823

[1]။ Nilanthan Niruthan.“ Al-Aqsa Storm: Lessons for South Asia”. The Diplomat, 11 October 2023, [/https://thediplomat.com/.../al-aqsa-storm-lessons-for.../]

[2]။ “Israel orders 1.1 million people in Gaza to move south: What to know”. Al Jazeera, 13 Oct 2023, [https:// www. aljazeera.com/news/2023/10/13/israel-orders-1-1-million-people-in-gaza-to-move-south-what-toknow#:~: text= Israel's% 20army%20has%20ordered%20the,offensive%20on%20the%20besieged%20enclave.]

အစ္စရေး-ဟားမက်စ် အရေးကိစ္စအပေါ် တရုတ်နိုင်ငံ၏ ရပ်တည်ချက်နှင့် ပတ်သက်ပြီး ဘာတွေသိထားသင့်သလဲ

 

နိဒါန်း

တရုတ်နိုင်ငံ၏ အစ္စရေးနိုင်ငံအရေးအပေါ်ထားရှိသော သဘောထားများနှင့် အစ္စရေး-ပါလက်စတိုင်းပဋိပက္ခ၏ သမိုင်းကြောင်း ဆိုင်ရာများကို ချိန်ထိုးသုံးသပ်ဖော်ပြသွားပါမည်။ [1]

ဖော်ပြချက်

ဟားမက်စ်စစ်သွေးကြွအဖွဲ့နှင့် အစ္စရေးနိုင်ငံအကြား ဖြစ်ပေါ်နေသည့် စစ်ရေး ပဋိပက္ခသည် အရှေ့အလယ်ပိုင်းတွင် ငြိမ်းချမ်းရေးပွဲစားဖြစ်ချင်နေသည့် တရုတ်နိုင်ငံ အတွက် ရှုပ်ထွေးသည့်ကိစ္စရပ်တစ်ခုဖြစ်လာပါသည်။ ၂၀၂၃ ခုနှစ် အစောပိုင်းတွင် တရုတ်နိုင်ငံ အနေဖြင့် အစ္စရေးနှင့် ပါလက်စတိုင်း (West Bank တွင်ရှိသော ပါလက်စတိုင်းအစိုးရကိုဆိုလို) တို့၏ စေ့စပ်ညှိနှိုင်းမှုဆောင်ရွက်နိုင်ရန် ကူညီပေးခဲ့ပြီး တရုတ်နိုင်ငံ မီဒီယာများမှ အဆိုပါ ငြိမ်းချမ်းရေးဆွေးနွေးပွဲ အောင်မြင်နိုင်သည်ဟု ဖော်ပြခဲ့ပါသည်။ ထို့ကြောင့် ယခုကဲ့သို့ အစ္စရေးနှင့် ဟားမက်စ်တို့အကြား ပြင်းထန်သည့် စစ်ပွဲများ ဖြစ်လာခြင်းက တရုတ်နိုင်ငံအတွက် စိန်ခေါ်မှုအသစ်များဖြစ်လာပါသည်။ တရုတ်နိုင်ငံ အနေဖြင့် အရှေ့အလယ်ပိုင်းဒေသတွင် တည်ငြိမ်အေးချမ်းနေပါက စီးပွားရေးအကျိုးအမြတ်များ ပိုမိုရရှိနိုင်သကဲ့သို့ နိုင်ငံရေးအဆင့်အတန်း တိုးမြှင့်ဖော်ဆောင်နိုင်သည်ဟု နိုင်ငံရေးလေ့လာ သုံးသပ်သူတစ်ဦးဖြစ်သည့် Moritz Rudolf ကပြောကြားခဲ့ပါသည်။ အောက်တိုဘာလ ၇ ရက်နေ့တွင် ဟားမက်စ်အဖွဲ့၏ အစ္စရေးနိုင်ငံအပေါ် အကြမ်းဖက်တိုက်ခိုက်ခဲ့မှုကြောင့် အပြစ်မဲ့အရပ်သားများသေဆုံးမှုနှင့်ပတ်သက်ပြီး အာရှဒေသတွင်းနိုင်ငံများနှင့် ကမ္ဘာတစ်ဝန်းရှိ နိုင်ငံများက ဝေဖန်ရှုတ်ချမှုများပြုလုပ်ခဲ့ကြပါသည်။

အကြမ်းဖက်တိုက်ခိုက်ခံရမှုနှင့် ပတ်သက်၍ အမေရိကန်၊ အိန္ဒိယ၊ ဂျပန်နှင့် အခြားသောနိုင်ငံများသည် အစ္စရေးနိုင်ငံကို ထောက်ပံ့ကူညီရန် အသီးသီးထုတ်ဖော် ပြောကြား ခဲ့ကြသော်လည်း တရုတ်အစိုးရသည် ကြားနေသဘောထားဖြင့်သာ ရပ်တည်ခဲ့ပါသည်။ တရုတ်နိုင်ငံဘက်မှ ဟားမက်စ်အဖွဲ့၏ တိုက်ခိုက်ခဲ့မှုနှင့်ပတ်သက်၍ အပစ်အခတ်ရပ်စဲမှု များကို လျင်မြန်စွာဆောင်ရွက်ရန်နှင့် ၎င်းတို့အနေဖြင့် ပဋိပက္ခများကို ဖြေရှင်းနိုင်မည့် လွတ်လပ်သော ပါလက်စတိုင်းနိုင်ငံနှင့်အတူ Two-State Solution ကို အားပေးထောက်ခံ ပါသည်ဟု ကြိမ်ဖန်များစွာ ပြောကြားခဲ့ပြီး ထိုရပ်တည်ချက်သည် ဟားမက်စ်အဖွဲ့ကို ဝေဖန်ရှုတ်ချခြင်းမဟုတ်ပါ။ အောက်တိုဘာလ ၈ ရက်တွင် ကုလသမဂ္ဂဆိုင်ရာ တရုတ်နိုင်ငံအမြဲတမ်းကိုယ်စားလှယ် Zhan Jun က တရုတ်နိုင်ငံအနေဖြင့် အကြမ်းဖက် တိုက်ခိုက်မှုအရှိန်မြင့်လာခြင်းနှင့်ပတ်သက်၍ စိုးရိမ်ပူပန်လျက်ရှိကြောင်း၊ တိုက်ခိုက်မှုနှင့် အရပ်သားသေဆုံးမှုမြင့်တက်လာခြင်းကို ကာကွယ်တားဆီးခြင်းသည် အရေးကြီးသည့် အချက်ဖြစ်ကြောင်းနှင့် အရပ်သားများအပေါ် တိုက်ခိုက်မှုကိုလည်း ရှုတ်ချပါသည်ဟု ပြောကြားခဲ့သည်။ သို့သော်လည်း တရုတ်နိုင်ငံသမ္မတ Xi အနေဖြင့် လက်ရှိအချိန် အထိ တရားဝင်ထုတ်ပြန်ချက်မျိုး ထုတ်ပြန်ထားခြင်းမရှိသေးကြောင်း ဖော်ပြထား ပါသည်။

သမိုင်းကြောင်းအရ တရုတ်နိုင်ငံနှင့် ပါလက်စတိုင်းခေါင်းဆောင်များအကြားတွင် နီးကပ်သည့် သံတမန်ဆက်ဆံရေးများရှိခဲ့ပါသည်။ ပါလက်စတိုင်းနိုင်ငံသမ္မတ Mahmoud Abbas သည် ယခုနှစ်တွင် တရုတ်နိုင်ငံသို့ (၅)ကြိမ်မြောက် ချစ်ကြည်ရေးခရီးသွားရောက် ခဲ့ပါသည်။ မကြာသေးမီနှစ်များအတွင်းက တရုတ်နိုင်ငံသည် အစ္စရေးနိုင်ငံနှင့် နက်ရှိုင်းသည့် ဆက်ဆံရေးများဖော်ဆောင်ခဲ့ပြီး အခြေခံအဆောက်အဦနှင့် အမျိုးမျိုးသော နည်းပညာကဏ္ဍများတွင် ရင်းနှီးမြှုပ်နှံမှုများ ပြုလုပ်ခဲ့ပါသည်။ တရုတ်နိုင်ငံရှိ အစ္စရေး သံရုံးမှ အကြီးတန်းအရာရှိတစ်ဦးဖြစ်သည့် Yuval Waks က အစ္စရေးနိုင်ငံအနေဖြင့် ကမ္ဘာ့စီးပွားရေးအင်အား ဒုတိယအကြီးဆုံးနိုင်ငံဆီမှ ခိုင်မာသည့် တုံ့ပြန်ချက်များကို မျှော်လင့်လျက်ရှိကြောင်း၊ အပြစ်မဲ့ပြည်သူများ လမ်းပေါ်တွင် အစုလိုက်အပြုံလိုက် သတ်ဖြတ်ခံနေရသည့်အချိန်တွင် Two-State Solution ကို အကောင်အထည်ဖော်ရန် တိုက်တွန်းနေရမည့် အချိန်မဟုတ်ကြောင်းနှင့် တရုတ်နိုင်ငံ ကဲ့သို့ ကမ္ဘာ့အင်အားကြီးနိုင်ငံအနေဖြင့် ယခုကိစ္စအပေါ် ခိုင်မာစွာရပ်တည်ပေးနိုင် လိမ့်မည်ဟု ယုံကြည်ထားပါကြောင်း ပြောကြားခဲ့ပါသည်။

တရုတ်နိုင်ငံသည် စေ့စပ်ညှိနှိုင်းရေးဆောင်ရွက်ပေးခြင်းကို ပိုမိုဆောင်ရွက် လိုသည့် သဘောရှိပြီး ၂၀၂၃ ခုနှစ်၊ မတ်လတွင် ဆော်ဒီအာရေဗျနှင့် အီရန်နိုင်ငံ တို့ကို သံတမန်ဆက်ဆံရေး ပြန်လည်တည်ဆောက်ရန် တရုတ်နိုင်ငံက စေ့စပ်ညှိနှိုင်း ပေးခဲ့ပါသည်။ တရုတ်နိုင်ငံ၏ ဆောင်ရွက်ချက်များက အရှေ့အလယ်ပိုင်းဒေသတွင် အမေရိကန်နိုင်ငံ၏ လွှမ်းမိုးမှုအတွက် စိန်ခေါ်မှုဖြစ်ပေါ်လာစေနိုင်သည်ဟု နိုင်ငံရေး လေ့လာသူများက သုံးသပ်ခဲ့ကြပြီး ဇွန်လအတွင်းက တရုတ်နိုင်ငံသည် အစ္စရေး- ပါလက်စတိုင်း ငြိမ်းချမ်းရေးဆွေးနွေးမှုများအတွက် အထောက်အကူဖြစ်စေမည့် မူကြမ်းတစ်ရပ်ကို အဆိုပြုခဲ့သော်လည်း တရုတ်နိုင်ငံအနေဖြင့် အကျပ်အတည်း များဖြင့် ရင်ဆိုင်ခဲ့ရပါသည်။ အစ္စရေးနှင့် ပါလက်စတိုင်းတို့အနေဖြင့် Oslo Accords ကို လက်မှတ်ရေးထိုးနိုင်ခဲ့ပြီး ငြိမ်းချမ်းရေးလမ်းပြမြေပုံကို သဘောတူညီခဲ့သော်လည်း Two-State Solution အတွက် စေ့စပ်ညှိနှိုင်းမှုများကို အောင်မြင်စွာ မလုပ်ဆောင်နိုင်ခဲ့ဘဲ ဆွေးနွေးမှုများသည်လည်း ၂၀၁၄ ခုနှစ်ကတည်းက ရပ်ဆိုင်းသွားခဲ့ရကြောင်း ဖော်ပြ ထားပါသည်။

အချို့သော နိုင်ငံရေးလေ့လာသုံးသပ်သူများက တရုတ်နိုင်ငံအနေဖြင့် ဟားမက်စ် အကြမ်းဖက်အဖွဲ့၏ လုပ်ဆောင်ချက်များနှင့် ပတ်သက်ပြီး နှုတ်ဆိတ်နေခြင်းသည် ၎င်း၏ အရှေ့အလယ်ပိုင်းဒေသအတွင်း အကျိုးစီးပွားကြောင့်ဖြစ်ပြီး တရုတ်နိုင်ငံသည် ဟားမက်စ်အဖွဲ့ကို အကြမ်းဖက်အဖွဲ့ဟု သုံးနှုန်းရန်ဆန္ဒမရှိဟု လေ့လာသူတစ်ဉီးကဝေဖန်ခဲ့ပါသည်။ လက်ရှိဖြစ်ပေါ်နေသည့်ပဋိပက္ခက အမေရိကန် နိုင်ငံနှင့် တင်းမာမှုဖြစ်ပေါ်နေသည့် တရုတ်နိုင်ငံအတွက် နောက်ထပ်ရှုပ်ထွေးမှုကို ဖြစ်စေခဲ့ပါသည်။ အောက်တိုဘာလ ၉ ရက်တွင် တရုတ်နိုင်ငံသမ္မတသည် အမေရိကန် အထက်လွှတ်တော် အကြီးအကဲ Chuck Schumer နှင့်တွေ့ဆုံခဲ့ပြီး အဆိုပါတွေ့ဆုံမှုတွင် Schumer က တရုတ်နိုင်ငံ၏ အစ္စရေးနိုင်ငံအပေါ်ထားရှိသည့် စာနာမှုကင်းမဲ့သည့် အပြုအမူများကို စိတ်ပျက်မိကြောင်းနှင့် တရုတ်နိုင်ငံသမ္မတနှင့် ပြည်သူများအနေဖြင့် အစ္စရေးပြည်သူများနှင့်အတူရပ်တည်ပြီး ရက်စက်သည့် အကြမ်းဖက်တိုက်ခိုက်မှုများကို ရှုတ်ချရန်တိုက်တွန်းခဲ့ကြောင်း ဖော်ပြထားပါသည်။

