တရုတ်-ရုရှား ပူးတွဲစစ်ရေးလေ့ကျင့်မှုများမှ တရုတ်နိုင်ငံရရှိနေသည့် အကျိုးကျေးဇူးများနှင့်ပတ်သက်ပြီး ဘာတွေသိထားသင့်သလဲ

 

နိဒါန်း

၂၀၂၃ ခုနှစ်၊ ဇူလိုင်လက ကျင်းပပြုလုပ်ခဲ့သည့် တရုတ်-ရုရှား စစ်ရေးလေ့ကျင့်မှု များသည် ထိုင်ဝမ်ကိုကျူးကျော်ရန်ကြိုးစားနေသည့် တရုတ်နိုင်ငံ၏ ကြိုတင်ပြင်ဆင်မှု တစ်ခုဖြစ်ပါသည်။ အမေရိကန်နိုင်ငံက နောက်ခံပေးထားသည့် ယူကရိန်းနိုင်ငံနှင့် ထိုင်ဝမ် တို့၏ ကာကွယ်ရေးနည်းဗျူဟာများသည် တူညီလျက်ရှိသောကြောင့် အဆိုပါနည်းဗျူဟာ များကို တန်ပြန်နိုင်ရန် တရုတ်နိုင်ငံသည် ရုရှား-ယူကရိန်း ပဋိပက္ခမှရရှိသော ရုရှားနိုင်ငံ၏ စစ်ရေးအတွေ့အကြုံများကို လေ့လာလျက်ရှိသည့် ကိစ္စရပ်များနှင့် ပတ်သက်ပြီး သုံးသပ်ဖော်ပြသွားပါမည်။[1]

ဖော်ပြချက်

၂၀၂၃ ခုနှစ်၊ ဇူလိုင်လအကုန်ပိုင်းတွင် တရုတ်နှင့် ရုရှားနိုင်ငံတို့သည် ဂျပန် ပင်လယ်အတွင်း ပူးတွဲစစ်ရေးလေ့ကျင့်ခန်းတစ်ခု ပြုလုပ်ခဲ့ပြီး တရုတ်နိုင်ငံအနေဖြင့် ရုရှား-ယူကရိန်း ပဋိပက္ခများမှ အမေရိကန်စစ်သုံးလေယာဉ်များအား တုံ့ပြန်ခဲ့သည့် ရုရှားနိုင်ငံ၏ နည်းလမ်းများနှင့် အတွေ့အကြုံများကို ထိုလေ့ကျင့်ခန်းမှတစ်ဆင့် လေ့လာ လျက်ရှိပါသည်။ တရုတ်နိုင်ငံသည် ပြီးခဲ့သည့် ၂၀၂၂ ခုနှစ်၊ ဩဂုတ်လနှင့် ၂၀၂၃ ခုနှစ်၊ ဧပြီလတို့တွင် ထိုင်ဝမ်အနီး၌ ကြီးမားသည့် စစ်ရေးလေ့ကျင့်မှု ၂ ကြိမ်တိုင်ပြုလုပ် ခဲ့ပါသည်။ အဆိုပါလေ့ကျင့်ခန်းများတွင် အမေရိကန်နိုင်ငံ၏ P-8A ရေငုပ်သင်္ဘော တိုက်ဖျက်ရေးလေယာဉ်များ၊ E-3 အချက်ပေးလေယာဉ်နှင့် EC-135 အီလက်ထရောနစ် စောင့်ကြည့်ရေးလေယာဉ်အစရှိသည့် စစ်သုံးလေယာဉ်များ၏ အနီးကပ်ထောက်လှမ်းမှုများ ခံခဲ့ရပါသည်။ အလားတူ ရုရှား-ယူကရိန်းပဋိပက္ခတွင်လည်း ရုရှားနိုင်ငံသည် အမေရိကန်နိုင်ငံနှင့် နေတိုးတပ်ဖွဲ့တို့၏ အီလက်ထရောနစ်ထောက်လှမ်းရေး၊ အီလက်ထရောနစ် စစ်သုံးလေယာဉ်များနှင့် ဒရုန်းများဖြင့် စောင့်ကြည့်ခံခဲ့ရပါသည်။ အဆိုပါစောင့်ကြည့်ရေး လေယာဉ်များသည် ရုရှားနိုင်ငံဆိုင်ရာ ဒစ်ဂျစ်တယ် သတင်းအချက်အလက်များကို ယူကရိန်းတပ်ဖွဲ့များသို့ ဆက်တိုက်ပေးပို့လျက်ရှိကြောင်း ဖော်ပြထားပါသည်။

ယူကရိန်းနိုင်ငံသည် ပဋိပက္ခကာလတစ်လျှောက်တွင်သာ အမေရိကန်နိုင်ငံမှ စစ်ရေးအထောက်အကူများ ဆက်တိုက်ရရှိသော်လည်း ထိုင်ဝမ်ကမူ အမေရိကန်နိုင်ငံနှင့်ကာလရှည်ကြာ လက်နက်ဆိုင်ရာ ပူးပေါင်းဆောင်ရွက်မှုများ လုပ်ဆောင်နေသည့် နိုင်ငံတစ်နိုင်ငံဖြစ်ပါသည်။ ထို့ကြောင့် ယခုအချိန်တွင် ထိုင်ဝမ်ရေလက်ကြားအတွင်း စစ်ပွဲဖြစ်ပွားခဲ့ပါက ထိုင်ဝမ်စစ်ဘက်နှင့် အမေရိကန်နိုင်ငံတို့အကြား ပိုမိုကောင်းမွန်သည့် ပူးပေါင်းဆောင်ရွက်မှုများကို တွေ့ရှိရမည်ဖြစ်ပါသည်။ ပြီးခဲ့သည့် တရုတ် နိုင်ငံ၏ ထိုင်ဝမ်အနီး စစ်ရေးလေ့ကျင့်မှုများသည် ထိုင်ဝမ်-အမေရိကန် သတင်းအချက်အလက်နှင့် ထောက်လှမ်းရေးသတင်း ဖလှယ်မှုများအတွက် အခွင့်အလမ်းများစွာ ရရှိခဲ့ပါသည်။ အနာဂတ်ကာလများတွင် အမေရိကန်နိုင်ငံသည် ထိုင်ဝမ်ရေလက်ကြားအရေးတွင် လေယာဉ်တင်သင်္ဘာများနှင့် စစ်သင်္ဘောများ စေလွှတ်၍ ပဋိပက္ခများတွင် တိုက်ရိုက် ပါဝင်ခြင်းထက် ရေကြောင်း၊ လေကြောင်းဆိုင်ရာအီလက်ထရောနစ်စစ်သုံးလေယာဉ် များနှင့် အီလက်ထရောနစ်ထောက်လှမ်းရေးပစ္စည်းကိရိယာများ၊ နည်းစနစ်များ ထောက်ပံ့ခြင်းဖြင့် ထိုင်ဝမ်စစ်ဘက်ကို ထောက်ကူပေးနိုင်ရန် ပြင်ဆင်လျက်ရှိပါသည်။ ထို့ကြောင့် တရုတ်နိုင်ငံသည် ရုရှား-ယူကရိန်း ပဋိပက္ခကာလများအတွင်း အမေရိကန် နိုင်ငံ၏ စွမ်းဆောင်ရည်များကို ထိန်းချုပ်ခဲ့သည့် ရုရှားစစ်ဘက်၏ နည်းလမ်းများကို လေ့လာနေခြင်းဖြစ်ကြောင်း ဖော်ပြထားပါသည်။

ရုရှား-ယူကရိန်း ပဋိပက္ခသည် ယူကရိန်းနိုင်ငံကုန်းတွင်းပိုင်းတွင် ဖြစ်ပွားလျက်ရှိသော်လည်း ပင်လယ်နက်ကို ထိန်းချုပ်နိုင်ရန်လည်း ယှဉ်ပြိုင်နေကြပါသည်။ အဆိုပါပဋိပက္ခများတွင် ယူကရိန်းနိုင်ငံ၏ အားသာချက်မှာ ရုရှားရေတပ်စစ်သင်္ဘောများကို ကုန်းမြေပေါ်ရှိ လက်နက် များဖြင့် ဖျက်ဆီးတိုက်ခိုက်နိုင်ခြင်းဖြစ်ပါသည်။ ယူကရိန်းနိုင်ငံသည် စစ်သင်္ဘောချင်း ယှဉ်ပြိုင်တိုက်ခိုက်ခြင်းထက် ကုန်းစပ်ရှိ လက်နက်များ၊ ဒရုန်းများ၊ အမေရိကန်နိုင်ငံက ထောက်ပံ့ထားသည့် အီလက်ထရောနစ်ထောက်လှမ်းရေးသတင်းများကို အသုံးပြု၍ ထိရောက်သည့် တိုက်ခိုက်မှုများ လုပ်ဆောင်နိုင်ခဲ့ခြင်းဖြစ်ပါသည်။ ထို့ကြောင့် ထိုင်ဝမ် စစ်ဘက်သည် တရုတ်နိုင်ငံ၏ ကျူးကျော်တိုက်ခိုက်လာနိုင်မှုကို ကာကွယ်ရန်အတွက် ဖြူကောင်မဟာဗျူဟာအရ (Porcupine Strategy) ကမ်းစပ်အခြေစိုက် ဒုံးလက်နက်များ၊ မောင်းသူမဲ့ယာဉ်များကို တိုးချဲ့လုပ်ဆောင်ရန် ကြိုးပမ်းလျက်ရှိပြီး လက်ရှိ ပင်လယ်နက်အတွင်း ရုရှားနိုင်ငံရင်ဆိုင်နေရသကဲ့သို့ ထိုင်ဝမ်ရေလက်ကြားတွင် တရုတ်နိုင်ငံနှင့် ထိပ်တိုက်ရင်ဆိုင်ရန် ပြင်ဆင်နေခြင်းဖြစ်ကြောင်း ဖော်ပြထားပါသည်။

ထို့ကြောင့် ရုရှား-ယူကရိန်း ပဋိပက္ခများတွင် ရုရှားနိုင်ငံရရှိခဲ့သည့် တိုက်ခိုက်ရေးဆိုင်ရာ အတွေ့အကြုံများသည် တရုတ်နိုင်ငံအတွက် အရေးပါသည့် ကိစ္စရပ်တစ်ခု ဖြစ်နေပါသည်။ ဂျပန်ပင်လယ်အတွင်း ရုရှား-တရုတ် လေ့ကျင့်ခန်းအတွင်း ဖြစ်စဉ် အကြောင်းအရာဖွင့်များသည်လည်း လက်ရှိအခြေအနေများကို အခြေခံ၍ ရေးဆွဲထားခြင်း ဖြစ်ပါသည်။ တရုတ်နိုင်ငံသည် ရုရှားနိုင်ငံအတွက် အရေးပါသည့် မဟာဗျူဟာမြောက် မိတ်ဖက်နိုင်ငံဖြစ်ပြီး အနောက်အုပ်စုနိုင်ငံများ၏ အရေးယူပိတ်ဆို့မှုများ ရင်ဆိုင် နေရချိန်တွင် ရုရှားနိုင်ငံသည် နှစ်နိုင်ငံအပြန်အလှန်ပူးပေါင်းဆောင်ရွက်မှု ခေါင်းစဉ် အောက်တွင် တရုတ်နိုင်ငံမှ လက်နက်ပိုပစ္စည်းများ ဝယ်ယူအသုံးပြုလျက်ရှိပါသည်။ ထို့ပြင် မောင်းသူမဲ့ဒရုန်းများသည် ခေတ်သစ်စစ်ပွဲများတွင် အရေးပါသည့် လက်နက်တစ်ခု ဖြစ်လာခဲ့ရာ တရုတ်နိုင်ငံထုတ် အရပ်ဘက်သုံးဒရုန်းများသည် ရုရှားနိုင်ငံအတွက် အသုံးဝင်လျက်ရှိပါသည်။ အပြန်အလှန်အနေဖြင့် တရုတ်နိုင်ငံသည် အမေရိကန် နိုင်ငံနှင့် ယှဉ်ပြိုင်ရာတွင် စစ်အေးခေတ်ကတည်းက ကာလရှည်ကြာအသုံးပြုလာသည့် ရုရှားနိုင်ငံ၏ နည်းလမ်းများကို လေ့လာရန် အခွင့်အလမ်းများပေါ်လာခဲ့ခြင်း ဖြစ်ပါသည်။ ထို့ကြောင့် အာကာသလုံခြုံရေးနှင့် ဒုံးဖျက်မစ်ဇိုင်းဆိုင်ရာ လေ့ကျင့်ခန်းများနှင့်ပတ်သက်ပြီး တရုတ်နှင့် ရုရုားနိုင်ငံတို့အကြား ပိုမိုကောင်းမွန်သည့် ပူးပေါင်းဆောင်ရွက်မှုများ ဖြစ်လာစေပြီး သက်ဆိုင်ရာလက်နက်စနစ်များကိုလည်း ပိုမိုနားလည်သဘောပေါက်နိုင်မည်ဖြစ်ကြောင်း ဆောင်းပါးတွင် ရေးသားဖော်ပြထားရှိပါသည်။