Schumer ၏ ခရီးစဉ်ပြီးဆုံးပြီးနောက်တွင် တရုတ်နိုင်ငံခြားရေးဝန်ကြီးဌာနက တရုတ်နိုင်ငံအနေဖြင့် အကြမ်းဖက်တိုက်ခိုက်မှုများအားလုံးနှင့် ပြည်သူများအပေါ် တိုက်ခိုက်မှုကို ရှုတ်ချပါကြောင်း၊ လက်ရှိ အရေးကြီးဆုံးအချက်မှာ အပစ်အခတ်ရပ်စဲရေး ဆောင်ရွက်နိုင်ရန်နှင့် ငြိမ်းချမ်းရေးထိန်းသိမ်းရန်ဖြစ်သည်ဟု ထုတ်ဖော်ပြောကြားခဲ့သော်လည်း တစ်ချိန်တည်းတွင် တရုတ်နိုင်ငံပိုင် Global Times သတင်းဌာနက အမေရိကန် နိုင်ငံ၏ အစ္စရေးနိုင်ငံအပေါ်ထောက်ပံ့မှုများနှင့်ပတ်သက်၍ အမေရိကန်နိုင်ငံ၏ လုပ်ရပ်သည် ပဋိပက္ခကို အားပေးနေသည့် သဘောသက်ရောက်နေသည်ဟု ဝေဖန်ရေးသားခဲ့ပါသည်။ အစ္စရေးနိုင်ငံသည် ပါလက်စတိုင်းနိုင်ငံထက် စစ်ရေးအင်အားသာလွန်လျက်ရှိပါသည်။ အကယ်၍ အမေရိကန်နိုင်ငံအနေဖြင့် ငြိမ်းချမ်းရေးကို အမှန်တကယ်ဖော်ဆောင်ပေးလိုလျှင် တစ်ဖက်သတ်ထောက်ပံ့ပေးနေမည့်အစား ပဋိပက္ခကိုထိန်းသိမ်းနိုင်မည့် အခြေအနေ တစ်ခုကို ဖော်ဆောင်ပေးသင့်သည်ဟု ပြောကြားခဲ့ပါသည်။ တရုတ်နိုင်ငံသည် လက်ရှိ ဖြစ်ပေါ်နေသည့် ပဋိပက္ခများတွင် ကြားညပ်မည့်အခြေအနေကို မလိုလားသော်လည်း အင်အားကြီးနိုင်ငံများ ပဋိပက္ခနှင့်ပတ်သက်၍ ဆွေးနွေးကြသည့်အခါတွင် ထိုင်ခုံနေရာရရုံသာ ဆောင်ရွက်နေသည်ဟု ဖော်ပြထားပါသည်။

တွေ့ရှိသုံးသပ်ချက်

ယခု ဟားမက်စ်အဖွဲ့၏ တိုက်ခိုက်မှုတွင် အနောက်အုပ်စုအနေဖြင့် အစ္စရေးနိုင်ငံ ဘက်မှ ရှိနေပြီး ရုရှား၊ တရုတ်နှင့် အရှေ့အလယ်ပိုင်းနိုင်ငံအတော်များများသည် အပစ်အခတ် ရပ်ရန်၊ အရပ်သားများကို ပစ်မှတ်မထားရန်နှင့် ၁၉၆၇ ခုနှစ်တွင် အစ္စရေးတို့၏ ကျူးကျော်စစ်ဖြစ်သော ၆ ရက်စစ်ပွဲ(Six Day War)မတိုင်မီ နယ်နိမိတ်မျဉ်းပေါ်တွင် မူတည်၍ နှစ်ဦးနှစ်ဖက်၏ အချုပ်အခြာအာဏာပိုင်ဆိုင်ခွင့်ကို အသိအမှတ်ပြုကြရန် ရပ်တည်လျက်ရှိသည်ကို တွေ့ရပါသည်။ ထိုသို့ ရပ်တည်နေခြင်းမှာ သမိုင်းကြောင်းဆိုင်ရာအခြေအနေများနှင့် ဆက်စပ်နေကြောင်းလေ့လာတွေ့ရှိရသည်။

လက်တွေ့မြေပြင်အခြေအနေသည် အစ္စရေးနိုင်ငံအနေဖြင့် ၁၉၆၇ ခုနှစ်တွင် ၆ ရက်ကြာ စစ်ပွဲဆင်နွှဲခဲ့ပြီး ဆီးရီးယားနယ်စပ်ရှိ Golan Heights ဒေသ၊ အီဂျစ်နိုင်ငံ Sinai ကျွန်းဆွယ်ဒေသ၊ ပါလက်စတိုင်းများနေထိုင်နေသည့် ဂျော်ဒန်မြစ်အနောက်ဖက်ကမ်းရှိ West Bank ဒေသနှင့် မြေထဲပင်လယ်ဘက်ရှိ ဂါဇာဒေသ(ယခု ဟားမက်စ်များ စိုးမိုးထားသည့် နေရာ)၊ ဂျေရုစလင်မြို့အရှေ့ဘက်ဒေသများသို့ သိမ်းယူခဲ့ခြင်းဖြစ်ပါသည်။

ထို့နောက်တွင်မှ ၁၉၇၉ ခုနှစ်တွင် အီဂျစ်နှင့် စစ်ပြေငြိမ်းကာ အီဂျစ်နိုင်ငံ Sinai ကျွန်ဆွယ်ဒေသမှ ၎င်း၏ တပ်များအား ရုပ်သိမ်းခဲ့ပြီး ၂၀၀၅ ခုနှစ်တွင် ဂါဇာရှိတပ်များ ပြန်လည်ရုပ်သိမ်းခဲ့ခြင်း ဖြစ်ပါသည်။ သို့သော်လည်း အခြားဒေသများအား အစ္စရေးနိုင်ငံမှ ထိန်းချုပ်ထားခဲ့ပြီး West Bank ဒေသတွင်လည်း အုပ်စု A (အစ္စရေးအုပ်ချုပ်သော နေရာ)၊ အုပ်စု B (ပါလက်စတိုင်း အုပ်ချုပ်သောနေရာ)၊ အုပ်စု C (ပူးတွဲအုပ်ချုပ်သော နေရာ)ဟူ၍ (အစ္စရေးဘက်မှ အသာစီးရသော) Oslo II Accord ဖြင့် သဘောတူကာ သတ်မှတ်အုပ်ချုပ်နေကြခြင်းဖြစ်ပါသည်။ Gaza ဒေသအပါအဝင် West Bank ဒေသကိုလည်း အစ္စရေးတို့က စစ်တပ်၊ လေကြောင်းနှင့် အုပ်ချုပ်ရေးတို့အရ လွှမ်းမိုးထားသည်သာဖြစ်ပြီး ယခု ပါလက်စတိုင်းအစိုးရဟူသည်မှာ အစ္စရေးနိုင်ငံမှ ကိုယ်ပိုင်အုပ်ချုပ်ခွင့်ပေးထား၍ရရှိနေသည့် အခြေအနေသာဖြစ်သည်ဟု ယူဆနိုင်ပါသည်။

ဂါဇာဒေသသည်လည်း မြေထဲပင်လယ်ဘက်မှ ပါလက်စတိုင်းများ နေထိုင်ရာ နေရာဖြစ်ပြီး West Bank ဒေသတွင်ရှိသော ပါလက်စတိုင်းများထက် အစ္စရေးနိုင်ငံကို မလိုလားသည့်အုပ်စုများ(ယခု ဟားမက်စ်အဖွဲ့)က လွှမ်းမိုးထားခြင်းဖြစ်ပါသည်။ အစ္စရေး-ပါလက်စတိုင်း ပဋိပက္ခသည် သပွတ်အူကဲ့သို့ရှုပ်ထွေးသည့် ဘာသာရေးဆိုင်ရာ သမိုင်းကြောင်း များနှင့် လူမျိုးရေးဆိုင်ရာ သမိုင်းကြောင်းများ ရောယှက်လျက်ရှိနေပါသည်။ ထို့ကြောင့် လက်ရှိအခြေအနေတွင် အစ္စရေး-ပါလက်စတိုင်း ပဋိပက္ခအား သံတမန်ရေးအရ မည်သူ့ ဘက်မှ မှားသည်/မှန်သည်ကို ယတိပြတ်ဆုံးဖြတ်ရန်ခက်ခဲနေပြီး သမိုင်းကြောင်းအရ အစ္စရေးတို့ဘက်မှ အမေရိကန်နိုင်ငံ၏အကူအညီဖြင့် တဖြည်းဖြည်းအသာစီးရယူလာကာ ဒေသတွင်း လွှမ်းမိုးထားနိုင်သည့် အနေအထားဟုသာဆိုရမည် ဖြစ်ပါသည်။

ထိုအကြောင်းများကြောင့် ရုရှား၊ တရုတ်နှင့် အရှေ့အလယ်ပိုင်းနိုင်ငံအများစု အနေဖြင့် အပစ်အခတ်ရပ်စဲရေး၊ နှစ်နိုင်ငံ အပြန်အလှန်အသိအမှတ်ပြုရေး (Two-State Solution)နှင့် အစ္စရေးတို့မသိမ်းပိုက်ရသေးသည့် ၁၉၆၇ ခုနှစ်မတိုင်မီ နယ်မြေပိုင်ဆိုင်မှုများ အပေါ်တွင် ညှိနှိုင်းကြရန် အဆိုပြုနေကြခြင်းဖြစ်ပါသည်။ သို့သော်လည်း အမေရိကန် နိုင်ငံနှင့် အနောက်အုပ်စုအနေဖြင့် ဟားမက်စ်များပေါ်တွင်သာ အပြစ်တင်လိုဟန်ရှိပြီး အစ္စရေးနိုင်ငံဘက်မှ အသာစီးရနေသည့် အခြေအနေကိုသာ ထိန်းသိမ်းထားလိုဟန်ရှိပါသည်။ အနောက်အုပ်စုအနေဖြင့် ဂါဇာဒေသတွင်ရှိသော ဟားမက်စ်အဖွဲ့အား အကြမ်းဖက်အဖွဲ့အဖြစ် သတ်မှတ်ထားသော်လည်း ရုရှားနှင့် တရုတ်နိုင်ငံတို့မှ အကြမ်းဖက်ဟု မသတ်မှတ်ရခြင်း၊ မသုံးနှုန်းခြင်းဖြစ်ပါသည်။ ထို့ကြောင့် ပဋိပက္ခတစ်ခုအား မီဒီယာဖော်ပြချက်များပေါ်တွင်သာ မူတည်၍ အလွယ်တကူဆုံးဖြတ်ခြင်းများပြုလုပ်ပါက နိုင်ငံငယ်များအနေဖြင့် သံတမန်ရေးဆိုင်ရာ အမှားအယွင်းများ ရင်ဆိုင်လာရနိုင်ပါသည်။

ယခုဆောင်းပါးတွင် တရုတ်နိုင်ငံ၏ ရပ်တည်ချက်အား ဝေဖန်လိုသည့်သဘောဖြင့် ရေးသားထားသော်လည်း လက်တွေ့တွင် တရုတ်နှင့် ရုရှားနိုင်ငံတို့၏ သံတမန်ရေးဆိုင်ရာ အသုံးအနှုန်းနှင့် ရပ်တည်ချက်များမှာ နည်းလမ်းကျနေသည်ဟု ယူဆရပါသည်။ ထို့ပြင် ယခုပဋိပက္ခသည် တရုတ်နိုင်ငံ၏ အကျိုးစီးပွားအတွက် တိုက်ရိုက်ထိခိုက်ခြင်းမရှိဘဲ အမေရိကန်နိုင်ငံနှင့် အနောက်အုပ်စုအနေဖြင့် အစ္စရေးနိုင်ငံအား ထောက်ပံ့ကူညီရန် ဗျာများနေချိန်တွင် တရုတ်နိုင်ငံအနေဖြင့် ပြဿနာရပ်များတွင် တိုက်ရိုက်မပါဝင်ဘဲ စီးပွားရေးနှင့် စစ်ရေးတည်ဆောက်၍ သံတမန်ရေးအရသာ ငြိမ်းချမ်းရေးဦးဆောင်သူ အဖြစ် ဆက်လက်ပုံဖော်သွားမည်ဟု ယူဆရပါသည်။ ထိုနည်းလမ်းသည်လည်း ဒုတိယ ကမ္ဘာစစ်တွင် အမေရိကန်နိုင်ငံမှ စစ်ကြီးအတွင်းသို့ မပါဝင်ခင်အသုံးပြုခဲ့သည့် နည်းလမ်းပင်ဖြစ်ပါကြောင်း သုံးသပ်ဖော်ပြလိုက်ရပါသည်။

Myanmar Aspect

130101723

[1]။ PAK YIU,“ China hedges on Israel-Hamas war as U.S. urges stronger stance”. Nikkei Asia. 10 Oct 2023, [https://asia.nikkei.com/.../China-hedges-on-Israel-Hamas...]