တွေ့ရှိသုံးသပ်ချက်

တရုတ်နှင့် ရုရှားနိုင်ငံတို့သည် ပြီးခဲ့သည့် ဇူလိုင်လအကုန်ပိုင်းတွင် ဂျပန် ပင်လယ်အတွင်း ပူးတွဲစစ်ရေးလေ့ကျင့်မှုတစ်ခုပြုလုပ်ခဲ့ရာ အဆိုပါပြုလုပ်မှုနှင့် ပတ်သက်၍ အနောက်နိုင်ငံများ၏ ပြစ်တင်ဝေဖန်လျက်ရှိကြပါသည်။ ရုရှားနှင် တရုတ် နိုင်ငံတို့သည် အဆိုပါစစ်ရေးလေ့ကျင့်မှုမတိုင်မီ မတ်လ ၂၀ ရက်နှင့် ၂၁ ရက်တို့တွင် ရုရှားနိုင်ငံ၊ မော်စကိုမြို့၌ ရုရှားနိုင်ငံသမ္မတ ဗလာဒီမာပူတင် နှင့် တရုတ်နိုင်ငံသမ္မတ ရှီကျင့်ဖျင်တို့ ၂ ရက်ကြာ ဆွေးနွေးပွဲတစ်ခုကျင်းပပြုလုပ်ခဲ့ပြီး နှစ်နိုင်ငံအကြား မဟာဗျူဟာကျ ပူးပေါင်းဆောင်ရွက်မည့်စာချုပ်သစ်တစ်ရပ်ကို လက်မှတ်ရေးထိုးခဲ့ကြပါသည်။ ရုရှားနိုင်ငံ သမ္မတကမူ ရုရှား-တရုတ် ပူးပေါင်းဆောင်ရွက်မှုသည် စစ်ရေးမဟာမိတ်ဖွဲ့ခြင်း မဟုတ်ကြောင်းနှင့် ပွင့်လင်းမြင်သာသည့် ပူးပေါင်းဆောင်ရွက်မှုသာ ပြုလုပ်ခြင်း ဖြစ်သည်ဟု ပြောကြားထားပါသည်။[2]၎င်းတို့ နှစ်နိုင်ငံ ပူးပေါင်းဆောင်ရွက်မှုနှင့် စစ်ဘက်ဆိုင်ရာဆက်ဆံရေးသည် ကမ္ဘာလုံးဆိုင်ရာတည်ငြိမ်မှုအတွက် အထောက်အကူ ဖြစ်စေမည်ဟု တရုတ်နှင့် ရုရှားနိုင်ငံတို့က ပြောကြားထားသော်လည်း ၎င်းတို့ ပူးပေါင်းမှုကြောင့် တိုးတက်ကောင်းမွန်လာမည့် စစ်ရေး၊ နည်းပညာနှင့် အခြား လက်နက်စွမ်းဆောင်ရည်များကို အမေရိကန်နိုင်ငံအပါအဝင် အနောက်နိုင်ငံများက စိုးရိမ်နေခြင်းဖြစ်ပါသည်။

ရုရှားနှင့် တရုတ်နိုင်ငံတို့သည် အနောက်နိုင်ငံများ၏ အဘက်ဘက်မှ အရေးယူ ပိတ်ဆို့မှုကို ခံနေရပြီး အမေရိကန်နိုင်ငံ၏ ဖိနှိမ်ခြင်းခံရသည့်နိုင်ငံအချင်းချင်း ပူးပေါင်း ဆောင်ရွက်မှုများတိုးမြှင့်နေပြီး စစ်ရေးအတွေ့အကြုံနှင့် နည်းပညာဖလှယ်သည့်အဆင့်သို့ တက်လှမ်းနိုင်ခဲ့ပါသည်။ အမေရိကန်နိုင်ငံအနေဖြင့် အနာဂတ်ကြားခံစစ်ပွဲများတွင် တိုက်ရိုက်ပါဝင်ပတ်သက်ခြင်းမျိုးထက် နောက်ကွယ်မှ အီလက်ထရောနစ်၊ ဆက်သွယ်ရေး၊ နည်းပညာနှင့် ထောက်လှမ်းရေးအချက်များပံ့ပိုးပေးမည့်ဘက်သို့ ပိုမိုအာရုံစိုက်လာနေကြောင်း တွေ့ရှိရသည့်အတွက် သက်ဆိုင်ရာနိုင်ငံများအနေဖြင့် မိမိတို့ အာရုံစိုက်ပြင်ဆင်ထားသင့်သည့် စစ်ဆင်ရေးအခန်းကဏ္ဍများကို ကြိုတင်ပြင်ဆင်ထားခြင်းသည် သက်ဆိုင်ရာနိုင်ငံများအတွက် ပညာခန်းဖြစ်ပါကြောင်း သုံးသပ်ဖော်ပြလိုက်ရပါသည်။

Myanmar Aspect

87081723

[1]။ Ying Yu Lin,“ What Is Russia Teaching China in Military Drills?”. The Diplomat. August 9, 2023 [https://thediplomat.com/.../what-is-russia.../]-accessed on August 13, 2023.

[2]။ Alexander Marrow,“ Russia, China are not creating military alliance, Putin says”. Reuters. March 26, 2023 [https://www.reuters.com/.../putin-russia-china.../]-accessed on August 13, 2023.

တရုတ်နိုင်ငံ၏ လက်ရှိအသုံးပြုနေသော စစ်ရေးမဟာဗျူဟာ/နည်းဗျူဟာများ၊ နူကလီးယားလက်နက်ပိုင်ဆိုင်မှုကို စစ်ရေးခြိမ်းခြောက်မှုများတွင် အသုံးပြုလာနိုင်ချေနှင့် ပတ်သက်ပြီး ဘာတွေသိထားသင့်သလဲ

 

နိဒါန်း

တရုတ်နိုင်ငံသည် အမေရိကန်နိုင်ငံနှင့် တန်းတူနေရာရရှိရန်၊ သို့မဟုတ် သာလွန်ရန် ကြိုးပမ်းလျက်ရှိပြီး ၎င်း၏ရည်မှန်းချက်များ အောင်မြင်စွာအကောင်အထည်ဖော်ရန် အတွက် စစ်ရေးနည်းပရိယာယ်များကိုလည်း ပြောင်းလဲ အသုံးပြုလျက်ရှိပါသည်။ ၎င်းအနေဖြင့် နျူကလီးယား လက်နက်အား ပထမဆုံးစတင်အသုံးပြုမည်မဟုတ်(No-First Use)ဟူသောမူကို ကိုင်စွဲထားသော်လည်း နျူကလီးယား ပိုင်ဆိုင်မှုအား အသုံးပြု၍ ခြိမ်းခြောက်အကျပ်ကိုင်မှုနည်းလမ်းများသာမက အမေရိကန်နိုင်ငံနှင့် နျူကလီးယားလက်နက် အင်အားတွင် တန်းတူဖြစ်ရေးကြိုးပမ်းလျက်ရသည့် ကိစ္စရပ်များကို သုံးသပ်ဖော်ပြပေးပါမည်။[1]

ဖော်ပြချက်

အမေရိကန်နိုင်ငံနှင့် တရုတ်နိုင်ငံတို့အကြား စစ်ပွဲဖြစ်ပွားခြင်းသည် တစ်ကမ္ဘာလုံးနှင့်သက်ဆိုင်သော အရေးကြီးကိစ္စဖြစ်နေပါသည်။ အမေရိကန်နိုင်ငံသည် အင်ဒို-ပစိဖိတ် ဆိုင်ရာ ၎င်း၏မူဝါဒများတွင် တရုတ်နိုင်ငံ၏ ပြုပြင်ပြောင်းလဲရေးမူဝါဒများကို ဟန့်တား နိုင်ရန်ကြိုးပမ်းလျက်ရှိပါသည်။ လက်ရှိအချိန်အထိ တရုတ်နှင့်အမေရိကန်အကြားတွင် စစ်ပွဲများ တိုက်ရိုက်ဖြစ်ပွားခဲ့ခြင်းမရှိသော်လည်း တရုတ်နိုင်ငံသည် ကမ္ဘာ့အင်အားကြီးနိုင်ငံဖြစ်လာရန် ကြိုးပမ်းလျက်ရှိသည့်အပြင် ၎င်း၏ ရည်မှန်းချက်များ အောင်မြင်စွာ အကောင်အထည်ဖော်နိုင်ရန်အတွက် နိုင်ငံရေးအကျပ်ကိုင်မှုများ၊ Hybrid Warfare ကို အသုံးချနေမှုများ၊ ပြီးပြည့်စုံသည့်နိုင်ငံ့အင်အား (Comprehensive National Power)ကို ဖော်ဆောင်နေမှုများ၊ တရုတ်တပ်မတော်၏ နည်းဗျူဟာ ၃ သွယ် (PLA’s Three Warfare Framework)နှင့် မီးခိုးရောင်ဇုန်စစ်ရေးနည်းဗျူဟာ(Gray Zone Tactics)စသည့် နိုင်ငံရေးနှင့် စစ်ရေးပရိယာယ်များကို ပေါင်းစပ်အသုံးပြုလျက်ရှိကြောင်း ဖော်ပြထားပါသည်။

တရုတ်နိုင်ငံ၏ ပြုပြင်ပြောင်းလဲရေးဝါဒ (Revisionism) သည် မပြင်းထန်သော်လည်း နိုင်ငံတကာဥပဒေဘောင်အတွင်းမှ တရားမဝင်မှုများဆောင်ရွက်ခြင်း၊ စံချိန်စံနှုန်း ချိုးဖောက်ခြင်းများ ဆောင်ရွက်နေပြီး လစ်ဘရယ်ကမ္ဘာ့နိုင်ငံရေး အခင်းအကျင်းကို နှောင့်ယှက်လျက်ရှိသည်ဟု ဆိုသည်။ ထို့ပြင် တရုတ်နိုင်ငံသည် ငြိမ်းချမ်းရေးကာလနှင့် စစ်ပွဲ ကာလဟူ၍ ခွဲခြားထားခြင်းမရှိဘဲ ၎င်း၏ အကျိုးစီးပွားတိုးတက်ရေးကိုသာ စဉ်ဆက်မပြတ် လုပ်ဆောင် လျက်ရှိပါသည်။ တရုတ်နိုင်ငံသည် မည်သည့်အချိန်တွင်မဆို နျူကလီးယားလက်နက်ကို စတင်အသုံးမပြုဟူသည့်(No First Use)မူဝါဒများအရ ၎င်း၏ နိုင်ငံရေးပရိယာယ်တွင် နျူကလီးယားလက်နက်ပိုင်ဆိုင်မှုအား အသုံးချခြင်းကို ရှောင်ကြဉ်ခဲ့သော်လည်း ၂၀၀၈ ခုနှစ် မဟာဗျူဟာမြောက် ရည်မှန်းချက်များအရ ၎င်း၏ နိုင်ငံရေးအကျပ်ကိုင်မှု၊ ခြိမ်းခြောက်မှုနှင့် နိုင်ငံတကာရည်မှန်းချက်များ အကောင် အထည်ဖော်မှုများတွင် နျူကလီးယားလက်နက်ပိုင်ဆိုင်မှုကို အားတစ်ရပ်အနေဖြင့် ထည့်သွင်းအသုံးပြုခဲ့ကြောင်းဖော်ပြထားပါသည်။

ထို့ပြင် တရုတ်နိုင်ငံသည် ၎င်း၏ ရည်မှန်းချက်များ အောင်မြင်စွာ အကောင် အထည်ဖော်နိုင်ရန်အတွက် ထိပ်တိုက်ပဋိပက္ခများ မဖြစ်ရုံတစ်မယ် စွန့်စားမှုယူ၍ ပါးနပ်စွာ လုပ်ဆောင်လျက်ရှိပါသည်။ ဥပမာအားဖြင့် တောင်တရုတ် ပင်လယ်တွင် အရပ်သားသင်္ဘောအသွင်ယူထားသည့် တရုတ်ငါးဖမ်းသင်္ဘောအုပ်စုကို လက်နက်ကြီးများတပ်ဆင်ထားသည့် ကမ်းရိုးတန်းစောင့်သင်္ဘောများ ခြံရံ၍ တပ်ဖြန့် စေလွှတ်နေပါသည်။ အဆိုပါလုပ်ရပ်ကို ကြည့်ခြင်းအားဖြင့် တရုတ်နိုင်ငံသည် အရပ်ဘက် သင်္ဘောများကို အသုံးပြုလျက် ကုလသမဂ္ဂ၏ ပင်လယ်ပြင်ဆိုင်ရာ ဥပဒေများကို လက်တစ်လုံးခြား ချိုးဖောက်နေခြင်းဖြစ်သည်ဟုဆိုသည်။ ထို့ပြင် တရုတ်နိုင်ငံအား တုံ့ပြန်လာသည့် နိုင်ငံများ၏ စစ်သင်္ဘောငယ်များကို ပစ်ခတ်နှစ်မြှုပ်ပစ်ခြင်း၊ အုပ်ချုပ်ထောက်ပံ့ရေး မဆောင်ရွက်နိုင်အောင် တားဆီးခြင်းများကို ဆောင်ရွက်ပြီး သမားရိုးကျလွှမ်းမိုးမှုပြုလုပ် နိုင်ရန် ဆောင်ရွက်နေခြင်းသည်လည်း ၎င်း၏ Gray Zone Tactics ပင်ဖြစ်ကြောင်း ဖော်ပြ ထားပါသည်။

ထို့နောက် တရုတ်နိုင်ငံသည် Nine-Desh Line မူဝါဒကို ဖန်တီးကာ ဝါဒ ဖြန့်ချိရေးယန္တယားကို ထိရောက်စွာအသုံးချပြီး နယ်မြေပိုင်ဆိုင်မှုခိုင်မာအောင် လုပ်ဆောင်လျက်ရှိပါသည်။ Sansha City နှင့် Woody Island ကဲ့သို့သော အုပ်ချုပ်ရေးမြို့တော်အသစ်များ တည်ဆောက်၍ နယ်မြေဖြန့်ကြက်ရန် ဆောင်ရွက်နေသည့်အပြင် Fishing Laws ကဲ့သို့သော ဥပဒေများပြဋ္ဌာန်း၍ တရားဝင်မှုတည်ဆောက်ကာ နယ်မြေချဲ့ထွင်မှုကို အထောက်အပံ့ ပြုပေးနေပါသည်။ တရုတ်နိုင်ငံသည် လက်ရှိ ပိုနေမြဲ၊ ကျားနေမြဲ အခြေအနေကို နိုင်ငံရေး အကျပ်ကိုင်မှု၊ ခြိမ်းခြောက်မှုများမှတစ်ဆင့် ပြောင်းလဲလိုနေပါသည်။ ဥပမာအားဖြင့် လစ်သူယေးနီးယားနိုင်ငံအား Taipei သံရုံးကို ထိုင်ဝမ်ဟုသုံးနှုန်းသဖြင့် ကုန်သွယ်ရေးဖြတ်တောက် ခဲ့ပြီး ဩစတြေးလျနိုင်ငံကိုလည်း ကိုဗစ်-၁၉ ရောဂါ၏ ဇစ်မြစ်ကို ဆန်းစစ်မည်ဟု ဆို၍ တရုတ်နိုင်ငံအား အပြစ်ဖို့ခဲ့သောကြောင့် ဩစတြေးလျနိုင်ငံထုတ် ကုန်ပစ္စည်း များကို အခွန်တိုးမြှင့်ခဲ့ပါသည်။ ထိုကဲ့သို့ပင် ဖိလစ်ပိုင်နှင့် ဂျပန်နိုင်ငံကဲ့သို့သော ဒေသတွင်း နိုင်ငံများအပေါ် အကျပ်ကိုင်မှုများ လုပ်ဆောင်လျက်ရှိပြီး ထိုသို့လုပ်ဆောင်မှု များသည် ပဋိပက္ခဖြစ်မည်ကို ဂရုမစိုက်ဘဲ ရဲတင်းစွာဆောင်ရွက်သည့် နည်းလမ်းကို အသုံးပြုနေခြင်းကြောင့် အောင်မြင်နေသည်ဟု ဆိုရပါသည်။ ထိုသို့ အပျော့/အမာနည်းလမ်းများကို ပေါင်းစပ်အသုံးပြုနေသည့် အခြေအနေတွင် တရုတ်နိုင်ငံအနေဖြင့် နျူကလီးယားလက်နက်ကို အသုံးပြု၍ ခြိမ်းခြောက်မှုများကို ပေါင်းစပ်လာနိုင်ကြောင်း ဖော်ပြထားပါသည်။

တရုတ်နိုင်ငံအနေဖြင့် နျူကလီးယားလက်နက် မဖြစ်မနေ အသုံးပြု/မပြုနှင့် ပတ်သက်၍ အငြင်းပွားမှုများရှိနေသော်လည်း ၎င်းအနေဖြင့် အမေရိကန်နိုင်ငံနှင့် တန်းတူ နျူကလီးယားပိုင်ဆိုင်မှုရှိလာစေရန် ကြိုးပမ်းလျက်ရှိပါသည်။ ထိုသို့ တရုတ်နိုင်ငံ၏ နျူကလီးယားပါဝါတန်းတူဖြစ်မှု (Nuclear Parity) အကောင်အထည်ပေါ်လာပါက အမေရိကန်နိုင်ငံအနေဖြင့် လက်ရှိအခြေအနေတွင် နေရာတိုင်း၌ အားသာချက်တစ်ခုအဖြစ် အသုံးပြုနေသည့် နျူကလီးယားအရေးသာမှုကို မဟာဗျူဟာမြောက် အထောက်အပံ့အဖြစ် အသုံးပြုနိုင်တော့မည်မဟုတ်ပါ။ တရုတ်နိုင်ငံသည် နိုင်ငံရေး အရေးသာမှုအတွက် စွန့်စားမှုယူပြီး အန္တရာယ်များသည့် လှုပ်ရှားမှုများကို ရဲရဲတင်းတင်း လုပ်ဆောင်နေချိန်တွင် အမေရိကန်နိုင်ငံအနေဖြင့် ပဋိပက္ခကို ရှောင်ရှားရန်သာ ကြိုးပမ်း နေရပါသည်။ ဥပမာအားဖြင့် အမေရိကန်စစ်သင်္ဘော USS Chung-Hoon နှင့် တရုတ် စစ်ရေယာဉ်တို့ ထိုင်ဝမ်ရေလက်ကြားတွင် တိုက်မိမည့် အနေအထားထိ ဖြစ်ခဲ့ပြီး တရုတ်ဂျက်လေယာဉ်များအနေဖြင့်လည်း အမေရိကန်ဂျက်လေယာဉ်များရှေ့တွင် အန္တရာယ် ရှိသည့် အနေအထားအထိ ပျံသန်းခဲ့ကြပါသည်။ ထို့ကြောင့် အမေရိကန်နိုင်ငံသည် မှားယွင်းသည့် တွက်ချက်မှုများ မဖြစ်လာစေရန် တရုတ်နိုင်ငံနှင့် ဆက်သွယ်မှုများ လုပ်ဆောင်ရန် ကြိုးပမ်းခဲ့သော်လည်း တရုတ်နိုင်ငံဘက်မှ ငြင်းဆိုထားပြီး အန္တရာယ်များသည့် လှုပ်ရှားမှုများကိုသာ ဆောင်ရွက်လျက်ရှိကြောင်း ဖော်ပြထားပါသည်။

ထို့ပြင် တရုတ်နိုင်ငံသည် မတိုးသာမဆုတ်သာအခြေအနေတွင် ရှိနေသည့် ထိုင်ဝမ်အရေးကိစ္စများတွင် တိကျသည့် အဖြေတစ်ခုထွက်လာစေရန် အန္တရာယ်များသည့် စွန့်စားမှုများ လုပ်ဆောင်ရန် ဆန္ဒရှိနေပါသည်။ တရုတ်နိုင်ငံသည် ထိုင်ဝမ်အစိုးရကို ဖြုတ်ချရန်အတွက် ကနဦးတွင် ဝိုင်းပတ်ပိတ်ဆို့ထားခြင်းကဲ့သို့ မပြင်းထန်သည့် နည်းလမ်းများ အသုံးပြုခဲ့သော်လည်း နောက်ပိုင်းကာလ၌ အထက်တွင် ဖော်ပြသကဲ့သို့ ရဲတင်းပြီး ပြင်းထန်သည့်နည်းလမ်းများသို့ ပြောင်းလဲလာခဲ့ပါသည်။ ထိုသို့ပြောင်းလဲလာခြင်းက ၎င်းအသုံးချနေသည့် ဝိုင်းပတ်ပိတ်ဆို့ခြင်း နည်းလမ်းကို အထောက်အပံ့ဖြစ်စေပါသည်။ အမေရိကန်နိုင်ငံအနေဖြင့် ထိုင်ဝမ်ကျွန်းအား သိမ်းပိုက် လာမည့် တရုတ်စစ်တပ်ကို ကာကွယ်ပေးနိုင်သော်လည်း ဝိုင်းပတ်ပိတ်ဆို့ထားမှုကို ရေရှည်ကာကွယ်ပေးနိုင်မည်မဟုတ်ပါ။ နောက်ထပ်အရေးကြီးသည့်အချက်မှာ အမေရိကန်နှင့် တရုတ်နိုင်ငံတို့အကြား ကွာဟနေသည့် နိုင်ငံရေးဆန္ဒ(Political Will) ဖြစ်ပါသည်။ ထိုင်ဝမ်သည် တရုတ်ကွန်မြူနစ်ပါတီရပ်တည်ရေးအတွက် သေရေးရှင်ရေး ဖြစ်သော်လည်း အမေရိကန်နိုင်ငံအတွက်မူ ထိုင်ဝမ်သည် သေရေးရှင်ရေးမဟုတ်ပါ။ ထို့ကြောင့် တရုတ်နိုင်ငံအနေဖြင့် ထိုင်ဝမ်ကိစ္စအတွက် နျူကလီးယားလက်နက် အသုံးပြုရန်ဆုံးဖြတ်လာနိုင်သကဲ့သို့ ရဲတင်းကြမ်းတမ်းသည့် စွန့်စားမှုများကိုလည်း ဆောင်ရွက်လိမ့်မည်ဖြစပြီး ထိုင်ဝမ်အပေါ် အရေးယူပိတ်ဆို့မှုများ ပြုလုပ်၍ စစ်ပွဲဖြစ်လာနိုင်သည့် အခြေအနေများ ဖြစ်လာအောင် လုပ်ဆောင်လျက် ရှိကြောင်း ဖော်ပြထားပါသည်။

ဤသို့သော အခြေအနေတွင် တရုတ်နိုင်ငံအနေဖြင့် နျူကလီးယားပါဝါ၌ အမေရိကန်နိုင်ငံနှင့် တန်းတူအခြေအနေရောက်လာမည်ဆိုပါက အမေရိကန်နိုင်ငံ၏ လက်ရှိဆောင်ရွက်နေမှုများသည် အရေးပါတော့မည်မဟုတ်ပါ။ ဝါရှင်တန်အနေဖြင့် ထိုအခြေအနေကွာဟမှုများကို အင်ဒို-ပစိဖိတ်ဒေသအတွင်း အနာဂတ်ပဋိပက္ခများ အတွက် ထည့်သွင်းတွက်ချက်ရမည်ဖြစ်ကြောင်း ဖော်ပြထားပါသည်။

တွေ့ရှိသုံးသပ်ချက်

ဆောင်းပါးတွင် တရုတ်နိုင်ငံအသုံးပြုနေသည့် နိုင်ငံရေးနှင့် စစ်ရေးနည်းလမ်း များကို အသေးစိတ်ဖော်ထုတ်ရေးသားထားပြီး ၎င်းအနေဖြင့် နျူကလီးယားပိုင်ဆိုင်မှုတွင် အမေရိကန်နိုင်ငံနှင့် တန်းတူဖြစ်လာမည်ဆိုပါက အမေရိကန်နိုင်ငံ၏ ဝိုင်းပတ်ပိတ်ဆို့ ဟန့်တားရေးမဟာဗျူဟာသည် အလုပ်ဖြစ်တော့မည်မဟုတ်ဟု ထောက်ပြရေးသား ထားခြင်းဖြစ်ပါသည်။ လက်ရှိကမ္ဘာပေါ်၌ နျူကလီးယားလက်နက်ပိုင်ဆိုင်မှုအများဆုံးသည်ရုရှားနိုင်ငံ ၅,၉၇၇ ခု ၊ ဒုတိယသည် အမေရိကန်နိုင်ငံ ၅,၄၂၈ ခု ဖြစ်ပြီး တရုတ်နိုင်ငံ အနေဖြင့် ၃၅၀ ခုဖြင့် တတိယနေရာမှရပ်တည်နေသော်လည်း အရေအတွက်အားဖြင့် အဆပေါင်းများစွာ ကွာဟလျက်ရှိသေးသည်ကို တွေ့ရှိရပါသည်။[2]နိုင်ငံတကာသုတေသီ များ၏ ခန့်မှန်းချက်များအရ ၂၀၃၅ ခုနှစ်တွင် တရုတ်နိုင်ငံ၏ နျူကလီးယားလက်နက်ပိုင်ဆိုင်မှုသည် အမေရိကန်နိုင်ငံထက် များပြားလာနိုင်ဖွယ်ရှိသည်ဟု သုံးသပ်ထား သည်ကိုလည်း တွေ့ရှိရပါသည်။ ထို့ကြောင့်လည်း ယခုကဲ့သို့ အမေရိကန်နိုင်ငံကို သတိပေးရေးသားသည့် သုတေသနဆောင်းပါးများ ထွက်ပေါ်လာရခြင်းဖြစ်ပါသည်။

မည်သို့ပင်ဆိုစေကာမူ စစ်ရေး၊ စီးပွားရေး၊ နိုင်ငံရေး ကဏ္ဍပေါင်းစုံတွင် ကမ္ဘာ့နံပါတ် ၁ ဖြစ်လာစေရန် ရည်ရွယ်ချက်ထားကြိုးပမ်းနေသော တရုတ်နိုင်ငံအတွက် ပထဝီနိုင်ငံရေးအရအရေးပါသော မြန်မာနိုင်ငံအနေဖြင့် အနာဂတ်တွင် ဖြစ်ပေါ်လာမည့် ပဋိပက္ခများ၊ ကဏ္ဍပေါင်းစုံတွင် တွန်းတိုက်မှုများကို တိုက်ရိုက်မခံရစေရန် ရှောင်ရှား နိုင်မည်ဆိုလျှင်ပင် ထိုအားပြိုင်မှုများ၏ ရိုက်ခတ်မှုများကို မလွဲမသွေရင်ဆိုင်ရမည်သာ ဖြစ်ပါသည်။ ထို့ပြင် တရုတ်နိုင်ငံသည် ၎င်းချမှတ်ထားသော စစ်ရေးမဟာဗျူဟာ၊ နည်းဗျူဟာများမှ သင့်လျော်သောနည်းလမ်းများအသုံးပြုပြီး မြန်မာနိုင်ငံ၏ ပြည်တွင်း နိုင်ငံရေး ရေချိန်နှင့် နိုင်ငံတကာဆက်ဆံရေးအပေါ်သုံးသပ်၍ ၎င်းတို့ အကျိုးရှိနိုင်သော နယ်ပယ်များတွင်သာ ဆက်ဆံရေးကောင်းမွန်ရန် ဆောင်ရွက်မည်ဖြစ်ပါသည်။ ထို့ကြောင့် နိုင်ငံကြီးများနှင့်ဆက်ဆံရေးတွင် မိမိတို့အကျိုးစီးပွားမယုတ်လျော့ရန်၊ သူလည်းအကျိုးရှိ ကိုယ်လည်းအကျိုးရှိ အခြေအနေအတွင်း သာတူညီမျှဆက်ဆံရေးကို တည်ဆောက်နိုင်ရန်မှာ သက်ဆိုင်ရာနိုင်ငံများ၏ ပညာခန်းပင်ဖြစ်ပါကြောင်း သုံးသပ်ဖော်ပြလိုက်ရပါသည်။

Myanmar Aspect

86081623

[1]။ Michael Tkacik,“ Will China Embrace Nuclear Brinkmanship as It Reaches Nuclear Parity?”. The Diplomat. August 5, 2023 [https://thediplomat.com/.../will-china-embrace.../]accessed on August 8, 2023.