ဟားမက်စ်အဖွဲ့အနေဖြင့် အစ္စရေးနိုင်ငံအားလက်ဦးမှုရယူတိုက်ခိုက်ခံခဲ့ရခြင်း၏နောက်ကွယ်မှ နိုင်ငံရေးရလိုမှုများနှင့်ပတ်သက်ပြီး ဘာတွေသိထားသင့်သလဲ

နိဒါန်း

၂၀၂၃ ခုနှစ်၊ အောက်တိုဘာလ ၇ ရက်နေ့တွင် ပါလက်စတိုင်းနိုင်ငံမှ ဟားမက်စ် သူပုန်အဖွဲ့သည် အစ္စရေးနိုင်ငံအတွင်းသို့ သောင်းဂဏန်းခန့်ရှိသည့် ဒုံးကျည်များဖြင့် ပစ်ခတ်တိုက်ခိုက်ခဲ့ပြီး အင်အားအလုံးအရင်းဖြင့် ထိုးဖောက်ဝင်ရောက်တိုက်ခိုက်ခဲ့ကာ ဓားစာခံအများအပြားကိုလည်း ဖမ်းဆီးသွားခဲ့ပါသည်။ အဆိုပါတိုက်ခိုက်မှုနှင့်ပတ်သက်၍ Foreign Affairs ၏ အမှုဆောင်အယ်ဒီတာ Justin Vogt က အမေရိကန်နိုင်ငံ ပြည်ပဆက်ဆံရေးကောင်စီ၏ အမေရိကန်-အရှေ့အလယ်ပိုင်းသံတမန်ရေးဆိုင်ရာ Lowy အဖွဲ့ ထိပ်တန်းအဖွဲ့ဝင်အရာရှိ Martin Indyk ၏ အမြင်နှင့် သဘောထားအား မေးမြန်းခဲ့ပါသည်။ Martin Indyk သည် အစ္စရေးနိုင်ငံဆိုင်ရာ အမေရိကန်သံအမတ်အဖြစ် ၁၉၉၅ ခုနှစ်မှ ၁၉၉၇ ခုနှစ်နှင့် ၂၀၀၀ ပြည့်နှစ်မှ ၂၀၀၁ ခုနှစ်ထိ နှစ်ကြိမ်တိုင် ခန့်အပ်ခြင်းခံခဲ့ရပြီး သမ္မတ ဘီလ်ကလင်တန် (Bill Clinton) ၏ အထူးလက်ထောက်အဖြစ်လည်းကောင်း၊ အရှေ့နှင့် တောင်အာရှ အရေးဆိုင်ရာ အမျိုးသားလုံခြုံရေးကောင်စီ၏ စီနီယာဒါရိုက်တာအဖြစ်လည်းကောင်း၊ သမ္မတ Barack Obama လက်ထက်တွင် အစ္စရေး-ပါလက်စတိုင်းဆိုင်ရာ အထူးသံတမန် အဖြစ်လည်းကောင်း တာဝန်ထမ်းဆောင်ခဲ့သူဖြစ်ပါသည်။ [1]

ဖော်ပြချက်

လက်ရှိတွင် လေ့လာသူများက ဟားမက်စ်အဖွဲ့၏ အလစ်အငိုက်တိုက်ခိုက်မှု များကို အမေရိကန်နိုင်ငံဖြစ်စဉ် 9/11 ဖြင့် နှိုင်းယှဉ်ပြောကြားလျက်ရှိခြင်းနှင့်ပတ်သက်၍ ပြန်လည်မေးမြန်းရာတွင် Martin Indyk က ယခုကဲ့သို့ အလစ်အငိုက်တိုက်ခိုက် ခံရမှုသည် အစ္စရေးနိုင်ငံ၏ ကြီးမားသော ပေါ့လျော့မှုနှင့် အားနည်းချက်ကြောင့်ဖြစ်သည်ဟု ဆိုသည်။ အစ္စရေးတို့အနေဖြင့် ဂါဇာမြို့နှင့် အစ္စရေးနယ်နိမိတ်ဒေသများအကြားတွင် တံတိုင်းတစ်ခု တည်ဆောက်ခဲ့ပြီး ဟားမက်စ်အဖွဲ့အနေဖြင့် တိုက်ခိုက်မှုများ လုပ်ဆောင်ရဲလိမ့်မည် မဟုတ်ဟု ယုံကြည်ထားကြကြောင်း၊ ထို့ပြင် အပစ်ရပ်ကာလ၌ ဂါဇာဒေသသည် စီးပွားရေးနှင့် အကောက်ခွန်လုပ်ငန်းများအတွက် အရေးပါလျက်ရှိကြောင်း၊ ဟားမက်စ် အဖွဲ့အနေဖြင့်လည်း ၎င်းတို့စီးပွားရေးအား ထိခိုက်မည့်တိုက်ခိုက်မှုများအား လုပ်ဆောင်မည် မဟုတ်ဘဲ ရေရှည်အပစ်ခတ်ရပ်စဲရေးကိုသာ လိုလားလျက်ရှိသည်ဟု ယုံကြည်ထားခဲ့ကြောင်း၊ ထို့ကြောင့် 9/11 ဖြစ်စဉ်ကဲ့သို့ပင် လက်ရှိအချိန်တွင် လူအများက အံ့အား သင့်လျက်ရှိပြီး အဆိုပါမေးခွန်းနှင့်ပတ်သက်၍ တိကျသေချာသည့် အဖြေမရှိသော်လည်း အစ္စရေးနိုင်ငံ၏ မိမိကိုယ်ကို မာနထောင်လွှားအထင်ကြီးမှုကြောင့် ထိုသို့တိုက်ခိုက်ခံ ခဲ့ရခြင်းဖြစ်ကြောင်း ဖြေကြားထားပါသည်။

ထို့နောက် ယခုလုပ်ရပ်နှင့်ပတ်သက်၍ ဟားမက်စ်သူပုန်အဖွဲ့၏ မဟာဗျူဟာ တွက်ချက်မှုများနှင့်ပတ်သက်ပြီး ပြန်လည်မေးမြန်းရာတွင် Martin Indyk က ယခု အချိန်တွင် ဆော်ဒီအာရေဗျနိုင်ငံအပါအဝင် အာရပ်ကမ္ဘာသည် အစ္စရေးနိုင်ငံနှင့် ဆက်ဆံရေး ပုံမှန်ဖြစ်စေရန် ကြိုးပမ်းလျက်ရှိကြောင်း၊ အမေရိကန်နိုင်ငံကလည်း အစ္စရေးနိုင်ငံအား ပါလက်စတိုင်းအစိုးရနှင့် ဆက်ဆံရေးကောင်းမွန်အောင် ပံ့ပိုးလျက်ရှိကြောင်း၊ ထိုအချိန်တွင် ဟားမက်စ်အဖွဲ့အနေဖြင့် အီရန်နိုင်ငံနှင့် ပူးပေါင်း၍ အမေရိကန်၊ ထို့ကြောင့် ယခုတိုက်ခိုက်မှုသည့် အစ္စရေးနှင့် အာရပ် နိုင်ငံများ တည်ဆောက်နေသည့် ဆက်ဆံရေးကို ဖျက်ဆီးနှောင့်ယှက်လိုက်ခြင်းပင် ဖြစ်နိုင်ကြောင်း၊ ၎င်းတို့သည် အစ္စရေးနိုင်ငံနှင့် ငြိမ်းချမ်းရေး တည်ထောင်နေသည့် အာရပ်နိုင်ငံများကို အရှက်ရစေရန်နှင့် ဟားမက်စ်နှင့် အီရန်နိုင်ငံတို့အနေဖြင့် အစ္စရေး နိုင်ငံအား စစ်ရေးအရအကျိုးအမြတ်ထွက်အောင် တိုက်ခိုက်နိုင်သည်ကို ပြသလိုခြင်း ဖြစ်နိုင်ကြောင်း၊ အစ္စရေးနှင့် ဆော်ဒီအာရေဗျနိုင်ငံတို့အကြား ငြိမ်းချမ်းရေးသဘော တူညီချက်များသည် ဟားမက်စ်နှင် အီရန်နိုင်ငံတို့အား ခြိမ်းခြောက်လျက်ရှိရာ ထိုငြိမ်းချမ်းရေး မျှော်လင့်ချက်ကို ဖျက်ဆီးလိုက်ခြင်းသည် အကောင်းဆုံးနည်းလမ်းအဖြစ် သတ်မှတ် ခဲ့ခြင်းဖြစ်နိုင်ကြောင်း၊ ပါလက်စတိုင်းအရေးသည် ကမ္ဘာ့အလယ်တွင် အာရုံစိုက်ခြင်း ခံရပြီး အမေရိကန်နိုင်ငံထုတ်လက်နက်များဖြင့် ပါလက်စတိုင်းပြည်သူများကို သတ်ဖြတ် နေသည့် အစ္စရေးနိုင်ငံ၏လုပ်ရပ်များအား ပါလက်စတိုင်းလူထုက လက်ခံမည်မဟုတ် သောကြောင့် အစ္စရေးနိုင်ငံနှင့် ဆက်ဆံရေးတည်ဆောက်နေသည့် ဆော်ဒီအာရေဗျ နိုင်ငံကဲ့သို့သော နိုင်ငံများအနေဖြင့် နိုင်ငံရေးနှင့် သံတမန်ရေးအရ အခက်တွေ့လိမ့်မည် ဖြစ်ကြောင်း၊ ဆိုလိုသည်မှာ ၎င်းတို့အနေဖြင့် ပါလက်စတိုင်းပြည်သူများ သေဆုံးနေမှုကို မျက်ကွယ်ပြု၍ အစ္စရေးနိုင်ငံနှင့် ငြိမ်းချမ်းသောနည်းလမ်းဖြင့် ကောင်းမွန်သောဆက်ဆံရေးဆက်လက်ဖော်ဆောင်ရန် မဖြစ်နိုင်တော့ကြောင်း ဖြေကြားခဲ့ပါသည်။

ယခုတိုက်ခိုက်ခံရမှုကို အစ္စရေးအစိုးရအနေဖြင့် တုံ့ပြန်လာနိုင်သည့် နည်းလမ်း များနှင့် ပတ်သက်ပြီး ဖြေကြားရာတွင် ယခင်ကလည်း ယခုကဲ့သို့ အကြမ်းဖက်မှုများ (၅)ကြိမ်တိုင် ကြုံတွေ့ခဲ့ဖူးကြောင်း၊ အစ္စရေးအစိုးရအနေဖြင့် စစ်တပ်များရွှေ့ပြောင်း တပ်ဖြန့်ချထားခြင်း၊ လေကြောင်းဖြင့် ဂါဇာဒေသအားတိုက်ခိုက်ခြင်း၊ ဟားမက်စ်ခေါင်းဆောင်အား ဖမ်းဆီးသတ်ဖြတ်ခြင်းများ ပြုလုပ်လာနိုင်ဖွယ်ရှိကြောင်း၊ အကယ်၍ ထိုသို့လုပ်ဆောင်ခြင်းက ဟားမက်စ်ဘက်မှ ဒုံးကျည်ဖြင့် ပစ်ခတ်တိုက်ခိုက်ခြင်းနှင့် ဓားစာခံလွှတ်ပေးရေးအတွက် ဆွေးနွေးမှုများဖြစ်မလာပါက အစ္စရေးနိုင်ငံအနေဖြင့် ဂါဇာ ဒေသသို့ ကျူးကျော်သိမ်းပိုက်မှုများ(Full-scale Israeli Invasion of Gaza) လုပ်ဆောင် လာနိုင်ဖွယ်ရှိကြောင်း၊ အဆိုပါကျူးကျော်မှုတွင် အစ္စရေးနိုင်ငံအနေဖြင့် ပါလက်စတိုင်း နိုင်ငံရှိ လူနေထူထပ်သည့်နေရာများကို ပစ်ခတ်တိုက်ခိုက်မှုများ လုပ်ဆောင်ခဲ့ပါက ပြည်သူအများအပြားသေဆုံးမည့်ကိစ္စနှင့်ပတ်သက်ပြီး နိုင်ငံတကာမှ ကန့်ကွက်လာမည် ဖြစ်ကြောင်း၊ အမေရိကန်နိုင်ငံအနေဖြင့်လည်း အဆင့်မြင့်လက်နက်များ ထောက်ပံ့ခြင်းကြောင့် အမေရိကန်နှင့် အစ္စရေး နှစ်နိုင်ငံစလုံးအပေါ် ပြစ်တင်မှုများရှိလာပြီး အစ္စရေးနိုင်ငံအား စစ်ပွဲရပ်တန့်ရန် ဖိအားပေးမှုများ ရှိလာနိုင်ကြောင်း၊ အရေးကြီးသည့်အချက်မှာ အကယ်၍ အစ္စရေးနိုင်ငံအနေဖြင့် ဂါဇာဒေသအား သိမ်းပိုက်နိုင်ခဲ့မည်ဆိုလျှင်လည်း အစ္စရေးတပ်များ ဂါဇာဒေသမှ မည်သို့ပြန်လည်ဆုတ်ခွာမည်၊ မည်သည့်အချိန်တွင် ဆုတ်ခွာမည်၊ မည်သည့် အကျိုးအမြတ်များဖြင့် ဆုတ်ခွာမည်ဆိုသည့်အချက်များကို ဖြေရှင်းနိုင်ရမည်ဖြစ်ကြောင်း၊ အစ္စရေးနိုင်ငံအနေဖြင့် ၂၀၀၅ ခုနှစ်တွင်လည်း ဂါဇာဒေသမှ ပြန်လည်ဆုတ်ခွာခဲ့ရပြီး ဂါဇာဒေသသို့ ပြန်လည်သွားရောက်လိုခြင်း မရှိကြောင်း ဖြေကြားထားပါသည်။