[2] “Countries With Nuclear Weapons 2023,” Wisevoter, accessed August 16, 2023, https://wisevoter.com/cou.../countries-with-nuclear-weapons/.

တောင်တရုတ်ပင်လယ်အတွင်း ဖိလစ်ပိုင်သင်္ဘောများအားကာကွယ်စောင့်ရှောက်မည်ဟု အမေရိကန်နိုင်ငံက ကတိကဝတ်ပြုလိုက်သည့် ကိစ္စနှင့်ပတ်သက်ပြီး ဘာတွေသိထားသင့်သလဲ

 

နိဒါန်း

၂၀၂၃ ခုနှစ်၊ ဩဂုတ်လ ၇ ရက်နေ့တွင် တရုတ်ကမ်းခြေစောင့်သင်္ဘောသည် ဖိလစ်ပိုင်နိုင်ငံ၏ ထောက်ပံ့ရေးရေယာဉ်များအား ရေအမြောက်ဖြင့်ထိုး၍ ခြိမ်းခြောက် ဟန့်တားမှုများပြုလုပ်ခဲ့မှုနှင့်ပတ်သက်ပြီး အမေရိကန်နိုင်ငံ၏ တုံ့ပြန်မှုများနှင့် ဂျပန်၊ ဩစတြေးလျ၊ ကနေဒါ၊ ဂျာမနီ၊ ပြင်သစ်၊ ဗြိတိန်နိုင်ငံနှင့် EU တို့၏ သဘောထားများနှင့် ပတ်သက်ပြီး သုံးသပ်ဖော်ပြသွားပါမည်။ [1]

ဖော်ပြချက်

တရုတ်-ဖိလစ်ပိုင် အငြင်းပွားရာကျွန်းအနီးတွင် ဖိလစ်ပိုင်နိုင်ငံ၏ ထောက်ပံ့ရေး ရေယာဉ်များအား တရုတ်ကမ်းခြေစောင့်သင်္ဘောမှ ရေအမြောက်ဖြင့်ထိုး၍ ဟန့်တားမှုများ ပြုလုပ်ခဲ့ခြင်းနှင့်ပတ်သက်၍ အမေရိကန်နိုင်ငံကာကွယ်ရေးဝန်ကြီး Llyod Austin ကတောင်တရုတ်ပင်လယ်အတွင်း ဖိလစ်ပိုင်သင်္ဘောများ တိုက်ခိုက်ခံရမှုများကို အပြည့်အဝ ကာကွယ်သွားမည်ဟု ကတိကဝတ်ပြုခဲ့ပါသည်။ ဖိလစ်ပိုင်ရေယာဉ်များသည် ၎င်းတို့၏ အထူးသီးသန့် စီးပွားရေးဇုန်အတွင်းတွင်ရှိသော Ayungin ကျွန်း၊ သို့မဟုတ် Second Thomas ကျွန်းရှိ သောင်တင်နေသော စစ်ရေယာဉ်များပေါ်မှ တပ်ဖွဲ့များအတွက် ထောက်ပံ့ပို့ဆောင်ရေးဆိုင်ရာ ပြန်လည်ဖြည့်တင်းမှုများဆောင်ရွက်ရန် မောင်းနှင်နေစဉ် အတွင်း တရုတ်ကမ်းခြေစောင့်သင်္ဘောက နှောင့်ယှက်ဟန့်တားမှုများ ပြုလုပ်ခဲ့ခြင်း ဖြစ်ပါသည်။ အဆိုပါ နှောင့်ယှက်မှုနှင့်ပတ်သက်၍ ၂၀၂၃ ခုနှစ် ဩဂုတ်လ ၈ ရက်တွင် အမေရိကန်နိုင်ငံကာကွယ်ရေးဝန်ကြီး Llyod Austin က ဖိလစ်ပိုင်နိုင်ငံကာကွယ်ရေး ဝန်ကြီး Gilberto Teodoro နှင့် တွေ့ဆုံ၍ အမေရိကန်-ဖိလစ်ပိုင် ခိုင်မာအားကောင်းသည့် မိတ်ဖက်ဆက်ဆံရေးကို ထပ်လောင်းအတည်ပြုပြောကြားခဲ့ပြီး နှစ်နိုင်ငံအကြား စစ်ရေး လေ့ကျင့်မှုများ၊ ပူးပေါင်းဆောင်ရွက်မှုများနှင့် စစ်ရေးထောက်ပံ့မှုများ ပြုလုပ်သွားမည်ဟုကတိပြုခဲ့ကြောင်း ဖော်ပြထားပါသည်။

ထို့နောက် အမေရိကန်နိုင်ငံကာကွယ်ရေးဝန်ကြီး Llyod Austin က တရုတ်နိုင်ငံ ရေယာဉ်မှ ရေအမြောက်ဖြင့် ထိုးခြင်းအပါအဝင် ရေကြောင်းလုံခြုံမှုမရှိသော လုပ်ဆောင်မှု များသည် ဒေသတွင်းတည်ငြိမ်အေးချမ်းရေးကို ခြိမ်းခြောက်နေခြင်းဖြစ်သည်ဟု ဆိုသည်။ ထို့ကြောင့် အမေရိကန်-ဖိလစ်ပိုင် အပြန်အလှန်ကာကွယ်ရေးသဘောတူစာချုပ် ချဲ့ထွင်မည်ဖြစ်ပြီး ပစိဖိတ်နှင့် တောင်တရုတ်ပင်လယ်အတွင်း ပုဂ္ဂလိကရေယာဉ်များမှ လေယာဉ်တင် သင်္ဘောများ၊ စစ်သင်္ဘောများနှင့် ကမ်းခြေစောင့်တပ်များအထိပါ တာဝန်ယူဆောင်ရွက် သွားမည်ဟု ထပ်လောင်းပြောကြားခဲ့ပါသည်။ ၁၉၅၁ ခုနှစ်တွင် အမေရိကန်နှင့် ဖိလစ်ပိုင် နိုင်ငံတို့သည် အပြန်အလှန်ကာကွယ်ရေးသဘောတူစာချုပ်ကို ချုပ်ဆိုခဲ့ပြီး ပစိဖိတ်ဒေသ အတွင်း နိုင်ငံတစ်နိုင်ငံ တိုက်ခိုက်ခံရခြင်းသည် အခြားနိုင်ငံ၏ တည်ငြိမ်အေးချမ်းရေးကို အန္တရာယ်ဖြစ်စေသည်ဟု မှတ်ယူထားကြပါသည်။ ယခုအခါ တရုတ်နိုင်ငံ၏ အပြုအမူများက ထိုစာချုပ်ကို ပြန်လည်အသက်ဝင်လာစေရန် ဦးတည်စေကြောင်း ဆောင်းပါးတွင် ဖော်ပြထားပါသည်။

တရုတ်နိုင်ငံသည် နယ်မြေအငြင်းပွားမှုနှင့်ပတ်သက်၍ ၂၀၁၆ ခုနှစ်က နိုင်ငံတကာ ခုံရုံး The Hague ၏ စီရင်မှုများကို ငြင်းဆိုထားပြီး တောင်တရုတ်ပင်လယ်အတွင်း နယ်မြေအငြင်းပွားမှုများကို Nine-Dash Line ဖြင့် ပိုင်ဆိုင်ကြောင်း အခိုင်အမာပြောကြား ထားကာ နယ်မြေပိုင်ဆိုင်မှုများကို ဆက်လက်လုပ်ဆောင်လျက်ရှိပါသည်။ ဖိလစ်ပိုင် နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူတစ်ဦးကမူ တရုတ်နိုင်ငံ၏ လုပ်ရပ်များသည် ဖိလစ်ပိုင်နိုင်ငံ၏ တရားဝင်ဖြစ်မှုနှင့် နိုင်ငံ၏အထူးသီးသန့်စီးပွားရေးဇုန်အတွင်း ပုံမှန် ဆောင်ရွက်မှုများကို နှောင့်နှေးစေကြောင်းနှင့် ယခုဆောင်ရွက်ချက်သည်လည်း ထောက်ပံ့ ပို့ဆောင်ရေးဆိုင်ရာ ပြန်လည်ဖြည့်တင်းရေးကိစ္စတစ်ခုသာဖြစ်သည်ဟု ပြောကြား ထားပါသည်။ သို့သော် တရုတ်နိုင်ငံခြားရေးဝန်ကြီးဌာနကလည်း ဖိလစ်ပိုင်နိုင်ငံ၏ ပြောကြားချက်များကို ငြင်းဆိုထားပြီး တရုတ်ကမ်းခြေစောင့်ရေယာဉ်များသည် ဥပဒေနှင့် အညီ လုပ်ဆောင်ခြင်းဖြစ်ပြီး အပြုသဘောဆောင်သည့် ထိန်းကြောင်းမှုတစ်ခုသာ ဖြစ်သည်ဟု ပြောကြားထားကြောင်းဖော်ပြထားပါသည်။

အဆိုပါကိစ္စရပ်များနှင့်ပတ်သက်၍ ဂျပန်၊ ဩစတြေးလျ၊ ကနေဒါ၊ ဂျာမနီ၊ ပြင်သစ်၊ ဗြိတိန်နိုင်ငံနှင့် EU တို့က ပြစ်တင်ဝေဖန်လျက်ရှိပြီး ဖိလစ်ပိုင်နိုင်ငံဆိုင်ရာ ဂျပန်နိုင်ငံသံအမတ် Kazuhiko Koshikawa သည် တရုတ်နိုင်ငံ၏ လုပ်ရပ်များကို လုံးဝလက်မခံကြောင်း၊ အဆိုပါနှောင့်ယှက်တိုက်ခိုက်မှုသည် ပင်လယ်ရေကြောင်း ဆိုင်ရာဥပဒေကို ထိပါးစေနိုင်ပြီး ရေကြောင်းလုံခြုံရေးကို အန္တရာယ်ဖြစ်စေနိုင်ကြောင်း၊ ကနေဒါနိုင်ငံသံအမတ်သည် တရုတ်နိုင်ငံ၏ အန္တရာယ်များပြီး ရန်စသည့်လုပ်ရပ်များကိုလုံးဝလက်မခံကြောင်းနှင့် ပြင်သစ်၊ ဂျာမနီနှင့် အခြားနိုင်ငံများကမူ The Hague ၏ စီရင်ချက်များကို ထောက်ခံသည်ဟု ပြောကြားထားပါသည်။ ထို့ပြင် အမေရိကန် စီးပွားရေးပညာရှင် Zack Cooper သည် တရုတ်နိုင်ငံအနေဖြင့် ဖိလစ်ပိုင်အထူးသီးသန့် စီးပွားရေးဇုန်အတွင်း ယခုကဲ့သို့အန္တရာယ်များသည့်ကိစ္စကို လုပ်ဆောင်ရန် မသင့်ကြောင်းနှင့် တရုတ်နိုင်ငံ၏ လုပ်ရပ်များသည် တောင်တရုတ်ပင်လယ်အတွင်း အခြားသော ရေပိုင်နက် အငြင်းပွားမှုပြဿနာများတွင် ၎င်းကျင့်သုံးမည့်နည်းလမ်းကို ပြသနေခြင်းဖြစ်ကြောင်း ဖော်ပြထားပါသည်။