အစ္စရေးနိုင်ငံဝန်ကြီးချုပ် နေတန်ယာဟု(Netanyahu) လုပ်ဆောင်လာနိုင်သည့် အဆုံးအဖြတ်များနှင့်ပတ်သက်၍ ဖြေကြားရာတွင် နေတန်ယာဟုအနေဖြင့် အလုံးစုံစစ်ပွဲ မဖြစ်ပွားစေရန် သတိထားလုပ်ဆောင်သူဖြစ်ကြောင်း၊ ၎င်းအနေဖြင့် ဟားမက်စ် အဖွဲ့အား ပြစ်ဒဏ်ပေးသည့်အနေဖြင့် လေကြောင်းတိုက်ခိုက်မှုများသာ လုပ်ဆောင် လာနိုင်ပြီး ထို့နောက် အပစ်ခတ်ရပ်စဲရေးနှင့် ဓားစာခံလွတ်မြောက်ရေးအတွက် ဆွေးနွေးမှုများ စီစဉ်လုပ်ဆောင်နိုင်ကြောင်း၊ ထို့နောက် အမေရိကန်၊ အီဂျစ်နှင့် ကာတာ နိုင်ငံတို့၏ အကူအညီဖြင့် ဟားမက်စ်အဖွဲ့ကို ရပ်တန့်၍ မူလအခြေအနေသို့ ပြန်လည်ရောက်ရှိအောင်(The Status Quo Ante) လုပ်ဆောင်လာနိုင်ကြောင်း၊ သို့သော် ထိုသို့ဖြစ်လာရန် သံသယရှိနေကြောင်း၊ အဘယ့်ကြောင့်ဆိုသော် ဟားမက်စ် အဖွဲ့၏ လက်ရှိရည်ရွယ်ချက်မှာ အစ္စရေးနိုင်ငံဘက်မှ ပြင်းပြင်းထန်ထန် လက်တုံ့ပြန် လာပြီး West Bank ဒေသတွင်းထကြွမှုများ၊ Hezbollah တို့၏ တိုက်ခိုက်မှုများနှင့် ဂျေရုစလင်တွင် ပုန်ကန်ထကြွမှုများ ဖြစ်ပွားလာပြီး ပဋိပက္ခပိုမိုပြင်းထန် လာစေရန် ရည်ရွယ်နေခြင်းဖြစ်ကြောင်း (တစ်နည်းအားဖြင့် နေရာပေါင်းစုံမှ ပါလက်စတိုင်းတို့၏ထကြွပုန်ကန်မှုများဖြစ်ပွားလာပြီး ပြဿနာပိုမိုကြီးထွားလာစေရန် ရည်ရွယ်နေခြင်း ဖြစ်ကြောင်း) ဖြေကြားထားပါသည်။

ဟားမက်စ်အဖွဲ့အနေဖြင့် အစ္စရေးနိုင်ငံမှ ရွေးချယ်လာနိုင်သည့် ယခင် အခြေအနေသို့ ပြန်လည်ရောက်ရှိရန် လက်ခံနိုင်ဖွယ်ရှိ/မရှိနှင့် ပတ်သက်၍ ဖြေကြား ရာတွင် ပဋိပက္ခများ အရှိန်မြှင့် ဖြစ်ပေါ်လာချိန်တွင် တစ်ဖက်၌ Hezbollah အဖွဲ့ကို အနီးကပ်စောင့်ကြည့်ရမည်ဖြစ်ကြောင်း၊ ပါလက်စတိုင်းပြည်သူများ သေဆုံးမှု များပြား လာပါက Hezbollah အဖွဲ့အနေဖြင့် စစ်ပွဲတွင် ထဲထဲဝင်ဝင် ပါဝင်လာနိုင်ကြောင်း၊ Hezbollah အဖွဲ့တွင် ဒုံးကျည် ၁၅၀,၀၀၀ စင်းခန့်ရှိပြီး အစ္စရေးနိုင်ငံ၏ အဓိက မြို့ကြီးများပေါ်သို့ တစ်ပြိုင်တည်းပစ်ခတ်လာနိုင်ကြောင်း၊ ဤအခြေအနေသို့ ရောက်လာ ပါက ဂါဇာဒေသသာမက လက်ဘနွန်နိုင်ငံပါ စစ်ပွဲအတွင်းသို့ ရောက်ရှိလာမည် ဖြစ်ကြောင်း၊ တစ်ဖက်တွင်လည်း အစ္စရေးနိုင်ငံနှင့် Abraham Accords လက်မှတ် ရေးထိုးထားသော ဆော်ဒီအာရေဗျ၊ အီဂျစ်၊ ဂျော်ဒန်နှင့် အခြားနိုင်ငံများအနေဖြင့်လည်း ၎င်းတို့အကျိုးအတွက် ပဋိပက္ခအရှိန်လျှော့ချရန်နှင့် အပစ်အခတ်ရပ်စဲရန်ကိုသာ တောင်းဆို လာနိုင်ကြောင်း ဖြေကြားထားပါသည်။

အစ္စရေးနိုင်ငံအတွင်း လက်ရှိနိုင်ငံရေးမတည်ငြိမ်မှုသည် စစ်ပွဲဆုံးဖြတ်မှုများ အပေါ် သက်ရောက်လာနိုင်မှု ရှိ/မရှိနှင့်ပတ်သက်၍ မေးမြန်းရာတွင် Martin Indyk က လက်ရှိနိုင်ငံရေးအရေးအခင်းအား အတိမ်အနက်ကိုမသိရသေးကြောင်း၊ ဝန်ကြီးချုပ် အနေဖြင့် ပြည်သူများအား ကာကွယ်ရန်နှင့် အဆိုပါပြဿနာမှ ပြစ်တင်ခြင်းမခံရ စေရန် ကြိုးပမ်းနေကြောင်း၊ ဝန်ကြီးချုပ်သည် လက်ရှိအခြေနေများကို လက်ယာ အစွန်းရောက်နိုင်ငံရေးအဖွဲ့ဝင်များအား ဖြေရှင်းခွင့်ပြုမည်မဟုတ်ကြောင်း၊ ၎င်းတို့ အခွင့်အာဏာရပါက အခြေအနေများပိုဆိုးလာမည်ဖြစ်ကြောင်း၊ ယခုအခါ အတိုက်အခံ ခေါင်းဆောင် Yair Lapid က ၎င်း၏ပါတီ၊ နေတန်ယာဟု၏ပါတီနှင့် အခြား အတိုက်အခံ ပါတီတစ်ခုပါဝင်သည့် အရေးပေါ်အစိုးရ (Emergency Government) တည်ထောင်ရန် အဆိုပြုနေကြောင်း၊ ထို့ကြောင့် ဝန်ကြီးချုပ်နေတန်ယာဟုအနေဖြင့် လက်ယာစွန်း နိုင်ငံရေးသမားများအား ထိန်းချုပ်ခြင်း၊ ရှင်းလင်းခြင်းများ လုပ်ဆောင်လာနိုင်ကြောင်းဖြေကြားထားပါသည်။

လွန်ခဲ့သည့် နှစ် ၅၀ ခန့်တွင် အစ္စရေးနိုင်ငံသည် အီဂျစ်နှင့် ဆီးရီးယားနိုင်ငံ တို့၏ ထိုးစစ်ဆင်တိုက်ခိုက်မှုကို အောင်မြင်စွာပြန်လည်ခုခံနိုင်ခဲ့ကြောင်း၊ ထို့ကြောင့် အစ္စရေးနိုင်ငံအနေဖြင့် အဆိုပါ အောင်မြင်မှုကို အခြေခံ၍ ဟားမက်စ်အဖွဲ့အား ဟန့်တားထိန်းချုပ်ထားလိုကြောင်း၊ သို့သော်လည်း ဟားမက်စ်အဖွဲ့သည် ယခင်အစ္စရေးတို့ အနိုင်ယူခဲ့သည့် အီဂျစ်နှင့် ဆီးရီးယားနိုင်ငံတို့နှင့် မတူညီကြောင်း၊ ဟားမက်စ်သည် အစ္စရေးနိုင်ငံ ပျက်သုဉ်းရေး ကိုသာ ရည်ရွယ်၍ ငြိမ်းချမ်းရေးယူရန် ဆန္ဒမရှိကြောင်း၊ ထို့ကြောင့် လွန်ခဲ့သည့် အစ္စရေးနိုင်ငံအနေဖြင့် နှစ် ၅၀ က အောင်မြင်မှုကို အခြေခံသည့် မိမိကိုယ်ကို အထင်ကြီး မာနထောင်လွှားမှုသည် အလုပ်မဖြစ်တော့ကြောင်းနှင့် ထိုသို့ မိမိကိုယ်ကိုအထင်ကြီးခြင်း ကြောင့်ပင် ယခုကဲ့သို့ တိုက်ခိုက်ခံခဲ့ရခြင်းဖြစ်ကြောင်း ဖြေကြားထားပါသည်။

တွေ့ရှိသုံးသပ်ချက်

အစ္စရေး-ပါလက်စတိုင်း ပဋိပက္ခသည် ပထမကမ္ဘာစစ်ကတည်းက ဖြစ်ပွားလျက် ရှိသည့် နယ်မြေအငြင်းပွားမှု၊ လူမျိုးရေးအငြင်းပွားမှု ပြဿနာတစ်ခုဖြစ်ပြီး လက်ရှိအချိန်ထိ ဖြေရှင်းနိုင်ခြင်းမရှိသည့် ကိစ္စရပ်တစ်ခုဖြစ်ပါသည်။ ထို့ထက်ပို၍ ရှေးကျသည့် ဘာသာရေးဆိုင်ရာ အငြင်းပွားမှုများနှင့်လည်း ဆက်စပ်လျက်ရှိနေပါသည်။ ယခု အစ္စရေးနိုင်ငံနှင့် ထိပ်တိုက်စစ်ပွဲများ ဖြစ်ပေါ်နေသည့် ဟားမက်စ်အဖွဲ့သည် အီဂျစ်နိုင်ငံ မွတ်စလင်ညီနောင်အဖွဲ့နှင့် ကြီးကြီးမားမားဆက်စပ်နေသည့် အဖွဲ့ဖြစ်ပြီး ၁၉၈၇ ခုနှစ် ပါလက်စတိုင်းအုံကြွမှုမှ စတင်ပေါ်ပေါက်ခဲ့ခြင်း ဖြစ်ပါသည်။ အစ္စရေးနိုင်ငံအနေဖြင့် ၎င်းတို့၏ အတိတ်က အောင်မြင်မှုများကို အခြေခံ၍ ဟားမက်စ်အဖွဲ့ကို လျှော့တွက်ခဲ့ခြင်းကြောင့် ယခုကဲ့သို့ မကြုံဖူးသည့် ကြီးမားသော အလစ်အငိုက်တိုက်ခိုက်မှုကို ခံခဲ့ရခြင်းဖြစ်ပါသည်။ ထိုတိုက်ခိုက်မှု၏ နောက်ကွယ်တွင် အီရန်နိုင်ငံရှိနေပြီး သီတင်းပတ်ပေါင်းများစွာ လေ့ကျင့်ပေးခဲ့သည်ဟူသော သတင်းများလည်း ထွက်ပေါ်လျက်ရှိပါသည်။[2]

ယခုကဲ့သို့ တိုက်ခိုက်ခံရမှုသည် မည်သည့်နည်းဖြင့် ဖြစ်ပေါ်လာခဲ့သည် ဖြစ်စေ ယခုတစ်ကြိမ်တွင် အစ္စရေးနိုင်ငံအနေဖြင့် အတော်အထိနာခဲ့ပြီး ဘေးကျပ်နံကျပ် အခြေအနေနှင့် ရင်ဆိုင်နေရပါသည်။ အစ္စရေးနိုင်ငံအနေဖြင့် ထိုက်သင့်သည့် လက်တုံ့ပြန်မှု ပြုလုပ်ပြီး မူလအခြေအနေကို ပြန်လည်တည်ဆောက်ရန် ကြိုးပမ်းလာနိုင်သော်လည်း ပြည်တွင်းနိုင်ငံရေးအကျပ်အတည်းများလည်းရှိနေပါသည်။ ဟားမက်စ်အဖွဲ့နှင့် အလွယ်တကူငြိမ်းချမ်းရေးဆောင်ရွက်မှု၊ လိုက်လျောမှုများဆောင်ရွက်ပါကလည်း ပြည်တွင်းရှိ ပြည်သူများနှင့် ခေါင်းမာဂိုဏ်းသားများ၏ ဆန့်ကျင်မှုကို ခံရမည်ဖြစ်ပြီး စစ်ပွဲကို အရှိန်မြှင့်ပြီးတိုက်ခိုက်ပါကလည်း ပါလက်စတိုင်းအရပ်သားပြည်သူများ များစွာသေဆုံးရမည်ဖြစ်ပြီး အစ္စရေးအပေါ်အမုန်းတရားများနှင့် ကမ္ဘာတစ်ဝှမ်းရှိ ပါလက်စတိုင်းတို့၏ ထကြွမှုများနှင့် ရင်ဆိုင်ရမည်ဖြစ်ပါသည်။ ဤသည်ပင် ဟားမက်စ်တို့၏ လိုလားချက်ဖြစ်ပါသည်။

ယခုတိုက်ခိုက် ခံရမှုသည် အစ္စရေးနိုင်ငံကိုသာမက ၎င်းနှင့် ဆက်ဆံရေးပြေလည်စေရန် ကြိုးပမ်းနေသည့် ဆော်ဒီအာရေဗျနိုင်ငံအပါအဝင် အခြားသော အရှေ့အလယ်ပိုင်းနိုင်ငံများကိုလည်း နိုင်ငံရေးနှင့် သံတမန်ရေးအရ အခက်တွေ့စေပြီး ပါလက်စတိုင်းတို့ဘက်မှသာ ဝင်ရောက် ရပ်တည်ရမည့် အခြေအနေကို လမ်းကြောင်းပေးနေပါသည်။ လက်ရှိအချိန်တွင် အစ္စရေး နိုင်ငံအား အဓိကကူညီမည့် အမေရိကန်နိုင်ငံကိုယ်တိုင် ပြည်တွင်းနိုင်ငံရေးနှင့် စီးပွားရေးအကျပ်အတည်းများရင်ဆိုင်နေရသောကြောင့် အပစ်အခတ်ရပ်စဲရေးဖြစ်မလာနိုင်ဟု တွက်ဆလာကြပါက ဖျက်အားပြင်းလက်နက်များ အသုံးပြုသည့် ဒေသတွင်းစစ်ပွဲကြီး တစ်ခုအသွင်သို့ ရောက်ရှိ လာနိုင်ကြောင်း သုံးသပ်ဖော်ပြလိုက်ရပါသည်။

Myanmar Aspect

129101623

[1]။ “Why Hamas Attacked—and Why Israel Was Taken by Surprise”. Foreign Affair. October 7, 2023, [https://www.foreignaffairs.com/.../martin-indyk-why-hamas...]

[2] ။ “Iran Helped Plot Attack on Israel Over Several Weeks”. The Wall Street Journal. October 8, 2023, [https:// https://www.wsj.com/.../iran-israel-hamas-strike-planning...]

ရုရှားနှင့် တရုတ်နိုင်ငံတို့၏ မီဒီယာအခန်းကဏ္ဍ ပူးပေါင်းဆောင်ရွက်မှုနှင့် ပတ်သက်ပြီးဘာတွေသိထားသင့်သလဲ

 

နိဒါန်း

အနောက်နိုင်ငံများသည် ကမ္ဘာ့လူထုအမြင်ကို လွှမ်းမိုးနိုင်ရန် ကြိုးပမ်းနေ ကြသည့်နည်းတူ အခြားနိုင်ငံများကလည်း နိုင်ငံတကာကို ၎င်းတို့၏ အသံများလွှမ်းမိုးနိုင်ရန် ကြိုးပမ်းနေကြသည်သာဖြစ်ပါသည်။ ရုရှားနှင့် တရုတ်နိုင်ငံတို့ကဲ့သို့ နိုင်ငံများ၏ မီဒီယာလွှမ်းမိုးနိုင်ရေး ကြိုးပမ်းမှုများနှင့် အနောက်နိုင်ငံများ၏ မီဒီယာလွှမ်းမိုးမှုကို စိန်ခေါ်နေသည့် သမားရိုးကျမဟုတ်သည့် မီဒီယာထုတ်လွှင့်မှု နည်းလမ်းများနှင့် ပတ်သက်၍ RT (Russia Today) သတင်းဌာနမှ သတင်းအယ်ဒီတာချုပ် Margarita Simonyan အား မေးမြန်းထားသည့် အင်တာဗျူးဆောင်းပါးကို သုံးသပ်ဖော်ပြသွားပါမည်။[1]

ဖော်ပြချက်

Global Times သတင်းဌာနမှ သတင်းထောက် Wang Wenwen နှင့် Xia Wenxin တို့က RT (Russia Today) သတင်းဌာနမှ သတင်းအယ်ဒီတာချုပ် Margarita Simonyan အား ရုရှားနိုင်ငံ၏ အမာခံဝါဒဖြန့်ချိရေးသမားအဖြစ် ဖော်ပြခဲ့သည့် ကိစ္စရပ်နှင့်ပတ်သက်ပြီး မေးမြန်းရာတွင် Simonyan က အမေရိကန်နိုင်ငံ မီဒီယာနှင့် လူမှုနိုင်ငံရေးတည်ဆောက်ရေးလုပ်ငန်းများသည် RT သတင်းဌာနနှင့် ၎င်း၏ အခန်းကဏ္ဍများနှင့်ပတ်သက်၍ စိတ်ဝင်စားလျက်ရှိကြောင်း၊ အမေရိကန်နိုင်ငံ၏ ၂၀၁၇ ခုနှစ် ရုရှားနိုင်ငံ၏ လွှမ်းမိုးမှုနှင့်ပတ်သက်သည့် အမျိုးသားထောက်လှမ်းရေး အစီရင်ခံစာတွင် ၎င်းအား (၂၇)ကြိမ်ထက်မနည်း ဖော်ပြခြင်းခံခဲ့ရကြောင်း၊ ၎င်းအနေဖြင့် ရုရှားမီဒီယာတွင် အလုပ်ခွင့်ရသည့်အတွက် ဂုဏ်ယူကြောင်းနှင့် ယခုကဲ့သို့ နိုင်ငံတကာ လူထုအကြားတွင် စိတ်ဝင်တစားရှိကြမှုကိုလည်း ဝမ်းသာကြောင်း ပြန်လည်ဖြေကြားထားပါသည်။

သတင်းထောက်များသည် Simonyan ၏ Whirlpool ဝတ္ထုတိုပေါင်းချုပ် စာအုပ်ထွက်ရှိထားမှုနှင့်ပတ်သက်၍ မေးမြန်းခဲ့ရာ ၎င်းအနေဖြင့် မီဒီယာများတွင် မြင်တွေ့ရခဲသည့် ရုရှားလူမျိုးများ၏ အတွေးအခေါ်ပိုင်းဆိုင်ရာနှင့် ရုရှားပြည်သူ များ၏ဘဝကို ရေးသားဖော်ပြခဲ့ခြင်းဖြစ်ကြောင်း၊ ဖတ်ရှုသူများအနေဖြင့် ရုရှားနိုင်ငံ၏ လူနေမှုဘဝများကို နားလည်လာနိုင်လိမ့်မည်ဟု မျှော်လင့်ကြောင်း ဖြေကြားခဲ့ပါသည်။ Simonyan အား လုပ်ကြံသတ်ဖြတ်ရန်ကြိုးစားခံရမှုနှင့်ပတ်သက်ပြီး ဖြေကြားရာတွင် ၎င်းသည် သတင်းထောက်တစ်ဦးဖြစ်ပြီး တာဝန်နှင့် ဝတ္တရားအရ သတင်းအမှန်ကို မီဒီယာအပေါ် ချပြရမည်ဖြစ်ကြောင်း၊ နိုင်ငံသားတစ်ဦးအနေဖြင့်လည်း ၎င်း၏ မိခင် နိုင်ငံတော်အတွက် အမှန်တရားဘက်မှ ရပ်တည်၍ အသက်အသေခံနိုင်ကြောင်း၊ အဆိုပါစွန့်လွှတ်မှုသည် ရောဂါဖြင့် သေဆုံးခြင်း၊ သို့မဟုတ် နိုင်ငံတော်သစ္စာဖောက်နှင့် တစ်ဘဝလုံးအရှက်မဲ့စွာနေခြင်းတို့ထက် ပို၍မွန်မြတ်သည်ဟု ဖြေကြားထားပါသည်။

ရုရှား-ယူကရိန်း ပဋိပက္ခနှင့်ပတ်သက်၍ ရုရှားနိုင်ငံနှင့် အနောက်နိုင်ငံများ၏ မီဒီယာများအကြားတွင် မတူညီသည့် ရှုထောင့်နှင့်အမြင်များရှိနေပါသည်။ အဆိုပါ မတူကွဲပြားမှုတွင် RT သတင်းဌာနကို အနောက်နိုင်ငံလူထုမှ ယုံကြည်လာအောင် လုပ်ဆောင်ရာတွင် ကြုံတွေ့ရသည့် အခက်အခဲများနှင့်ပတ်သက်၍ ဖြေကြားရာတွင် Simonyan က နောက်ဆုံးတွင် အမှန်တရားသာ အနိုင်ရမည်ဖြစ်ကြောင်း၊ ၎င်းတို့ အနေဖြင့် အမှန်တရားအတွက် တိုက်ခိုက်နေရကြောင်း၊ တကယ့်မြေပြင်လက်တွေ့တွင်ဖြစ်ပေါ်နေသည့် အမှန်တရားများကို ပြည်သူများမြင်နိုင်ရန်အတွက် ကြိုးပမ်းနေခြင်း ဖြစ်ကြောင်း၊ လွန်ခဲ့သည့် နှစ်များကတည်းက ပြည်သူလူထုသည် အနောက်မီဒီယာ များ၏ လုပ်ကြံပုံပြင်များကို ယုံကြည်မှုနည်းပါးလာခဲ့ကြောင်း၊ ထို့နောက် RT မီဒီယာကို လက်ခံခဲ့ကြခြင်းဖြစ်သည်ဟု ပြန်လည်ဖြေကြားခဲ့ပါသည်။

ရုရှား-ယူကရိန်း ပဋိပက္ခဖြစ်ပြီးမကြာမီအချိန်တွင် အမေရိကန်နိုင်ငံနှင့် EU တို့သည် ရုရှားနိုင်ငံပိုင် RT နှင့် Sputnik သတင်းဌာနများတို့ကို မီဒီယာအား ကြိုးကိုင် ခြယ်လှယ်ခြင်း၊ မမှန်ကန်သည့်သတင်းများ ထုတ်လွှတ်ခြင်းဟူသော စွပ်စွဲချက်များဖြင့် တားမြစ်ပိတ်ပင်ခဲ့ခြင်းများနှင့် ပတ်သက်ပြီးမေးမြန်းရာတွင် Simonyan အနောက် အုပ်စုနိုင်ငံများသည် လွန်ခဲ့သည့်ဆယ်စုနှစ်ကာလကတည်းက ယူကရိန်းနိုင်ငံအတွင်းဖြစ်ပွားလျက်ရှိသည့် အခြေအနေများအား မမှန်မကန်ထုတ်လွှင့်လျက်ရှိကြောင်း၊ RT မီဒီယာအား နှုတ်ပိတ်နိုင်ရန် ကြိုးပမ်းခဲ့ကြောင်းနှင့် ပြည်သူလူထုအား ယူကရိန်း-ရုရှားအရေးနှင့် ပတ်သက်၍ အမှန်တရားနှင့် ယုံကြည်မှုကို လွတ်လပ်စွာ ဆုံးဖြတ်ခွင့် မပေးကြောင်း၊ ထို့ကြောင့် တရားမဝင်နည်းလမ်းပေါင်းစုံကိုသုံး၍ RT မီဒီယာအား ကန့်သတ်နေပြီး ၎င်းတို့၏ လုပ်ရပ်များကို ဖုံးကွယ်နေခြင်းဖြစ်ကြောင်း၊ ထိုအချက်ကို ကြည့်ခြင်းအားဖြင့် ဥရောပနှင့် အမေရိကန်နိုင်ငံတို့တွင် သတင်းမီဒီယာလွတ်လပ်ခွင့် ဆုံးရှုံးနေသည်ကို တွေ့ရကြောင်း၊ RT အပေါ် စွပ်စွဲချက်များတွင် သက်သေ အထောက်အထားများမရှိသော်လည်း အနောက်အုပ်စုနိုင်ငံများသည် ၎င်းတို့ကြွေးကြော် နေသည့် လွတ်လပ်သောမီဒီယာဟူသည့် ဝါဒနှင့်သွေဖည်နေကြောင်း ဖြေကြားထားပါသည်။