ထို့ပြင် အမေရိကန်နိုင်ငံသည် ဖိလစ်ပိုင်နိုင်ငံအား တရုတ်နိုင်ငံ ရေကြောင်း လှုပ်ရှားမှုဆိုင်ရာ ထောက်လှမ်းရေးသတင်းများကို ရက်သတ္တပတ်ခန့် နောက်ကျပြီး ပေးပို့နေသော်လည်း ယခုအခါ အချိန်နှင့်တစ်ပြေးညီ ပေးအပ်သွားမည်ဟု ဆိုသည်။ အမေရိကန် နိုင်ငံ၏ ပစိဖိတ်ရေယာဉ်စုအကြီးအကဲ ဗိုလ်ချုပ်ကြီး Samuel Paparo က ဖိလစ်ပိုင် နိုင်ငံအား ထောက်ပံ့ပို့ဆောင်ရေးဆိုင်ရာ ပြန်လည်ဖြည့်တင်းရေးလုပ်ငန်းများအတွက် ထောက်လှမ်းရေး သတင်းထောက်ပံ့မှုများ လုပ်ဆောင်ပေးလျက်ရှိကြောင်း၊ ထို့ပြင် မိတ်ဖက်နိုင်ငံများကလည်း အထွေထွေလုံခြုံရေးဆိုင်ရာ စစ်ဘက်သတင်းထောက်လှမ်းရေး သဘောတူညီချက်များအောက်မှ ထောက်လှမ်းရေးသတင်းအချက်အလက် ဖလှယ်ရေး လုပ်ငန်းများလုပ်ဆောင်သွားရန် စီစဉ်လျက်ရှိကြောင်း ပြောကြားထားသည်။ အမေရိကန်နိုင်ငံအကြံပေးအဖွဲ့ အောက်မှ အာရှ-ပစိဖိတ် လုံခြုံရေးဥက္ကဋ္ဌ Patrick Cronin ကလည်း ဖိလစ်ပိုင်နိုင်ငံ၏ ကာကွယ်ရေးစွမ်းဆောင်ရည်များကို ကူညီထောက်ပံ့ပေးမည်ဟု ပြောကြားထားပြီး ဖိလစ်ပိုင်နိုင်ငံအပါအဝင် အခြားအာဆီယံနိုင်ငံများအနေဖြင့်လည်း တရုတ်နိုင်ငံ ကဲ့သို့ ဒေသတွင်းစံချိန်စံနှုန်းများကို ချိုးဖောက်ပြီး နိုင်ငံတကာဥပဒေနှင့်ဆန့်ကျင်သော ကိစ္စရပ်များကို စုပေါင်းဆန့်ကျင် မည်ဟု ယုံကြည်ကြောင်း ဆောင်းပါးတွင် ရေးသားဖော်ပြထားသည်ကို တွေ့ရှိရပါသည်။

တွေ့ရှိသုံးသပ်ချက်

တရုတ်နှင့် ဖိလစ်ပိုင်နိုင်ငံတို့၏ မိတ်ဖက်ဆက်ဆံရေးသည် ရေပြင်ပိုင်ဆိုင်မှုနှင့် ပတ်သက်၍ ယခင်ကအငြင်းပွားမှု၊ ထိပ်တိုက်ရင်ဆိုင်မှုအချို့ရှိခဲ့ပြီး ယခုဖြစ်ပွားခဲ့သည့် ကိစ္စရပ်က အခြေအနေကို ပိုမိုတင်းမာလာစေခဲ့ပါသည်။ တောင်တရုတ်ပင်လယ် အတွင်းရှိ စပရတ်တလေကျွန်းများအပါအဝင် တရုတ်၊ ဖိလစ်ပိုင်၊ ထိုင်ဝမ်၊ မလေးရှားနှင့် ဗီယက်နမ်နိုင်ငံတို့အကြား နယ်မြေအငြင်းပွားမှုများရှိနေပြီး တရုတ်နိုင်ငံကမူ သမိုင်းကြောင်း တစ်လျှောက်လက်ခံထားသည့် Nine-Dash Line ကိုသာ အခိုင်အမာအဆိုပြုလျက် ရှိပါသည်။ ၎င်းအငြင်းပွားမှုများအနက်မှ Second Thomas Shoal အနီးတွင် တရုတ်နှင့် ဖိလစ်ပိုင်နိုင်ငံတို့ ရေပြင်ပိုင်နက်အငြင်းပွားမှုများ ယခုနှစ်အတွင်း မကြာခဏ ဖြစ်ပေါ် လေ့ရှိပါသည်။ အဆိုပါ ဒေသတွင်း ရေပြင်ပိုင်နက်အငြင်းပွားမှုတွင် ၂၀၁၂ ခုနှစ်မှစတင်၍ တင်းမာလာရာမှ ယခု ၂၀၂၃ ခုနှစ်၊ ဩဂုတ်လတွင် ဖိလစ်ပိုင်ရေယာဉ်များအား တရုတ်ကမ်းခြေစောင့်သင်္ဘောမှ ရေအမြောက်ဖြင့်ထိုး၍ နှောင့်ယှက်ဟန့်တားခဲ့သည့် ထိပ်တိုက်တွေ့ဆုံမှုသို့ ရောက်ရှိလာခဲ့ခြင်း ဖြစ်ပါသည်။

အဆိုပါလုပ်ရပ်များနှင့် ပတ်သက်၍ အမေရိကန်နိုင်ငံအပါအဝင် အနောက် အုပ်စုဝင်နိုင်ငံများ၊ တရုတ်နိုင်ငံ၏ တောင်တရုတ်ပင်လယ်အတွင်း အင်အားကြီးမားမှုကို မလိုလားသည့် နိုင်ငံများက အချိန်ကိုက် တရုတ်နိုင်ငံအား ရှုတ်ချလျက်ရှိပြီး တရုတ် နိုင်ငံ၏ လုပ်ရပ်သည် ဒေသတွင်းလုံခြုံရေးကို ခြိမ်းခြောက်လျက်ရှိသည်ဟု ပြောကြား ထားပါသည်။ တရုတ်နိုင်ငံသည်လည်း အခြားနိုင်ငံများ၏ အချုပ်အခြာအာဏာကို လေးစားမည်၊ အနောက်အုပ်စုနှင့် မတူညီသည့် ရှုထောင့်ဖြင့် အင်အားငယ်သော နိုင်ငံများကို ချဉ်းကပ်မည်ဟု ထုတ်ဖော်ပြောကြားခဲ့သော်လည်း အင်အားကြီးနိုင်ငံ တစ်နိုင်ငံအဖြစ် တိုးတက်လာသည့် အခြေအနေသို့ရောက်လာလျှင် နိုင်ငံငယ်များအပေါ် အထက်စီးမှ ဆက်ဆံတတ်သည့်သဘောသဘာဝအရ အင်အားသုံး၍ ဆက်ဆံလာမည်ဟူသည့် သင်ခန်းစာကို ဖော်ထုတ်ရရှိပါသည်။

တရုတ်နိုင်ငံနှင့် အာဆီယံနိုင်ငံများသည် တောင်တရုတ်ပင်လယ်ရေပြင် ပိုင်နက်နှင့်ပတ်သက်၍ Code of Conduct နှင့်အညီ ဆောင်ရွက်ရန် သဘောတူညီ ထားခဲ့ပါသည်။ သို့ရာတွင် ဒေသတွင်းနိုင်ငံများ၊ အထူးသဖြင့် တရုတ်နိုင်ငံနှင့် ရေပိုင်နက် နယ်နိမိတ်အငြင်းပွားနေကြသည့် အာဆီယံနိုင်ငံများအနေဖြင့်လည်း တရုတ်နိုင်ငံ၏ အဆိုပါလုပ်ရပ်ကြောင့် အမေရိကန်နိုင်ငံနှင့် အနောက်အုပ်စုဘက်သို့ ပိုယိမ်းလာနိုင်ပြီး အာဆီယံအဖွဲ့ဝင်နိုင်ငံများအတွင်း အုပ်စုဖွဲ့မှု/ကွဲမှုများ ဖြစ်ပေါ်လာနိုင်သည်ဟု ယူဆမိ ပါသည်။ ထို့ကြောင့် နိုင်ငံငယ်များအနေဖြင့် အင်အားကြီးနိုင်ငံနှင့် ဆက်ဆံရေး၌ “ကြက်ဥအားလုံးအား ခြင်းတစ်လုံးတည်းတွင် မထည့်ပါနှင့်” (Don’t Put All Eggs in One Basket)ဟူသော မူသည်သာ ရေရှည်အလုပ်ဖြစ်လိမ့်မည်ဖြစ်ကြောင်း သုံးသပ်ဖော်ပြလိုက်ရပါသည်။

Myanmar Aspect

85081523

[1]။ RYO NAKAMURA,“ U.S. vows to defend Philippine boats in South China Sea”. Nikkei Asia. August 9, 2023 [https://asia.nikkei.com/.../U.S.-vows-to-defend... on August 10, 2023.

ကမ္ဘောဒီးယားနိုင်ငံဝန်ကြီးချုပ် ဟွန်ဆန် ၏သား ဟွန်မနက် အား ဝန်ကြီးချုပ်အသစ်အဖြစ် ခန့်အပ်ခဲ့မှုနှင့် ပတ်သက်ပြီး ဘာတွေသိထားသင့်သလဲ

 

နိဒါန်း

ကမ္ဘောဒီးယားနိုင်ငံဘုရင်အနေဖြင့် ဝန်ကြီးချုပ် ဟွန်ဆန်၏သား ဟွန်မနက် အား ဝန်ကြီးချုပ်အသစ်အဖြစ် ခန့်အပ်လွှာပေးအပ်ခဲ့မှု၊ ကမ္ဘောဒီယားနိုင်ငံ၏ ပြည်တွင်းနိုင်ငံရေးအခြေအနေများ၊ ဝန်ကြီးချုပ် ဟွန်ဆန်၏ ရှေ့ဆက်မည့် နိုင်ငံရေး ခရီးအလားအလာများနှင့်ပတ်သက်၍ သိသင့်သည်များကို သုံးသပ်ဖော်ပြသွားပါမည်။ [1]

ဖော်ပြချက်

ကမ္ဘောဒီးယားနိုင်ငံဘုရင်က နိုင်ငံ၏ ကာလအရှည်ကြာဆုံး ခေါင်းဆောင် ဖြစ်သူ ဟွန်ဆန်(Hun Sen)၏ သားအကြီးဆုံးဖြစ်သူ ဟွန်မနက်(Hun Manet)အား နောက်တက်မည့် ဝန်ကြီးချုပ်အသစ်အဖြစ် ခန့်အပ်လွှာပေးအပ်ခဲ့ပြီး ဖြစ်ပြီး ဟွန်မနက်အနေဖြင့် ဩဂုတ်လနှောင်းပိုင်းတွင် ၎င်း၏ တာဝန်ဝတ္တရားများကို စတင် ထမ်းဆောင်မည်ဖြစ်ပါသည်။ ဟွန်ဆန်တာဝန်စတင်ယူခဲ့သည့် ၁၉၈၅ ခုနှစ်နောက်ပိုင်း ပထမဆုံးသော ခေါင်းဆောင်အပြောင်းအလဲကို ဖော်ပြထားသည့် ကမ္ဘောဒီးယားနိုင်ငံဘုရင် Norodom Sihamoni ၏ တော်ဝင်အမိန့်စာကို ဩဂုတ်လ ၇ ရက်တွင် ထုတ်ပြန်ခဲ့ခြင်းဖြစ်ပါသည်။ အဆိုပါအမိန့်စာသည် ရွေးကောက်ပွဲတွင် အမတ်နေရာ ၉၆ ရာခိုင်နှုန်းကို အနိုင်ရရှိခဲ့သည့် ကမ္ဘောဒီးယားနိုင်ငံ၏ အာဏာရပါတီဖြစ်သည့် Cambodia People’s Party (CPP)၏ ပန်ကြားမှုအပြီးတွင် ထုတ်ပြန်ခဲ့ခြင်းဖြစ်ပါသည်။ သို့သော်လည်း လက်ရှိပြုလုပ်ခဲ့သည့် ကမ္ဘောဒီးယားနိုင်ငံ၏ ရွေးကောက်ပွဲတွင် အတိုက်အခံနိုင်ငံရေး ပါတီအချို့ကို ဝင်ရောက်ယှဉ်ပြိုင်ရန် တားမြစ်ခဲ့သည့်အတွက် အတုအယောင် ရွေးကောက်ပွဲဟု ရှုမြင်နေကြကြောင်း ဖော်ပြထားပါသည်။

ဩဂုတ်လ ၇ ရက်နေ့ကစ၍ အသက်ဝင်ခဲ့သည့် အဆိုပါအမိန့်စာ၌ ကမ္ဘောဒီးယားနိုင်ငံဘုရင်က (၇) ကြိမ်မြောက် အမျိုးသားလွှတ်တော်အတွက် ဟွန်မနက်အားနိုင်ငံတော်ဝန်ကြီးချုပ်အဖြစ် ခန့်အပ်လိုက်သည်ဟု ဖော်ပြထားပါသည်။ ဟွန်မနက် အနေဖြင့် လွှတ်တော်(Cambodia’s Parliament)၏ အတည်ပြုပေးမှုအတွက် အစိုးရ အဖွဲ့ကို ဖွဲ့စည်းရန် ပြင်ဆင်ရတော့မည်ဖြစ်ပြီး အတည်ပြုမှုအတွက် မဲပေးခြင်း များကို ဩဂုတ်လ ၂၂ ရက်တွင် နောက်ဆုံးပြုလုပ်သွားမည်ဖြစ်ပါသည်။ ဟွန်ဆန်သည် ၎င်း၏ သားဖြစ်သူကို ရာထူးလွှဲပြောင်းပေးခြင်းဖြင့် အသွင်ကူးပြောင်းရေးကို အရှိန်မြှင့် ဆောင်ရွက်နေပြီး ရွေးကောက်ပွဲရလဒ်များကို ဩဂုတ်လ ၅ ရက်တွင် တရားဝင် ထုတ်ပြန်ခဲ့သည့်အတွက်ကြောင့် ယခင်မဲပေးမှုစနစ်များထက် ပိုမိုမြန်ဆန်နေကြောင်း ဖော်ပြထားပါသည်။

ဟွန်ဆန်က ၎င်းအနေဖြင့် ဝန်ကြီးချုပ်အဖြစ် နောက်ထပ် ၁၅ ရက်ကြာ ဆက်လက်ရှိနေမည်ဖြစ်ပြီး ဩဂုတ်လ ၂၂ ရက်နေ့တွင် ရာထူးမှ အပြီးတိုင်နုတ်ထွက် မည်ဟု တယ်လီဂရမ်ချန်နယ်မှ ကြေညာခဲ့ပါသည်။ ၎င်းအနေဖြင့် CPP ၏ အကြီးအကဲ အဖြစ်ဖြင့် နိုင်ငံရေးတွင် ပါဝင်ဆောင်ရွက်သွားမည်ဖြစ်ပြီး ၂၀၂၄ ခုနှစ်တွင်ပြုလုပ်မည့် အထက်လွှတ်တော်ရွေးကောက်ပွဲတွင် အထက်လွှတ်တော် ခေါင်းဆောင် ဖြစ်လာမည်ဖြစ်ကြောင်းနှင့် ကမ္ဘောဒီးယားနိုင်ငံဘုရင်၏ အထူးအကြံပေး အဖွဲ့(Supreme Privy Council)တွင်လည်း ဆက်လက်ဆောင်ရွက်မည်ဖြစ်ပါသည်။ ၎င်းအနေဖြင့် ၂၀၃၃ ခုနှစ်အထိ အခြားနိုင်ငံရေးရာထူးများတွင် တာဝန်ထမ်းဆောင်ရန် စီစဉ်ထား သည်ဟု ‌ကြေညာထားကြောင်း ဖော်ပြထားပါသည်။

ဆက်လက်၍ အသက် ၄၅ နှစ်ရှိပြီဖြစ်သော ဟွန်မနက် သည် ကမ္ဘောဒီးယား ဘုရင့်တပ်မတော်၏ ဒုတိယကာကွယ်ရေးဦးစီးချုပ်ရာထူးဖြစ်လာရန် ရာထူးအဆင့်ဆင့်ကို ဖြတ်ကျော်ခဲ့ရပါသည်။ ယခုနှစ်အစောပိုင်းတွင် ဒုတိယကာကွယ်ရေးဦးစီးချုပ်ရာထူး (Four Star General)တာဝန်ကို ထမ်းဆောင်ခဲ့ရပြီး လက်ရှိအချိန်တွင် ဖနွမ်ပင် မဲဆန္ဒနယ်မှ လွှတ်တော်အမတ်တစ်ဦးဖြစ်လာခဲ့ပါသည်။ ဝန်ကြီးချုပ်ရာထူး အပြောင်းအလဲသည် CPP အတွင်း မျိုးဆက်သစ်အပြောင်းအလဲ၏ အစိတ်အပိုင်းတစ်ခုဖြစ်ပြီး အဆိုပါအပြောင်းအလဲကို အဆင့်မြင့်အရာရှိများ၏ သားသမီးများက ၎င်းတို့မိဘများ၏ ရာထူးအားလွှဲပြောင်းယူခြင်းဖြစ်သည်ဟု ရှုမြင်နေကြပါသည်။ ကာကွယ်ရေးဝန်ကြီးနှင့် ပြည်ထဲရေးဝန်ကြီးတို့၏သားများသည်လည်း ၎င်းတို့ဖခင်များ၏ ရာထူးကို လွှဲပြောင်း ရယူကြမည်ဖြစ်ကြောင်း ဖော်ပြထားပါသည်။

ဩဂုတ်လ ၃ ရက်နေ့က ပြောကြားခဲ့သည့် မိန့်ခွန်း၌ ဟွန်ဆန်က ကမ္ဘောဒီးယားနိုင်ငံ၏ အခြေအနေမှာ တည်ငြိမ်မှုနှင့် လုံခြုံမှုရှိနေပြီး မျိုးဆက်သစ်များသည်လည်း နိုင်ငံကို ကောင်းမွန်စွာ ဦးဆောင်နိုင်ရန် ပြင်ဆင်ထားပြီးဖြစ်သည့်အတွက် ၎င်းအနေဖြင့် ရာထူးမှနုတ်ထွက်ရန် ဆုံးဖြတ်ခဲ့ခြင်းဖြစ်သည်ဟု ပြောကြားခဲ့ပါသည်။ ဆက်လက်၍ နိုင်ငံရေးလှုပ်ရှားမှုများနောက်တွင် ဟွန်ဆန် ဆက်လက်တည်ရှိနေခြင်းက နိုင်ငံကို နောက်ကွယ်မှ ဆက်လက်ထိန်းကျောင်းနိုင်ရန်နှင့် မိသားစုနှင့် ဆက်နွှယ်နေသည့် အာဏာရပါတီဝင်များအကြားတွင် အကျိုးစီးပွားကို ထိန်းညှိနိုင်ရန်ဖြစ်ပါသည်။ ဟွန်ဆန်၏ မိန့်ခွန်းတွင် ၎င်းအနေဖြင့် အစိုးရအသစ်၏ ဆုံးဖြတ်ချက်များကို ဝင်ရောက်စွက်ဖက်မည် မဟုတ်ကြောင်းနှင့် ဟွန်မနက် အစိုးရအတွက် စိုးရိမ်ရသည့်အခြေအနေမျိုး ရောက်လာပါက ၎င်းအနေဖြင့် ဝန်ကြီးချုပ်ရာထူးကို ပြန်လည်ထမ်းဆောင်မည်ဟု သတိပေးထားပြီး ကမ္ဘောဒီးယားနိုင်ငံအား အကျပ်အတည်းများအတွင်း ကျရောက်သွားမည့် အခြေအနေများကို ခွင့်ပြုသွားမည်မဟုတ်ဟု ပြောကြားခဲ့ကြောင်း ဖော်ပြထားပါသည်။

တွေ့ရှိသုံးသပ်ချက်

ကမ္ဘောဒီးယားနိုင်ငံ၏ အစိုးရအသစ်သည် လူငယ်များဖြင့် ဖွဲ့စည်းထားသည်ဟု ဆိုသော်ငြားလည်း မိဘများမှ သားသမီးများကို လက်ဆင့်ကမ်းနေသည့်အတွက် ဆွေမျိုး ကောင်းစားရေးဝါဒ(Nepotism)သာဖြစ်သည်ဟု နိုင်ငံအတွင်းရှိ အတိုက်အခံများနှင့် အနောက်အုပ်စုမှ နာမည်တပ်လျက်ရှိပါသည်။ ဟွန်မနက်၏ အစိုးရအဖွဲ့သည် တရားဝင် အစိုးရအဖွဲ့ဖြစ်လာရန်အတွက် ဩဂုတ်လ ၂၂ ရက်နေ့တွင် ကျင်းပမည့် လွှတ်တော်မှ ထောက်ခံမဲပေးရန်နှင့် အတည်ပြုပေးရန် လိုအပ်နေသေးသော်လည်း ဟွန်မနက် အနေဖြင့် ဝန်ကြီးချုပ်ဖြစ်လာရန် သေချာသည့်အခြေအနေတွင် ရှိနေပါသည်။ လက်ရှိ အချိန်တွင် ဟွန်ဆန်အနေဖြင့် ဝန်ကြီးချုပ်ရာထူးမှ နုတ်ထွက်သည်ဆိုသော်လည်း ကမ္ဘောဒီးယားနိုင်ငံ၏ နိုင်ငံရေးလမ်းကြောင်းတွင် သာမာန်ထက်လွန်ကဲသည့် ပြောင်းလဲမှု များကို ထိန်းကျောင်းနိုင်ရန်အတွက် ပါတီ၏ဥက္ကဋ္ဌအဖြစ်လည်းကောင်း၊ Supreme Privy Council တွင်လည်းကောင်း၊ အထက်လွှတ်တော်ဥက္ကဋ္ဌအဖြစ်လည်းကောင်း တာဝန်ယူထားရန် ပြင်ဆင်ထားရှိပြီးဖြစ်သည်ကို တွေ့ရှိရပါသည်။

ဟွန်ဆန် နောက်ခံပြုနေပြီး ၎င်း၏ သားဖြစ်သူ ဦးဆောင်မည့် ကမ္ဘောဒီးယား နိုင်ငံ၏ နိုင်ငံရေးစနစ်ကို နိုင်ငံအတွင်း အယူအဆမတူသူများနှင့် အနောက်အုပ်စုက ၎င်းတို့ လက်ကိုင်ထားသည့် ဒီမိုကရေစီစံနှုန်းများနှင့် မညီညွတ်ကြောင်း ဝေဖန်မှုများ ရှိနေသော်လည်း ဟန့်တားနှောင့်ယှက်ခြင်းမပြုနိုင်သည့် အကြောင်းအချက်တချို့ကို ဖော်ထုတ်ရရှိပါသည်။ ပထမတစ်ချက်မှာ ကမ္ဘောဒီးယားနိုင်ငံ၏ အစိုးရအပြောင်းအလဲကို ဆွေးမျိုးကောင်းစားရေး(Nepotism)ဟု ခေါင်းစဉ်တပ်ခံရသော်လည်း ဟွန်ဆန်အနေဖြင့် ၎င်းလက်ဆင့်ကမ်းမည့်မျိုးဆက်များကို ပညာအရာတွင်သာမက နိုင်ငံရေး၊ စီးပွားရေး၊ စစ်ရေးတို့တွင်ပါ အတွေ့အကြုံရှိစေရေး ထောက်ကွက်မရှိအောင် တစ်ဆင့်ခြင်း ပြုစု ပျိုးထောင်ထားခဲ့ကြောင်း တွေ့ရှိရပါသည်။

ဟွန်ဆန် ၏ သားဖြစ်သူ ဟွန်မနက်သည် West Point တက္ကသိုလ်ဆင်း ဖြစ်ပြီး အမေရိကန်နိုင်ငံမှ စီးပွားရေးမဟာဘွဲ့နှင့် အင်္ဂလန်နိုင်ငံမှ စီးပွားရေးပါရဂူဘွဲ့ရရှိခဲ့သူဖြစ်ပါသည်။ အတွေ့အကြုံအရာတွင်လည်း တပ်မတော်အရာရှိငယ်အဆင့်မှ ဗိုလ်ချုပ်ကြီးအဆင့်အထိ အဆင့်ဆင့်တာဝန်ထမ်းဆောင်စေပြီး ပျိုးထောင်ထားကြောင်း တွေ့ရှိရပါသည်။ အခြားသော ဟွန်ဆန်အစိုးရ အဖွဲ့ဝင်များ၏ သားများသည်လည်း အလားတူ ပြုစုပျိုးထောင်ထားသူများဖြစ်သည်ကို လေ့လာတွေ့ရှိရပါသည်။[2] ထို့ပြင် ဟွန်ဆန်အနေဖြင့် ပြည်တွင်းနိုင်ငံရေးနှင့် စီးပွားရေးအခြေအနေကို တည်ငြိမ်အောင် ထိန်းသိမ်းထားပြီး အင်အားကြီးနိုင်ငံများမှ အခြားစစ်ရေးနှင့် စီးပွားရေးကိစ္စရပ်များကြောင့် အာရုံမစိုက်နိုင်သည့်အချိန်တွင် အစိုးရအပြောင်းအလဲကို အချိန်ကိုက် ဆောင်ရွက်နိုင်ခဲ့ သည်ဟု သုံးသပ်ရပါသည်။

ကမ္ဘောဒီးယားနိုင်ငံအစိုးရ လက်ရှိလုပ်ဆောင်နေမှုသည် အစိုးရမျိုးဆက်သစ် များအား နိုင်ငံအတွင်းမှ ပညာတတ်လူငယ်အင်အားစုများနှင့် စုစည်းပေါင်းစပ်နိုင်မည် ဆိုပါက ကမ္ဘောဒီးယားနိုင်ငံ၏ နိုင်ငံရေးနှင့် စီးပွားရေးအခြေအနေများ တစ်ဆင့်ချင်း တိုးတက်လာအောင် လုပ်ဆောင်နိုင်မည်ဟု ယူဆရပါသည်။ မကြာသေးမီကပင် တရုတ်နိုင်ငံခြားရေးဝန်ကြီးက ဝန်ကြီးချုပ်အသစ်နှင့် ဟွန်ဆန်တို့အား ကမ္ဘောဒီးယားနိုင်ငံ၌ လာရောက်တွေ့ဆုံခဲ့ပြီး ၎င်း၏ထောက်ခံမှုကိုပြသ၍ သံတမန်ရေးလက်ဦးမှုကို ရယူခဲ့ကြောင်း တွေ့ရသည်။ နိုင်ငံတည်ငြိမ်စွာ ဖွံ့ဖြိုး တိုးတက်ရေးနှင့် ဒီမိုကရေစီစနစ်ကိုတည်ဆောက်ရာတွင် သက်ဆိုင်ရာနိုင်ငံများ၏ သမိုင်းကြောင်း၊ ပထဝီနိုင်ငံရေး၊ နိုင်ငံရေးယဉ်ကျေးမှုနှင့် ပြည်ပဝင်ရောက်စွက်ဖက်မှုတို့ အပေါ်တွင် များစွာမူတည်နေပြီး တစ်နိုင်ငံနှင့်တစ်နိုင်ငံ ကွဲပြားခြားနားနေမည်သာ ဖြစ်ခြင်းကြောင့် မိမိတို့ချီတက်မည့် လမ်းကြောင်းအတိုင်း အောင်မြင်စွာဆောင်ရွက်နိုင်ရန်မှာ သက်ဆိုင်ရာ နိုင်ငံများ၏ ပညာခန်းပင်ဖြစ်ပါကြောင်း သုံးသပ်ဖော်ပြလိုက်ရပါသည်။