တရုတ်နှင့် ရုရှား မီဒီယာတို့အနေဖြင့် နိုင်ငံတကာကို မီဒီယာကဏ္ဍတွင် ထိုးဖောက်ရန်ကြိုးပမ်းနေမှုတွင် တွေ့ကြုံနေရသည့် စိန်ခေါ်မှုများနှင့် ပတ်သက်ပြီး မေးမြန်းရာတွင် Simonyan က နိုင်ငံတကာသတင်းနယ်ပယ်တွင် ရုရှားနှင့် တရုတ် မီဒီယာတို့ ပူးပေါင်းဆောင်ရွက်ခြင်းသည် အလွန်အရေးကြီးကြောင်း၊ ၎င်းတို့အနေဖြင့် အနောက်အုပ်စုနိုင်ငံများ၏ မီဒီယာလွှမ်းမိုးမှုကို ရင်ဆိုင်ရမည်ဖြစ်ပြီး အဆိုပါ တစ်ဖက်သတ် လွှမ်းမိုးမှုများသည် ကမ္ဘာကြီးအတွက် အန္တရာယ်များကြောင်း၊ ထို့နောက် တရုတ်နိုင်ငံ၏ ဆိုရှယ်မီဒီယာများအကြားတွင် RT သတင်းဌာန ပူးပေါင်းနိုင်မှုကို ဂုဏ်ယူကြောင်းနှင့် RT အနေဖြင့် တရုတ်နိုင်ငံဆိုရှယ်မီဒီယာများတွင် AFP ၊ Financial Times ၊ Associated Press နှင့် BBC သတင်းဌာနတို့ထက် ရှေ့ကဦးဆောင်လျက် ရှိကြောင်း ဖြေကြားထားပါသည်။

အမေရိကန်နိုင်ငံအစိုးရ၏ လက်ရှိ တရုတ်ကြောက်ရောဂါ (Sinophobia)နှင့် ရုရှားကြောက်ရောဂါ(Russophobia)များနှင့်ပတ်သက်ပြီး မေးမြန်းရာတွင် Simonyan က အမေရိကန်နိုင်ငံသည် သမိုင်းကြောင်းတစ်လျှောက်တွင် ကြုံတွေ့ခဲ့ရသည့် Salem Witch Hunts ဖြစ်စဉ်၊ မူလအမေရိကန်နိုင်ငံသားများနှင့် အမေရိကန်လူမဲများ သတ်ဖြတ်ခံရမှုနှင့် ကွန်မြူနစ်ဝါဒအား ကြောက်ရွံ့မှုများမှစ၍ အကြောက်တရားများ ဝင်ခဲ့ရကြောင်း၊ အမေရိကန်လူ့အဖွဲ့အစည်း၏ ထိုအကြောက်တရားများကို လမ်းလွှဲရန် အခြားဆန့်ကျင့်ဘက်အရာတစ်ခုကို တိုက်ရိုက်၊ သို့မဟုတ် သွယ်ဝိုက်ပြီး ဖန်တီး နေရကြောင်း၊ ထို့ကြောင့် အမေရိကန်နိုင်ငံ၏ လက်ရှိ တရုတ်ကြောက်ရောဂါနှင့် ရုရှားကြောက်ရောဂါတို့သည်လည်း လူမျိုးရေးအစွန်းရောက်မှုလက်သစ်ဝါဒ (Classic Racism)နှင့် ဖက်ဆစ်ဝါဒ(Fascism)တို့ ကွဲပြားခြားနားမှု သိပ်မရှိလှကြောင်း ဖြေကြား ထားပါသည်။

ထို့နောက် အမေရိကန်မီဒီယာအများစုသည် အစိုးရပိုင်များ မဟုတ်သော်လည်း နိုင်ငံတကာအရေးကိစ္စရပ်များတွင် မီဒီယာများအနေဖြင့် တစ်သံတည်းထွက်ကြခြင်း၊ အမေရိကန်နိုင်ငံရေးသမားများအနေဖြင့် မီဒီယာအား မည်ကဲ့သို့ လွှမ်းမိုးလျက်ရှိသည်ကို မေးမြန်းခဲ့ရာတွင် Simonyan က အမေရိကန်သတင်းမီဒီယာ၊ ပုဂ္ဂလိက သတင်းဌာန များသည် အမေရိကန်နိုင်ငံခြားရေးမူဝါဒနှင့်အညီသာ ရေးသားဖော်ပြရကြောင်း၊ Hollywood ရုပ်ရှင်နှင့် TV ထုတ်လွှင့်ရေးတို့သည်လည်း အမေရိကန်စစ်တပ်ကောင်းကြောင်းကို ထုတ်လွှင့်ရန်အတွက် ပူးပေါင်းလုပ်ဆောင်လျက်ရှိသည်သာဖြစ်ကြောင်း၊ ထို့ကြောင့် အမေရိကန်မီဒီယာများအနေဖြင့် ကွဲပြားခြားနားသည်ဆိုခြင်းမှာ အပေါ်ယံမျှသာဖြစ်ပြီး အမေရိကန်နိုင်ငံ၏ နိုင်ငံရေးနှင့် မီဒီယာကဏ္ဍတို့သည် လက်တွေ့တွင် မူဝါဒတစ်ခု တည်းဖြင့် ပူးပေါင်းလုပ်ဆောင်နေကြသည်သာဖြစ်ကြောင်း ဖြေကြားထားပါသည်။

တွေ့ရှိသုံးသပ်ချက်

အမေရိကန်နိုင်ငံသည် ဒုတိယကမ္ဘာစစ်ပြီးနောက်ပိုင်းတွင် ကမ္ဘာ့ဦးဆောင်မှု အခန်းကဏ္ဍကိုရယူလာပြီး စစ်အေးကာလတစ်လျှောက် ဆိုဗီယက်ပြည်ထောင်စုနှင့် ယှဉ်ပြိုင်ခဲ့ပြီး ဆိုဗီယက်ပြည်ထောင်စုပြိုကွဲသွားသည့်အခါတွင် ပြိုင်ဘက်မရှိ ဦးဆောင်သူ အဖြစ် ရယူနိုင်ခဲ့ပါသည်။ ထိုကဲ့သို့အောင်မြင်လာခဲ့မှုသည် ၎င်း၏ စစ်ရေးအခန်းကဏ္ဍကို မြင့်မားအောင်ဆောင်ရွက်နိုင်ခဲ့ခြင်း တစ်ခုတည်းကြောင့်မဟုတ်ဘဲ Soft Power များ ဖြစ်သည့် နည်းပညာတိုးတက်မှု၊ စီးပွားရေးအောင်မြင်မှု၊ ပညာရေးမြင့်မားမှု၊ သဘောတရားရေးရာနှင့် ဝါဒဖြန့်ချိရေးကဏ္ဍများတွင် အားကောင်းအောင် တည်ဆောက်နိုင်ခဲ့မှု များကြောင့် ထိုသို့ အောင်မြင်လာခဲ့ရခြင်းဖြစ်ပါသည်။ ယခုအချိန်တွင်လည်း ကမ္ဘာ့ မီဒီယာလွှမ်းမိုးချုပ်ကိုင်မှုကို အမေရိကန်နိုင်ငံ ဦးဆောင်သည့် အနောက်အုပ်စုမှ အသာစီးရယူထားနိုင်ဆဲဖြစ်ပြီး ရုရှားနှင့် တရုတ်နိုင်ငံတို့အနေဖြင့်လည်း အနောက်အုပ်စု မီဒီယာများကို တန်ပြန်နိုင်ရန် ပူးပေါင်းဆောင်ရွက်လာကြပါသည်။

ဆောင်းပါးတွင် RT သတင်းအယ်ဒီတာချုပ် Simonyan ၏ ဖြေကြားချက်များတွင်လည်း အမေရိကန်နိုင်ငံသည် အများအမြင်တွင် ကွဲပြားခြားနားသော မီဒီယာလွတ်လပ်ခွင့်ကို ပေးထားသည်ဟု ပုံဖော်ထားသော်လည်း နိုင်ငံခြားရေးမူဝါဒ၊ အထူးသဖြင့် အမေရိကန် နိုင်ငံ၏ အမျိုးသားအကျိုးစီးပွားနှင့်ပတ်သက်၍ တစ်သံတည်းထွက်ကြသည်ကို ထောက်ပြထားပါသည်။ ဥပမာအားဖြင့် အမေရိကန်နိုင်ငံ၏ Hollywood အပါအဝင် အခြားမည်သည့် မီဒီယာတွင်မဆို အမေရိကန်စစ်တပ်နှင့် လုံခြုံရေးအဖွဲ့အစည်းများကို တိုက်ရိုက်ဖြစ်စေ၊ သွယ်ဝိုက်၍ဖြစ်စေ ဂုဏ်တင်၍ ရိုက်ကူးထားသည့် ရုပ်ရှင်/ဗီဒီယိုများစွာကို တွေ့ရမည်ဖြစ်ပြီး အမေရိကန်နိုင်ငံ၏ ပြိုင်ဘက်နိုင်ငံများအား ဂုဏ်တင်ထုတ်လွှင့်ခြင်းမှာ မရှိသလောက်ရှားပါးလှပါသည်။ ထို့ကြောင့် အနောက်နိုင်ငံများ၏ မီဒီယာ လွတ်လပ်ခွင့်ဆိုသည်မှာ ၎င်းတို့၏ နိုင်ငံခြားရေးမူဝါဒနှင့် ပတ်သက်ပြီး တစ်သံတည်းထွက်ကြရသည်သာဖြစ်ပြီး နိုင်ငံ၏ ဥပဒေဘောင်အတွင်းမှသာ လွတ်လပ်ခွင့်ပေးခြင်းမျိုး ဖြစ်ပါသည်။

ယခုအခါ ရုရှားနှင့် တရုတ်နိုင်ငံတို့ အနေဖြင့် အမေရိကန်နိုင်ငံနှင့် အနောက်အုပ်စု၏ မီဒီယာလွှမ်းမိုးမှုကို တန်ပြန်နိုင်ရန်သတင်းမီဒီယာကဏ္ဍများတွင်သာမက ဆိုရှယ်မီဒီယာအသုံးချမှုများတွင်ပါ ပူးပေါင်း ဆောင်ရွက်လာကြသည်ကို တွေ့ရှိရပါသည်။ သို့သော်လည်း ကမ္ဘာလုံးဆိုင်ရာအနေဖြင့် နိုင်ငံငယ်များအပေါ် လွှမ်းမိုးထားသော အနောက်အုပ်စု မီဒီယာများကို လွှမ်းမိုးနိုင်ရန်မှာ ထင်သလောက်မလွယ်ကူဘဲ ယခုထက်ပို၍ ပြီးပြည့်စုံသော မဟာဗျူဟာပူးပေါင်းဆောင်ရွက်မှုများနှင့် ငွေကြေးသုံးစွဲနိုင်မှုများ လိုအပ်နေဆဲဖြစ်ပါသည်။ မီဒီယာကဏ္ဍလွှမ်းမိုးနိုင်ရန် အဓိကလိုအပ်ချက်တစ်ခုမှာ အင်္ဂလိပ်ဘာသာ အပါအဝင် ဘာသာစကားပေါင်းစုံကို လွှမ်းခြုံနိုင်သည့် ငွေကြေးအင်အားသုံးစွဲနိုင်မှု၊ Think-Tank အမည်များဖြင့် ဖွဲ့စည်းထားရှိသော သုတေသနကွန်ရက်များဖြန့်ကျက်ထားနိုင်မှုနှင့် ပူးပေါင်းဆောင်ရွက်မှုတို့အပြင် ယခုခေတ်ကာလ၌ ဆိုရှယ်မီဒီယာနှင့် နည်းပညာကဏ္ဍများက အရေးပါလျက်ရှိပါသည်။ ထို့ကြောင့် ကမ္ဘာ့မီဒီယာနှင့် ဝါဒဖြန့်ချိရေးယှဉ်ပြိုင်မှုတွင် နိုင်ငံငယ်များအနေဖြင့် အခြားဝါဒဖြန့်ချိရေးယန္တရားများမှ ကာကွယ်ထားနိုင်ခြင်းနှင့် အမှန်တရားကို ထိရောက်စွာ ဖော်ထုတ်ချပြတတ်ရန်၊ နည်းစနစ်များကို သိရှိရန်မှာ သက်ဆိုင်ရာနိုင်ငံများ၏ ပညာခန်းပင်ဖြစ်ပါကြောင်း သုံးသပ်ဖော်ပြလိုက်ပါသည်။

Myanmar Aspect

128101323

[1]။ Wang Wenwen and Xia Wenxin. “Russian, Chinese media working together a matter of survival of Russian and Chinese voices on a global stage: RT editor-in-chief”. Global Times. October 5, 2023, [https:// www.globaltimes.cn/page/202310/1299249.shtml]