Myanmar Aspect

84081423

[1]။ SHAUN TURTON. “Hun Manet appointed by king as Cambodia's next PM.”Nikkei Asia, 7 Aug 2023 [https://asia.nikkei.com/.../Hun-Manet-appointed-by-king... 9 Aug 2023

[2]။ JACK BROOK and PHIN RATHANA. “Cambodia's Hun Sen plans power succession to son, allies' children.”Nikkei Asia, 2 May 2023 [https://asia.nikkei.com/.../Cambodia-s-Hun-Sen-plans... 9 Aug 2023

ကမ္ဘာ့တောင်ဘက်ခြမ်း ဖွံ့ဖြိုးဆဲနိုင်ငံများ၏ အနောက်အုပ်စုဆန့်ကျင်ရေး သဘောတရား(Anti-Westernism)၊ BRICS အဖွဲ့ဝင်လိုသည့်နိုင်ငံများ များပြားလာခြင်းနှင့်ပတ်သက်ပြီးဘာတွေသိထားသင့်သလဲ

 

နိဒါန်း

အနောက်အုပ်စုဝင်များကို ဆန့်ကျင်သည့် ကမ္ဘာ့တောင်ဘက်ခြမ်းဖွံ့ဖြိုးဆဲ (Global South)နိုင်ငံများ၏ လက်ရှိကမ္ဘာ့နိုင်ငံရေးအခင်းအကျင်းနှင့်ပတ်သက်သည့် စိုးရိမ်ချက်များ၊ ယခင် ကိုလိုနီပြုကျင့်ခဲ့သည့် နိုင်ငံများအပေါ် မကျေနပ်ချက်များ၊ Global South နိုင်ငံများအနေဖြင့် BRICS တွင် အဖွဲ့ဝင်ဖြစ်ရန်အဆိုပြုလာမှုများနှင့် အနောက်အုပ်စုအနေဖြင့် လုပ်ဆောင်သင့်သည့်အကြံပြုချက်များနှင့် ပတ်သက်ပြီး သုံးသပ်ဖော်ပြသွားပါမည်။[1]

ဖော်ပြချက်

စီးပွားရေးဖွံ့ဖြိုးတိုးတက်လာသော ကမ္ဘာ့တောင်ဘက်ခြမ်းဖွံ့ဖြိုးဆဲ(Global South)နိုင်ငံများအနေဖြင့် မည်သည့်အင်အားကြီးနိုင်ငံဘက်မှ မလိုက်လိုသည့် သဘောထား များကြောင့် အနာဂတ် ကမ္ဘာ့နိုင်ငံရေးအခင်းအကျင်း(World Order) ပုံဖော်မှုတွင် အရေးပါသည့်အခန်းကဏ္ဍမှ ပါဝင်လာနိုင်ပါသည်။ တောင်အာဖရိကတွင် ဩဂုတ်လ ၂၂ ရက်မှ ၂၄ ရက်အထိ ကျင်းပမည့် BRICS ထိပ်သီးညီလာခံတွင် ကမ္ဘာ့နိုင်ငံများ၏ ဦးတည်ချက်နှင့်ပတ်သက်သည့် အရေးပါသောအချက်များကို ထုတ်ဖော်လာနိုင်ပြီးလက်ရှိတွင် နိုင်ငံပေါင်း ၂၂ နိုင်ငံသည် BRICS အဖွဲ့ဝင်အဖြစ် လျှောက်ထားခဲ့ကြပြီး အခြားနိုင်ငံပေါင်း ၂၂ နိုင်ငံနီးပါးကလည်း BRICS နှင့် ပူးပေါင်းဆောင်ရွက်ရန်အတွက် စိတ်ဝင်စားလျက်ရှိကြပါသည်။ BRICS ၌ အဖွဲ့ဝင်အသစ်အနေဖြင့် ပါဝင်လိုသူများတွင် Global South ထဲမှ အဓိကနိုင်ငံများ အားလုံးပါဝင်နေပြီး လာမည့်ညီလာခံတွင် BRICS နိုင်ငံများ (ဘရာဇီး၊ ရုရှား၊ အိန္ဒိယ၊ တရုတ်နှင့် တောင်အာဖရိက)အနေဖြင့် အဖွဲ့ဝင်တိုးချဲ့မှုနှင့်ပတ်သက်သည့် ဆွေးနွေးမှုများကို ပြုလုပ်နိုင်ဖွယ်ရှိကြောင်း ဖော်ပြ ထားပါသည်။

သို့သော်လည်း လက်ရှိ BRICS အမာခံ နိုင်ငံများအချင်းချင်း ဆက်ဆံရေးသည် ခိုင်မာမှု ရှိသည်ဟု မဆိုနိုင်သေးပါ။ တရုတ်နှင့် အိန္ဒိယနိုင်ငံတို့သည် နယ်စပ်အရေးနှင့်ပတ်သက်၍ အငြင်းပွားနေကြပါသည်။ လွန်ခဲ့သည့် ၃ နှစ်ခန့်က နှစ်နိုင်ငံနယ်စပ်ပဋိပက္ခများကြောင့် ၄၅ နှစ်အတွင်း ပထမဆုံးအကြိမ် လူသေမှုဖြစ်ပွားခဲ့ပါသည်။ ရုရှားနိုင်ငံသမ္မတ Vladimir Putin ကို အပြည်ပြည်ဆိုင်ရာ ရာဇဝတ်မှုခုံရုံး(International Criminal Court-ICC)က စစ်ရာဇဝတ်မှုဖြင့် ဖမ်းဆီးရန် ဝရမ်းထုတ်ထားသည့်အတွက် ICC အဖွဲ့ဝင် နိုင်ငံဖြစ်သည့် တောင်အာဖရိကနိုင်ငံအနေဖြင့် ဖမ်းဆီးပေးရန် တာဝန်ရှိနေပါသည်။ ထို့ကြောင့် Putin သည် လာမည့် BRICS အစည်းအဝေးကို Video Call ဖြင့်သာ တက်ရောက်လိမ့်မည်ဖြစ်သည်ဟု ဆိုသည်။ Global South နိုင်ငံများအနေဖြင့် လက်ရှိကမ္ဘာ့နိုင်ငံရေး အခြေအနေများနှင့်ပတ်သက်၍ စိုးရိမ်မှုများမြင့်တက်နေသည့်အတွက် အပြောင်းအလဲ တစ်ခုအတွက် ပူးပေါင်းဆောင်ရွက်မှုပြုလုပ်ရန် ကြိုးပမ်းလာနိုင်ပါသည်။ ထိုအနာဂတ်အပြောင်းအလဲတွင် အထီးကျန်ဖြစ်လာနိုင်သည့်အဖွဲ့မှာ တရုတ်နှင့် ရုရှားနိုင်ငံ မဟုတ်ဘဲ အနောက်အုပ်စုဝင်နိုင်ငံများဖြစ်လာနိုင်ကြောင်း ဖော်ပြထားပါသည်။

ရုရှား-ယူကရိန်း ပဋိပက္ခများကြောင့် ကမ္ဘာ့နိုင်ငံများသည် အနောက်အုပ်စု၊ တရုတ်-ရုရှားအုပ်စုနှင့် ကြားနေအုပ်စုဟူ၍ အုပ်စု ၃ စု ကွဲနေပါသည်။ ဗြိတိန်နိုင်ငံ အခြေစိုက်သုတေသနအဖွဲ့ဖြစ်သည့် Economist Intelligence Unit ၏ မတ်လတွင် ထုတ်ပြန်ခဲ့သည့် သုတေသနအစီရင်ခံစာ၌ ပထဝီဝင်နိုင်ငံရေးအလားအလာများတွင် သိသိသာသာပြောင်းလဲနေသည်ကို ဖော်ပြနေပါသည်။ အဆိုပါအစီရင်ခံစာတွင် လွန်ခဲ့သည့်နှစ်အတွင်း ရုရှားနိုင်ငံကိုရှုတ်ချသည့် နိုင်ငံအရေအတွက်၊ သို့မဟုတ် အနောက်အုပ်စုဝင် နိုင်ငံများကို ထောက်ခံသည့်နိုင်ငံအရေအတွက်သည် ၁၃၁ နိုင်ငံမှ ၁၁၂ နိုင်ငံသို့ ကျဆင်း ခဲ့ပြီး ရုရှားနိုင်ငံကို ကျောထောက်နောက်ခံပြုနေသည့်နိုင်ငံ၊ သို့မဟုတ် ရုရှားနိုင်ငံကို အားပေးထောက်ခံသည့်နိုင်ငံသည် ၂၉ နိုင်ငံမှ ၃၀ နိုင်ငံအထိ တိုးလာခဲ့သည်ဟု ဆိုသည်။ တောင်အာဖရိက၊ အီရန်၊ ယူဂန္ဓာ၊ မာလီ၊ ဘူကီနာဖာဆိုနှင့် ဘိုလီဗီးယားနိုင်ငံတို့သည် ရုရှားနိုင်ငံကို ထောက်ခံလာခဲ့ကြပြီး ထိုကဲ့သို့ ပြောင်းလဲမှုများ ဆက်လက်ဖြစ်ပေါ် နေပါက လက်ရှိလစ်ဘရယ်ကမ္ဘာ့နိုင်ငံရေးအခင်းအကျင်းအတွက် နောက်ထပ်ဆုတ်ယုတ်မှုများ ဖြစ်ပေါ်လာ နိုင်ပါသည်။ အနောက်အုပ်စုဝင်နိုင်ငံများအနေဖြင့် အဆိုပါအခြေအနေကို ရပ်တန့်ပစ်ရန် လိုအပ်ပြီး ပြဿနာ၏ အကြောင်းအရင်းကို ဦးစွာရှာဖွေရမည်ဖြစ်ကြောင်း ဖော်ပြ ထားပါသည်။

ရဝမ်ဒါနိုင်ငံ၌ ဇွန်လ ၁၂ ရက်မှ ၁၄ ရက်အထိ ကျင်းပခဲ့သည့် အပြည်ပြည်ဆိုင်ရာညီလာခံ(Kigali Global Dialogue)တွင် Global South နိုင်ငံများ၏ အဓိက မကျေနပ်မှုများကို ရှာဖွေတွေ့ရှိခဲ့ပါသည်။ Kigali Global Dialogue သို့ Global South မှ ထိပ်တန်းပုဂ္ဂိုလ်များနှင့် ပညာရှင်များ တက်ရောက်ဆွေးနွေးခဲ့ကြပြီး စီးပွားရေးဖွံ့ဖြိုးတိုးတက်မှုနှင့် အခြားကိစ္စရပ်များကို ဆွေးနွေးစဉ်တွင် အနောက်အုပ်စုဝင် နိုင်ငံများအပေါ် ၎င်းတို့၏ မကျေနပ်မှုများကို ထုတ်ဖော်ပြောဆိုခဲ့ကြပါသည်။ ထိုထုတ်ဖော်ပြောကြားခဲ့မှုများအရ Global South နိုင်ငံများ၏ အနောက်အုပ်စုဝင်နိုင်ငံများ အပေါ် မကျေနပ်သည့် အဓိကအချက် ၃ ချက်ရှိပါသည်။ ပထမအချက်အနေဖြင့်အမေရိကန်နှင့် ဥရောပနိုင်ငံများ ဦးဆောင်နေသည့် ကမ္ဘာ့အခင်းအကျင်းသည် စီးပွားရေး ဖွံ့ဖြိုးဆဲနိုင်ငံများ၏ အမြင်များကို လုံလောက်စွာ ထင်ဟပ်စေခြင်းမရှိဟု ယုံကြည် နေကြပါသည်။ ကုလသမဂ္ဂလုံခြုံရေးကောင်စီ(UNSC)၏ အမြဲတမ်းအဖွဲ့ဝင် ၅ နိုင်ငံ တွင်လည်း အနောက်အုပ်စုဝင် ၃ နိုင်ငံပါဝင်နေသည့်အတွက် မျှတမှုမရှိဟုဆိုပြီး လူဦးရေ များပြားလှသည့် အာဖရိကနှင့် လက်တင်အမေရိကဒေသမှ နိုင်ငံများသည် အဖွဲ့ဝင် အဖြစ် ပါဝင်သင့်သည်ဟု ဖော်ပြထားပါသည်။