တရုတ်နိုင်ငံသည် ပါကစ္စတန်နိုင်ငံနှင့် ဆောင်ရွက်နေသည့် BRI စီမံကိန်းဆိုင်ရာ ရင်းနှီးမြှုပ်နှံမှုများကိုငြင်းဆိုခဲ့ခြင်းနှင့်ပတ်သက်ပြီး ဘာတွေသိထားသင့်သလဲ

 

နိဒါန်း

တရုတ်နိုင်ငံသည် ၎င်း၏ ကာလရှည်အကျိုးစီးပွားအတွက် အာမခံချက် နည်းပါးလာသည့် ပါကစ္စတန်နိုင်ငံအတွင်း ရင်းနှီးမြှုပ်နှံမှုလုပ်ငန်းများကို လျှော့ချရန် ကြိုးပမ်းနေခြင်းနှင့်ပတ်သက်ပြီး သုံးသပ်ဖော်ပြသွားပါမည်။ [1]

ဖော်ပြချက်

တရုတ်-ပါကစ္စတန် နှစ်နိုင်ငံအကြား အဆင့်မြင့်ဆွေးနွေးပွဲတစ်ခုတွင် တရုတ် နိုင်ငံသည် ပါကစ္စတန်နိုင်ငံနှင့် ဆောင်ရွက်နေသည့်ပိုးလမ်းမစီမံကိန်း(Belt and Road Projects) များတွင် ရင်းနှီးမြှုပ်နှံမှုများလုပ်ဆောင်ရန် တောင်းဆိုမှုများကို ငြင်းပယ်ခဲ့ပါသည်။ ပါကစ္စတန်နိုင်ငံအတွင်း နိုင်ငံရေးပြဿနာများနှင့် လုံခြုံရေးမတည်ငြိမ်မှုများကြောင့် ငြင်းပယ်ခဲ့ခြင်းဖြစ်သည်ဟု ပညာရှင်များက သုံးသပ်နေကြပါသည်။ ပါကစ္စတန်နိုင်ငံသည် တရုတ်-ပါကစ္စတန် စီးပွားရေးစင်္ကြံ(China-Pakistan Economic Corridor-CPEC) အောက်ရှိ စွမ်းအင်ကဏ္ဍ၊ ရာသီဥတုပြုပြင်ပြောင်းလဲရေးကဏ္ဍ၊ လျှပ်စစ်ထုတ်လုပ်မှုကဏ္ဍနှင့် ခရီးသွား လုပ်ငန်းကဏ္ဍများတွင် ရင်းနှီးမြှုပ်နှံမှုအသစ်များ ထပ်မံပြုလုပ်ရန် တောင်းဆိုခဲ့ခြင်းဖြစ်ပါသည်။ တရုတ်နိုင်ငံသည် ပိုးလမ်းမစီမံကိန်း၏ တစ်စိတ်တစ်ပိုင်းဖြစ်သည့် CPEC တွင် အမေရိကန် ဒေါ်လာ ၅၀ ဘီလီယံခန့် ရင်းနှီးမြှုပ်နှံခဲ့ပြီးဖြစ်ပါသည်။

ထို့ပြင် တရုတ်နိုင်ငံသည် ပါကစ္စတန်နိုင်ငံ၏ တောင်ဘက်ဆိပ်ကမ်းမြို့ Gwadar မှ Karachi မြို့သို့ ချိတ်ဆက်မည့် ဓာတ်ငွေ့ပိုက်လိုင်းကွန်ရက်စနစ်နှင့် ၅၀၀ ကီလိုဗို့အား ထုတ်လွှင့်မှုစနစ်တည်ဆောက်မည့် စီမံကိန်းကိုလည်း ငြင်းဆိုထားသကဲ့သို့ ၎င်းကျောက်မီးသွေးသုံး ဓာတ်အားပေးစက်ရုံကို ပြည်ပမှ တင်ပို့လာသည့် ကျောက်မီးသွေးများထက် ပြည်တွင်းထုတ်ကျောက်မီးသွေးများကိုသာ အသုံးပြုနိုင်သည့် နေရာသို့ ပြောင်းရွှေ့ရန်အချက်ကိုလည်း ငြင်းဆိုထားပါသည်။ ထို့နောက် CPEC အတွက် အရေးပါသည့် (၁၁)ကြိမ်မြောက် Joint Cooperation Committee (JCC)ကို ၂၀၂၂ ခုနှစ်၊ အောက်တိုဘာလတွင် ကျင်းပပြုလုပ်ခဲ့သော်လည်း နောက်ဆုံးအစည်းအဝေးမှတ်တမ်း အစီရင်ခံစာကိုမူ ၂၀၂၃ ခုနှစ်၊ ဇူလိုင်လတွင် လက်မှတ်ရေးထိုးခဲ့ကြပါသည်။ ထိုအချက်ကို ကြည့်ခြင်းအားဖြင့် တရုတ်နိုင်ငံသည် ပါကစ္စတန်နိုင်ငံအရေးကိစ္စတွင် ထဲထဲဝင်ဝင် ပါဝင်ခြင်းမရှိတော့ဟု ဆိုသည်။ သို့သော် ပါကစ္စတန်စီမံကိန်းနှင့် ဖွံ့ဖြိုး တိုးတက်ရေးဝန်ကြီးဌာနကမူ နှစ်နိုင်ငံအကြား CPEC ကဏ္ဍများ၌ တိုးချဲ့လုပ်ဆောင် သွားရန်ကတိပြုခဲ့သည်ဟု ဆိုထားပါသည်။

ပိုးလမ်းမစီမံကိန်း ၁၀ နှစ်ပြည့်အထိမ်းအမှတ်တွင် တရုတ်နိုင်ငံသည် အခြေခံ အဆောက်အဦတည်ဆောက်ရေးနှင့် ၎င်း၏ ဩဇာလွှမ်းမိုးမှုကို အာရှမှ ဥရောပ၊ ဥရောပမှ အာဖရိကဒေသများအထိ ချဲ့ထွင်နိုင်ရန် ကြိုးပမ်းလုပ်ဆောင်သွားမည်ဟု ပြောကြားထား သော်လည်း ၎င်းကိုယ်တိုင် စီးပွားရေးကျဆင်းနေသောကြောင့် ပြည်ပရင်းနှီးမြှုပ်နှံမှု များကို အထူးသတိပြုရွေးချယ်ဆောင်ရွက်နေဟန်တူပါသည်။ တရုတ်နိုင်ငံအနေဖြင့် BRI ရင်းနှီးမြှုပ်နှံမှုများကို အတွေ့အကြုံဟောင်းများအပေါ်တွင်သာမက တရုတ်နိုင်ငံ၏ မဟာဗျူဟာရည်မှန်းချက်ကို အကောင်အထည်ဖော်ရန် ရင်းနှီးမြှုပ်နှံမှုများမှတစ်ဆင့် မည်သို့ပိုမိုထိရောက်အောင် ဆောင်ရွက်မည်ဟူသည့် အချက်ပေါ်တွင် ချိန်ညှိနိုင်ရန် ဆောင်ရွက်မည်ဟု ပြောကြားထားပါသည်။ ထို့ပြင် တရုတ်နိုင်ငံ၏ ရေရှည်တည်ငြိမ်မှုကိုရှေးရှုကာ ပါးနပ်လိမ္မာစွာဖြင့် မျှော်မှန်း လုပ်ဆောင်သွားမည်ဟု ဆိုထားပါသည်။ ထို့ကြောင့် ပါကစ္စတန်နိုင်ငံကဲ့သို့ လုံခြုံရေးအာမခံချက် မရှိသည့် အထူးသဖြင့် တရုတ်နိုင်ငံသားများအပေါ် လုံခြုံမှုမပေးနိုင်သည့် မိတ်ဖက် နိုင်ငံများတွင် ရင်းနှီးမြှုပ်နှံမှုများလုပ်ဆောင်ရန် စိုးရိမ်လျက်ရှိနေပါသည်။ ကမ္ဘာလုံးဆိုင်ရာနှင့် ဒေသတွင်း စိန်ခေါ်မှုများ ဖြစ်ပေါ်နေစဉ်အတွင်း မိတ်ဖက်နိုင်ငံများ၌ တရုတ်နိုင်ငံ၏ မဟာဗျူဟာအကျိုးစီးပွားနှင့် ရေရှည်အောင်မြင်မှုကို ရည်မှန်း၍ ရင်းနှီးမြှုပ်နှံမှုလုပ်ဆောင်ခြင်းကို ထိန်းညှိနိုင်ရန်မှာ မရှိမဖြစ်အရေးကြီးသည်ဟု တရုတ်နိုင်ငံနှင့် ကမ္ဘာလုံးဆိုင်ရာ သုတေသနစင်တာမှ တရုတ်နိုင်ငံဆိုင်ရာပညာရှင် Andy Mok က ပြောကြားထားပါသည်။

၂၀၂၂ ခုနှစ်၊ ဧပြီလတွင် ပါကစ္စတန်နိုင်ငံဝန်ကြီးချုပ် Imran Khan နှင့် ၎င်းအစိုးရ အဖွဲ့ဖြုတ်ချခံခဲ့ရပြီးနောက် ပါကစ္စတန်နိုင်ငံအတွင်း နိုင်ငံရေးမတည်ငြိမ်မှုများ ဖြစ်ပေါ် ခဲ့ပြီး ဆန္ဒပြမှုများလည်း ဖြစ်ပေါ်လာခဲ့ပါသည်။ ထို့ပြင် ပါကစ္စတန်သူပုန်များသည် ပါကစ္စတန်နိုင်ငံအတွင်းရှိ တရုတ်နိုင်ငံ၏ အကျိုးစီးပွားများကို ပစ်မှတ်ထားတိုက်ခိုက် ခဲ့ကြပြီး CPEC စီမံကိန်းတွင်ပါဝင်သည့် တရုတ်အင်ဂျင်နီယာလုပ်သားများအား ချောင်းမြောင်း တိုက်ခိုက်ခြင်းများ၊ အသေခံဗုံးခွဲ တိုက်ခိုက်ခြင်းများ လုပ်ဆောင်ခဲ့ကြပါသည်။ သို့ဖြစ်၍ ပါကစ္စတန်နိုင်ငံအတွင်း တရုတ်နိုင်ငံ၏ရင်းနှီးမြှုပ်နှံမှုများအား ငြင်းပယ်မှုများတွင် အခြား ပြဿနာရပ်များ ရှိနိုင်သော်လည်း နိုင်ငံအတွင်း လုံခြုံရေးမတည်ငြိမ်မှုများသည် အဓိက ကိစ္စရပ်တစ်ခုဖြစ်နိုင်ပါသည်။ ပထဝီနိုင်ငံရေးအရ အရေးပါသည့်ဒေသဖြစ်သော်လည်း ဒုစရိုက်နယ်မြေတစ်ခု ဖြစ်သောကြောင့် ရင်းနှီးမြှုပ်နှံမှုများ ထပ်တိုးလုပ်ဆောင်ရန် ဝန်လေးနေကြောင်းနှင့် ၎င်း၏ လူအင်အားနှင့် စက်ရုံပစ္စည်းပိုင်ဆိုင်မှုများကို ပါကစ္စတန် နိုင်ငံအတွင်းထားရှိခြင်းသည် အန္တရာယ်များသည့်လုပ်ရပ်အဖြစ် သတ်မှတ်ထားသည်ဟု ကျွမ်းကျင်ပညာရှင်များက သုံးသပ်ထားပါသည်။

ပါကစ္စတန်နိုင်ငံကလည်း CPEC စီမံကိန်းတွင် ပါဝင်သည့် တရုတ်နိုင်ငံသား များနှင့်ပတ်သက်၍ လုံခြုံရေးကဏ္ဍကို တိုးမြှင့်လုပ်ဆောင်ရန် သဘောတူညီခဲ့ပြီး တရုတ်လုပ်သားများအတွက် ကျည်ကာယာဉ်များကို အသုံးပြုခြင်းများ ဆောင်ရွက်နေ သော်လည်း တရုတ်နိုင်ငံအနေဖြင့် အလိုမကျသည့် အခြားအကြောင်းအရာများ ရှိနေ နိုင်ပါသည်။ မဟာဗျူဟာနှင့် နိုင်ငံရေးဆိုင်ရာ သုတေသနပညာရှင် Qamar Cheema ၏ သုံးသပ်ချက်အရ ပါကစ္စတန်နိုင်ငံရေးသမားများသည် CPEC စီမံကိန်းများကို တရုတ်- ပါကစ္စတန် စီးပွားရေးပူးပေါင်းဆောင်ရွက်မှုမြှင့်တင်ရန်ထက် ၎င်းတို့၏ ရွေးကောက်ပွဲ အနိုင်ရရှိရေးအကျိုးအမြတ်အဖြစ် အသုံးချလျက်ရှိပါသည်။ ကြန့်ကြာမှုများရှိနေခဲ့ သော်လည်း လာမည့်ဇန်နဝါရီလတွင် ပါကစ္စတန်နိုင်ငံအတွင်း ရွေးကောက်ပွဲ ကျင်းပ လာနိုင်ဖွယ်ရှိသည်ဟု ဆိုပါသည်။