ဒုတိယအချက်အနေဖြင့် ရုရှားနိုင်ငံကို အရေးယူပိတ်ဆို့ခဲ့ခြင်းကြောင့် ဖြစ်ပေါ် လာသော စွမ်းအင်နှင့် စားသောက်ကုန်ဈေးနှုန်းများ မြင့်တက်လာခြင်းသည် Global South နိုင်ငံများ၏ တည်ငြိမ်မှုကို ထိခိုက်စေသည်ဟု ရှုမြင်နေကြပါသည်။ Global South နိုင်ငံအများစုသည် ရုရှားနိုင်ငံ၏ ယူကရိန်းနိုင်ငံအပေါ် ကျူးကျော်မှုများကို ဆန့်ကျင်နေကြသော်လည်း အမေရိကန်နှင့် ဥရောပနိုင်ငံများ၏ အပစ်အခတ်ရပ်စဲရေး ကြိုးပမ်းမှုများကို တိုးမြှင့်လုပ်ဆောင်စေလိုကြပါသည်။ အချို့က အနောက်အုပ်စုဝင်နိုင်ငံ များ၏ “Double Standard” ကျင့်သုံးနေမှုကို ထောက်ပြခဲ့ကြပါသည်။ ဥပမာအားဖြင့် ဆီးရီးယားနိုင်ငံတွင် ပြည်တွင်းစစ်နှစ်ပေါင်းများစွာကြာဖြစ်ပွားခဲ့သော်လည်း အနောက် အုပ်စုဝင်နိုင်ငံများသည် ယူကရိန်းနိုင်ငံဖြစ်စဉ်ကဲ့သို့ တုံ့ပြန်ခြင်းမပြုလုပ်ခဲ့ဟု ဆိုသည်။ ၂၀၀၃ ခုနှစ်တွင်လည်း အမေရိကန်နိုင်ငံသည် လုံခြုံရေးကောင်စီ၏ ဆုံးဖြတ်ချက် မပါဝင်ဘဲ အီရတ်နိုင်ငံကို ကျူးကျော်မှုပြုလုပ်ခဲ့ပါသေးသည်။ တတိယအချက်မှာ အဓိက ကျသည့် ပြဿနာအရင်းအမြစ်များဖြစ်ပြီး Global South နိုင်ငံများအနေဖြင့် အနောက် အုပ်စုဝင်နိုင်ငံများ၏ ယခင်ကကိုလိုနီပြုခဲ့မှုများအပေါ် နက်ရှိုင်းစွာအမြစ်တွယ်နေသည့် မကျေနပ်မှုများဖြစ်ပါသည်။ ထိုသို့ ကိုလိုနီပြုကျင့်ခဲ့မှုများက Global South နိုင်ငံများ၏ ဖွံ့ဖြိုးတိုးတက်မှုကို အဟန့်အတားဖြစ်စေသည်ဟု အဆိုပါနိုင်ငံများက တညီတညွတ်တည်း မှတ်ယူထားကြကြောင်း ဖော်ပြထားပါသည်။

အချုပ်အားဖြင့် အထက်ပါပြဿနာရပ်များသည် အသစ်အဆန်း မဟုတ် သော်လည်း ဖွံ့ဖြိုးဆဲနိုင်ငံများ၏ ပါဝါနှင့်လွှမ်းမိုးမှုမြင့်မားလာသည့်နှင့်အမျှ နှစ်ပေါင်း များစွာ တအုံနွေးနွေးဖြစ်နေသည့် မကျေနပ်မှုများက ပေါက်ကွဲထွက်လာနိုင်သည်ဟု ဆိုပါသည်။ ကိုလိုနီပြုလုပ်ခဲ့သည့်နိုင်ငံများအနေဖြင့် ၎င်းတို့ပြုလုပ်ခဲ့သည်များကို ပြန်လည်ပြင်ဆင်ရန် ကြိုးပမ်းသင့်ပါသည်။ ထိုသို့မကျေနပ်ချက်ကို အခွင့်ကောင်းယူ၍ တရုတ်နှင့် ရုရှား နိုင်ငံတို့သည် ကိုလိုနီဆန့်ကျင်ရေးစည်းရုံးမှုကို အရှိန်မြှင့်လာကြပါသည်။ ရုရှားနိုင်ငံ အနေဖြင့် ၎င်း၏နိုင်ငံခြားရေးမူဝါဒတွင် ခေတ်သစ်ကိုလိုနီစနစ်(New Colonialism) ဆန့်ကျင်ရေးသဘောတရားများ ထည့်သွင်းထားပြီး တရုတ်နိုင်ငံအနေဖြင့်လည်း ကိုလိုနီစနစ်ကိုဆန့်ကျင်ပြီး Global South နိုင်ငံများကို စည်းရုံးနေပါသည်။ ယခင်က ရုရှားနှင့် တရုတ်နိုင်ငံတို့သည် ထိုကဲ့သို့သော သံတမန်ရေးဆိုင်ရာနည်းဗျူဟာများကို အသုံးချခဲ့ဖူးပြီး ရုရှားနိုင်ငံသည် စစ်အေးခေတ်အတွင်းကတည်းက ကိုလိုနီ ဆန့်ကျင်ရေးကို ထောက်ခံခဲ့ပါသည်။ တရုတ်နိုင်ငံသည်လည်း ၎င်း၏ အခြေခံဥပဒေနိဒါန်းတွင် အဆိုပါ မူဝါဒကို ထည့်သွင်းဖော်ပြခဲ့ပါသည်။ အနောက်အုပ်စုဝင်နိုင်ငံများအနေဖြင့် တရုတ်နှင့် ရုရှားနိုင်ငံတို့၏ Global South နိုင်ငံများနှင့် ပတ်သက်သည့် လုပ်ဆောင်ချက် များကို လျစ်လျူမရှုသင့်ဘဲ အကယ်၍ လျစ်လျူရှုထားပါက အနောက်အုပ်စုနှင့် Global South နိုင်ငံများ၏ ဆက်ဆံရေးကို ဝေးကွာသွားစေနိုင်သည်ဟု ဆိုသည်။ QUAD အဖွဲ့ဝင် ဖြစ်သည့် အိန္ဒိယနိုင်ငံသည် ကိုလိုနီစနစ်နှင့်ပတ်သက်၍ မကျေနပ်မှုများရှိနေပါသည်။ ထိုသို့ ကိုလိုနီပြုမှုအပေါ်နက်ရှိုင်းသည့် မကျေနပ်မှုများရှိနေသည့် Global South နိုင်ငံ များ၏ သဘောထားကို အလေးအနက်ထားခြင်းဖြင့် အနောက်အုပ်စုဝင်နိုင်ငံများအနေဖြင့်Global South နိုင်ငံများနှင့် အပြန်အလှန်အကျိုးရှိမည့် ဆက်ဆံရေးကို ဆွေးနွေးမှု များမှတစ်ဆင့် တိုးမြှင့်ဖော်ဆောင်သင့်ကြောင်း ဖော်ပြထားပါသည်။

တွေ့ရှိသုံးသပ်ချက်

ဆောင်းပါးတွင် ရေးသားထားချက်များအရ BRICS အဖွဲ့ဝင်နိုင်ငံများ၏ သဘောထားနှင့် စည်းရုံးရေးလမ်းကြောင်းသည် Global South နိုင်ငံများဆီသို့ ဦးတည် နေကာ အောင်မြင်မှုရရှိနေပြီး အနောက်အုပ်စုနိုင်ငံများအနေဖြင့် နောက်ကောက်မကျ စေရန် ပြုပြင်သင့်သည်များကို ထောက်ပြအကြံပြုထားကြောင်း တွေ့ရှိရပါသည်။ အထူး သဖြင့် ရုရှားနှင့် တရုတ်နိုင်ငံတို့သည် အာရှဒေသတွင်းအပြင် အာဖရိကဒေသရှိ နိုင်ငံများ ကိုပါ ၎င်းတို့၏ အင်အားစည်းရုံးရေးခြေလှမ်းများတွင် ထည့်သွင်းလာသည်ကို တွေ့ရှိရပြီး အာရပ်နိုင်ငံများအပြင် အာဂျင်တီးနားနှင့် အီရန်နိုင်ငံတို့ကလည်း လက်ရှိ အချိန်တွင် BRICS တွင် အဖွဲ့ဝင်နိုင်ငံအဖြစ် ဝင်ရောက်လိုနေကြပါသည်။ ထို့ပြင် BRICS အဖွဲ့အနေဖြင့် သီးခြားငွေကြေးတီထွင်ဖော်ဆောင်ရန် ပြင်ဆင်နေပြီး ထိုငွေကြေး စနစ်ဖြင့် ကုန်သွယ်ရေးနှင့် အရန်ငွေကြေးစနစ်များ ဆောင်ရွက်လာပါက ဒေါ်လာ လွှမ်းမိုးမှုအား လျှော့ချနိုင်သဖြင့် အမေရိကန်နှင့် အနောက်အုပ်စုဝင်နိုင်ငံများအတွက် အထိနာစေမည်ဟု ယူဆမိပါသည်။

လက်ရှိတွင် BRICS သည် အနောက်အုပ်စု၏ လွှမ်းမိုးမှုမရှိသည့် အဖွဲ့အစည်း ဖြစ်ပြီး Global South နိုင်ငံများအားလုံးက ပူးပေါင်းပါဝင်ရန် စိတ်အားထက်သန်လျက်ရှိသော်လည်း ဦးဆောင်အဖွဲ့ဝင်များဖြစ်သည့် တရုတ်နှင့် အိန္ဒိယနိုင်ငံတို့၏ နယ်စပ် ရေးရာပဋိပက္ခများနှင့် ရုရှားနိုင်ငံ၏ နိုင်ငံရေး၊ စစ်ရေးပဋိပက္ခများကြောင့် အဖွဲ့ဝင် တိုးချဲ့ရေး အစီအစဉ်များတွင် စိန်ခေါ်မှုများလည်း ရှိနေမည်ဖြစ်ပါသည်။ အချုပ်အားဖြင့် လိုတစ်မျိုး၊ မလိုတစ်မျိုးမူ (Double Stanadard) နှင့် ဗိုလ်ကျလွှမ်းမိုးမှု (Hegemony) ကို ကိုင်စွဲ၍ ကမ္ဘာ့အခင်းအကျင်း ဖော်ဆောင်ထားသည့် အမေရိကန်နိုင်ငံအနေဖြင့် ကိုလိုနီပုံစံသစ် (New Colonialism) ကို ဆန့်ကျင်သည့်သဘောတရားများအား အခြေခံထားသော BRICS ကဲ့သို့ နိုင်ငံစုံအဖွဲ့၏ အဖွဲ့ဝင်များ ကျယ်ပြန့်နက်ရှိုင်းလာခြင်းကို တုံ့ပြန်နိုင်ရန် ၎င်းတို့၏ မူဝါဒများနှင့် လုပ်ဆောင်ချက်များကို ဦးစွာပြုပြင်ပြောင်းလဲရန် လိုအပ်မည်ဖြစ်ပါသည်။

မကြာမီက ဖြစ်ပေါ်ခဲ့သော အာဖရိကနိုင်ငံများဖြစ်သည့် မာလီ၊ ဘူကီနာဖာဆို၊ နိုင်ဂျာနိုင်ငံတို့တွင် စစ်ဘက်မှအာဏာရယူပြီး ၎င်းတို့အား ကိုလိုနီပြုခဲ့သော ပြင်သစ် နိုင်ငံအပါအဝင် အနောက်အုပ်စုဝင်နိုင်ငံများကို ပြစ်တင်ရှုတ်ချ၍ အာဖရိကအား လွှမ်းမိုးရန်ကြိုးစားလာသော ရုရှားနှင့် တရုတ်နိုင်ငံတို့အား ထောက်ခံမှုပြုလုပ်နေခြင်းသည် ကိုလိုနီ ဖြစ်ခဲ့သော ဖွံ့ဖြိုးဆဲနိုင်ငံများ၏ သဘောထားကို ထင်ဟပ်စေပါသည်။ ထို့ပြင် ဖွံ့ဖြိုးဆဲကိုလိုနီစနစ်၏ ဒဏ်ကိုခံခဲ့ရသည့် နိုင်ငံများသည် နိုင်ငံကြီးများ၏ အားပြိုင်မှုတွင် ကြားမညပ်လိုသောကြောင့် နိုင်ငံများစုပေါင်းထားသည့် နိုင်ငံတကာအဖွဲ့အစည်းတွင် ပါဝင်နိုင်ရန် လိုလားလျက်ရှိပါသည်။ ထို့ကြောင့် အနာဂတ်ကမ္ဘာ့နိုင်ငံရေးအခင်းအကျင်းတွင် ဖွံ့ဖြိုးဆဲနိုင်ငံငယ်များ၊ ကိုလိုနီပြုခံခဲ့ရသည့် နိုင်ငံများ၏ အချုပ်အခြာအာဏာနှင့် သဘောထားများကို လေးစားသည့် ကမ္ဘာ့အင်အားကြီးအုပ်စုများ အင်အားကောင်းလာဖွယ်ရာရှိသည်ဟု ယူဆကြောင်း သုံးသပ်ဖော်ပြလိုက်ရပါသည်။

Myanmar Aspect

83081123

[1]။ HIROYUKI AKITA.“ Will anti-Westernism sweep Global South?”. Nikkei Asia, Aug 5, 2023 [https:// asia.nikkei.com/Spotlight/ Comment/ Will-anti-Westernism-sweep-Global-South/]-accessed on Aug 8, 2023