ထို့ပြင် တရုတ်နိုင်ငံအနေဖြင့် CPEC စီမံကိန်းများတွင် ရင်းနှီးမြှုပ်နှံမှုများ ဆက်လက်လုပ်ဆောင်ခြင်းသည် တရုတ်နိုင်ငံအတွက် အကျိုးစီးပွား ဖြစ်/မဖြစ်နှင့် ပတ်သက်၍ မေးခွန်းထုတ်စရာရှိလာပါသည်။ ကာလတိုကိုသာကြည့်၍ ပါကစ္စတန် နိုင်ငံမှ အကျိုးအမြတ်ရရှိရန်ကြိုးပမ်းခြင်းသည် အန္တရာယ်များသောလုပ်ရပ်တစ်ခုဖြစ်ကြောင်းနှင့် လက်ရှိတွင် ပါကစ္စတန်နိုင်ငံသည် တရုတ်စွမ်းအင်ကုမ္ပဏီကြီးများအပေါ်တွင် အမေရိကန် ဒေါ်လာ ၁.၂ ဘီလီယံခန့် အကြွေးတင်နေပြီး နိုင်ငံအတွင်း ငွေကြေးပြတ်လပ်မှု များကြောင့် အကြွေးဆပ်နိုင်ခြင်းမရှိသေးပါ။ ထို့ကြောင့် တရုတ်နိုင်ငံသည် အကျိုးအမြတ်များ ရရှိနိုင်မည်ဖြစ်သော်လည်း အထူးသဖြင့် စွမ်းအင်ကဏ္ဍတွင် ပြဿနာများစွာ ကြုံတွေ့ ရနိုင်သည်ဟု Virginia တက္ကသိုလ်မှ ကမ္ဘာလုံးဆိုင်ရာလေလာရေး လက်ထောက် ကထိက Muhammad Tayyab Safdar က ပြောကြားခဲ့ပါသည်။ ထို့နောက် သုတေသန ပညာရှင် Garlick က တရုတ်အစိုးရအနေဖြင့် CPEC အား ၎င်းနိုင်ငံနှင့် ဒေသအတွက် စီးပွားရေးဆိုင်ရာ အကျိုးကျေးဇူးများထပ်မံရရှိမည့် စီမံကိန်းအဖြစ်ယုံကြည်ခြင်းမရှိတော့ဟု ပြောကြားထားပါသည်။

ပါကစ္စတန်နိုင်ငံမှ သုတေသနပညာရှင် Cheema ကမူ ပါကစ္စတန်နိုင်ငံသည် တရုတ်နိုင်ငံ၏ တောင်အာရှဈေးကွက်အတွက် အရေးပါသည့်နိုင်ငံဖြစ်ပြီး တရုတ် ရင်းနှီးမြှုပ်နှံသူများအတွက် အရေးပါလျက်ရှိကြောင်းနှင့် ရွေးကောက်ပွဲပြီးနောက်တွင် ရင်းနှီးမြှုပ်နှံမှုများ ပြန်လည်လုပ်ဆောင်လာနိုင်သည်ဟု ပြောကြားထားပါသည်။ တစ်ဖက်တွင်လည်း သုတေသနပညာရှင် Garlick က တရုတ်နိုင်ငံအနေဖြင့် ကာလ ရှည်ကြာရင်းနှီးမြှုပ်နှံမှုများ ဆောင်ရွက်ပြီးနောက် ပါကစ္စတန်နိုင်ငံအား မွေးရာပါ နိုင်ငံရေးမတည်ငြိမ်သည့်နိုင်ငံအဖြစ် သတ်မှတ်ထားပြီးဖြစ်ကြောင်းနှင့် တည်ငြိမ်သည့်စီးပွားရေးတိုးတက်မှုများ ရရှိနိုင်မည်ဟု မယုံကြည်တော့ကြောင်း ဖော်ပြထားပါသည်။

တွေ့ရှိသုံးသပ်ချက်

တရုတ်နိုင်ငံနှင့် ပါကစ္စတန်နိုင်ငံတို့သည် ၁၉၅၁ ခုနှစ်တွင် သံတမန်ဆက်ဆံရေးကို တည်ထောင်ခဲ့ကြပြီး ၎င်းကာလများအတွင်း စီးပွားရေးပူးပေါင်းဆောင်ရွက်မှုများလည်း လုပ်ဆောင်ခဲ့ကြပါသည်။ ထို့နောက် ၁၉၇၀ ပြည့်နှစ်များတွင် နှစ်နိုင်ငံအကြား ခိုင်မာ အားကောင်းသည့် စီးပွားရေးမိတ်ဖက်လုပ်ငန်းများကို စတင်နိုင်ခဲ့ပြီး ၁၉၉၀ ပြည့်နှစ် များတွင် မဟာဗျူဟာမြောက်သည့် စီးပွားဖက်အဖြစ် သတ်မှတ်ခဲ့ကြပါသည်။ ထိုအချိန်တွင် တရုတ်နိုင်ငံသည် ပါကစ္စတန်နိုင်ငံ၏ အခြေခံအဆောက်အဦ၊ ဆက်သွယ်ရေး၊ စွမ်းအင်နှင့် သယ်ယူပို့ဆောင်ရေးလုပ်ငန်းများ၌ အဓိကရင်းနှီးမြှုပ်နှံသည့် နိုင်ငံတစ်နိုင်ငံဖြစ်လာ ခဲ့ပါသည်။ ၂၀၁၃ ခုနှစ်တွင် ပိုးလမ်းမစီမံကိန်းအောက်မှ တရုတ်-ပါကစ္စတန် စီးပွားရေး စင်္ကြံ(China-Pakistan Economic Corridor -CPEC)ကို စတင်အကောင်အထည် ဖော်ခဲ့ပြီး တရုတ်နိုင်ငံသည် ပါကစ္စတန်နိုင်ငံ၏ အဓိကကုန်သွယ်ဖက်နိုင်ငံဖြစ်လာကာပူးပေါင်းဆောင်ရွက်ရေးလုပ်ငန်း အများအပြား လုပ်ဆောင်ခဲ့ကြပါသည်။

ထို့နောက် ၂၀၂၂ ခုနှစ်၊ ဧပြီလတွင် ပါကစ္စတန်နိုင်ငံဝန်ကြီးချုပ် Imran Khan နှင့် ၎င်းအစိုးရအဖွဲ့ ဖြုတ်ချခံခဲ့ရပြီးနောက် ပါကစ္စတန်နိုင်ငံအတွင်း နိုင်ငံရေးမတည်ငြိမ်မှုများ ဖြစ်ပေါ်လာခဲ့ပါသည်။ ထိုသို့ ဖြုတ်ချမှု၏ နောက်ကွယ်တွင် အမေရိကန်နိုင်ငံရှိနေသည် ဟူသော သုံးသပ်ချက်များလည်းထွက်ပေါ်ခဲ့ပြီး[2] ပါကစ္စတန်နိုင်ငံအတွင်း တရုတ်စီးပွားရေး လုပ်ငန်းများကို ပစ်မှတ်ထားတိုက်ခိုက်မှုများ၊ တရုတ်နိုင်ငံသားများအတွက် လုံခြုံရေး အာမခံချက် မရှိမှု၊ အကြမ်းဖက်ဗုံးခွဲမှုများ မြင့်တက်နေပြီး နိုင်ငံရေး တည်ငြိမ်မှုနှင့် စီးပွားရေးတိုးတက်မှုဆိုင်ရာ အာမခံချက်မရှိခြင်း၊ အကြွေးမဆပ်နိုင်ခြင်းနှင့် အကျင့်ပျက် ခြစားမှုစသည့် ပြဿနာရပ်များကြောင့် ပါကစ္စတန်နိုင်ငံအတွင်း ရင်းနှီးမြှုပ်နှံမှုများ ခေတ္တရပ်ဆိုင်းထားရန် ဆုံးဖြတ်ခဲ့ခြင်းဖြစ်နိုင်ပါသည်။ အထူးသဖြင့် တရုတ်နိုင်ငံမှ ရင်းနှီးမြှုပ်နှံလိုက်သည့် ငွေများအား နိုင်ငံရေးသမားများနှင့် အစိုးရတာဝန်ရှိသူများကလာမည့်ရွေးကောက်ပွဲတွင် ၎င်းတို့အောင်နိုင်ရေးအတွက် အသုံးချသွားမည်ကို စိုးရိမ် နေခြင်း ဖြစ်ပါသည်။

သို့သော်လည်း ဆောင်းပါးတွင် ဖော်ပြထားသကဲ့သို့ တရုတ်နိုင်ငံအနေဖြင့် ပါကစ္စတန်နိုင်ငံအား လုံးဝပစ်ပယ်ထားလိုက်သည့်နီးနီး အယူအဆမှာ အစွန်းရောက်နေပြီးပါကစ္စတန်နိုင်ငံသည် တရုတ်နိုင်ငံအတွက် မြန်မာနိုင်ငံကဲ့သို့ပင် အိန္ဒိယသမုဒ္ဒရာသို့ ထွက်ပေါက်ဖြစ်သည့် အိမ်နီးချင်းနိုင်ငံတစ်နိုင်ငံဖြစ်ပါသည်။ ထို့ပြင် အိန္ဒိယနိုင်ငံအား ပိတ်ဆို့ထိန်းညှိရန်နှင့် ဒေသအတွင်း စီးပွားရေးအကျိုးအမြတ်ဖြန့်ကြက်နိုင်ရန် အရေး ပါသည့် နေရာတွင်ရှိနေသည်မှာ အမှန်ပင်ဖြစ်ပါသည်။ သို့သော်လည်း ယခုအခါ တရုတ်နိုင်ငံအနေဖြင့် ဆော်ဒီအာရေဗျနိုင်ငံအပါအဝင် အခြားချမ်းသာသောဒေသတွင်း နိုင်ငံများနှင့် စီးပွားဆက်ဆံရေးတည်ဆောက်လာခြင်း၊ ပါကစ္စတန်နိုင်ငံ၏ နိုင်ငံရေး ရေချိန်ကို စောင့်ကြည့်နေခြင်းတို့ကြောင့် လက်ရှိဦးစားပေးနေရာမှ လျော့ကျနေသည်ဟုသာ သုံးသပ်ရပါသည်။

ယခုအခါ တရုတ်နိုင်ငံသည် ၎င်းကိုယ်တိုင်စီးပွားရေးကျဆင်းမှုနှင့် ရင်ဆိုင်နေရ သောကြောင့် ၎င်း၏ BRI စီမံကိန်းများကို အကောင်အထည်ဖော်ရာတွင် ယခင်ကထက် ၎င်း၏ ရေရှည်အကျိုးစီးပွားအား အလေးထားလာကာ ပိုမိုတင်းကျပ်စိစစ်သည့်မူဝါဒကို ကျင့်သုံးလာပြီး ဆုံးရှုံးမှုဖြစ်လာနိုင်သည့်အခြေအနေတွင် စွန့်စားမှုယူရန် ခဲယဉ်းလာပါသည်။ ထိုမူဝါဒမှာ သမ္မတ ရှီကျင့်ဖျင်၏ ပြည်တွင်းညီညွတ်ရေးနှင့် တည်ငြိမ်ရေးကို ပိုမိုအာရုံစိုက်လာသည့် နိုင်ငံခြားရေးမူဝါဒသာမက နိုင်ငံတွင်း စီးပွားရေးတုံ့ဆိုင်းနေမှုများနှင့်လည်း ဆက်စပ်နေနိုင်ကြောင်း သုံးသပ်နိုင်ပါသည်။ မည်သို့ပင်ဆိုစေ မိမိနိုင်ငံတွင် ရင်းနှီးမြှုပ်နှံမှုများဆောင်ရွက်နေသည့် မည်သည့်နိုင်ငံမဆို ၎င်းတို့၏ ရင်းနှီးမြှုပ်နှံမှုများ မဆုံးရှုံးစေရန်နှင့် ရေရှည်အကျိုးစီးပွားဖြစ်ထွန်းရန်သာ မျှော်တွေးမည်ဖြစ်သောကြောင့် နှစ်ဦးနှစ်ဖက် အကျိုးစီးပွားကို ဖော်ဆောင်ထိန်းညှိနိုင်ရန်မှာ သက်ဆိုင်ရာနိုင်ငံများ၏ ပညာခန်းဖြစ်ပါကြောင်း သုံးသပ်ဖော်ပြလိုက်ရပါသည်။

Myanmar Aspect

127101223

[1]။ ADNAN AAMIR. “China spurned Pakistan's proposals for new Belt and Road projects”. Nikkei Asia. October 2, 2023, [https://asia.nikkei.com/.../China-spurned-Pakistan-s... ]-accessed on 5 October 2023.

[2]။ Ryan Grim, Murtaza Hussain. “PAKISTAN CONFIRMS SECRET DIPLOMATIC CABLE SHOWING U.S. PRESSURE TO REMOVE IMRAN KHAN”. The Intercept. August 16 2023 [https://theintercept.com/.../imran-khan-cable.../]-accessed on 5 October 2023